|
،،،،،،،،،،،،،،،،،،،،، جلس يفكر بالموضوع اكثر من مره ، واستخار اكثر من مره " ذا الحين منين ببدأ ،،،،،،،، ابوي بقدر عليه ولافي بحطه بجيبي ، لكن خالتي كيف افهمها الموضوع بعد تفكير عميق قرر يصارح خالته بكل شي : هي بتعرف الحين ولا بعدين ،،،، اخليها تسمع مني احسن ولاانها تسمع من الناس دخل بيت خالته بهدوء،،،،،،،،،،، ، و جاته شهد طايره ، بتسلم عليه شالها وصار يلاعبها ويضحك معها نواف سلم على متعب : وشلونك متعب : بخير ، انت بشرنا عنك ، شلون المدرسه معك نواف ، لا تجيب طاريها يضيق صدري متعب : هههههه يا الفاشل ، اللي مثلك يشد حيله ، ذي آخر سنه نواف : انا لولا السياره اللي وعدني فيها ابوي ، كان ما المس الكتاب متعب : هههههههههههههه قايل لك فاشل شهد كل شوي تقاطعهم ، ماتبي متعب ينشغل عنها يمسك خدودها : وش تبين جننتيني شهد : بروح معك نلعب مع ساره ،،،، ( ساره خيل عند متعب صغيره ) متعب : حاضر ، من عيوني ، بس مو اليوم شهد زعلت : مابي بروح متعب : قلنا مو اليوم نواف : انا بروح باخذتس معي متعب : لا ،،، هي ماتبي غيري انا عارف هههههههههه شهد انبسطت على متعب اللي فاهمها فيصل سلم على متعب : امي تنتظرك بغرفتها بينه وبين نفسه " الله يستر " صار يتمشى هو ونواف يتكلمون ، لحدماوصل غرفة خالته ، ثم تفرقوا ،،،، دخل لخالته بعد ما استئذنها متعب : السلام عليكم ام خالد بعصبيه : وعليكم السلام جلس بقربها ومو عارف كيف يفتح الموضوع ام خالد : رحت للرجال ولالا متعب بكلام متقطع : يمه ،،،،،، انا ،،،،،،، مدري وش اقول ام خالد : وشو يامتعب ، تكلم لاتخليني على نار ، كان فيه شي بينك وبين البنت قوله متعب : يمه بصراحه ،،، البنت من طرف عبدالعزيز كان الخبر عليها مثل الصاعقه ، التفتت لمتعب ووجها مخطوف لونه : منهو عبدالعزيز متعب نزل راسه : ابوي ام خالد : انت وش تقول يحاول مايكون متوتر من عصبية خالته :هي بنت زوجته وقفت بغضب : انت اكيد صاير لمخك شي متعب : يمه خليني اوضح لتس اللي صاير حست الدنيا تدور فيها : ذي آخرها يامتعب ، ذي آخرها متعب : يمه اهدي شوي ، خليني اعرف اتكلم معتس ام خالد : وش اللي بتكلمني فيه ، وشو ،،،،، انت عارف عبدالعزيز وش سوى لك ولأمك ولنا كلنا ، جايني تقول بتزوج بنت زوجته متعب : طيب خليني اقولتس وشو له بتزوجها ام خالد : مابي اسمع شي ، اتركني وروح ماعاد فيني صبر اني اسمع منك شي يقرب منها ، يمسك يدها : يمه افهميني الله يخليتس ام خالد : وش افهم ، كل شي واضح ،،،، رحت تبي تاخذ حقوق امك وجيتني العاشق المغرم تبي تتزوج بنت زوجته يمه الله يهديتس ، وش اللي اسمعه ، البنت ما اعرفها ولاتعرفني ، كل مافي الموضوع انها بالصدفه طلعت زميلة شيماء وشافتني فبيت عبدالعزيز ولا كان في عذر غير انهم يقولون اني خطبت بنتهم ،،، ولا تبينهم يقولون ولد عبدالعزيز ام خالد : وانت وش مجلسك فبيته ، عمك قالي انك ترسل حاجاتهم ومصرفهم مع سواق الشركه وعلاقتكم من بعيد ارتبك من عذر عمه : ايه هو صادق لكن ، البنت شافتني عند باب البيت وكنت اكلم شغالة البيت ، يعني من غير كلام واضح اني قاصد بيت عبدالعزيز ام خالد : لا مستحيل ، مستحيل ، ما ابي اسمع شي متعب : مافي حل غير كذا ام خالد : جلست بانهيار يكلمها بهدوء : انتي عارفه ان الرجال مريض ، وعياله صغار ولالهم احد ام خالد : وانت ماكان لك احد ، لولا عبدالرحمن كان انت ولاشي ،،،، جاي الحين غير انك وقفت معه ومتخسر عليه تبي تتزوج بنت زوجته بعد متعب : يمه الله يطول لي بعمرتس ، ذا واجبي لأخواني ، ترى حالهم من حالي مالهم ذنب بأخطاء ابوهم ،،،،،،،، والبنت بتزوجها عن كلام الناس ، لاتفهمين شي ثاني وش تبينهم يقولون عني وانا كل شوي داخل عليهم وطلع منهم اقلها بيقولون ،،، منهو ذا ؟ ام خالد : زوجة عبدالعزيز تلعب عليك هي وبنتها ، انا متأكده من كذا متعب : انا اتفقت مع امها ، بتكون ملكه وبس ،، ماراح اتخسر شي ، لامهر ولا بيت ولاغيره واول ما اخلص التوكيل اللي بيني وبينه ، بطلق البنت وعلاقتي بتكون معهم من بعيد ام خالد : وش له اللي انت تسويه متعب : الرجال مريض ووضعه صعب ، لو صار له شي بيكون الوصي على عياله اي واحد من اخوانه ،،، وانا وصلني خبر ان علاقتهم ماديه وكلها مشاكل ولا ابي غير ان التوكيل باسمي ، لو صار ماصار ، اقدر اوقفهم عند حدهم ولا احد يقدر ياخذ منهم شي ولا يجبرهم على شي متعب : انتي يرضيتس كلام الناس ، وش بيقولون لدخلاتي وطلعاتي لبيته ،، ولو خليت الوضع كذا يمكن احد يضغط على زوجة عبدالعزيز وتقولهم اني ولده ووقتها بيكون تبرير الموقف صعب ام خالد بدت تقتنع متعب : انا ماراح اخطي خطوه الا برضاتس ام خالد بمكر : طيب والبنت متعب : البنت بطلقها وذا اتفاقي مع امها من الأول وهي ماعندها اي مانع يحاول يلطف الجو ،، ابتسم : ووقتها بجيتس تخطبيلي البنت اللي انتي تبينها ، وش رايتس ام خالد : خوفي انك تجاريني ،، و ان تم كل شي بتقول ماني مطلقها متعب : وش اللي تقولين يمه ، انا شرطي بالموضوع اني اطلقها على الملكه ،، لا بيصير زواج ولا بشوف البنت اصلا ام خالد بعد تفكير : سلمان ماراح يوافق متعب : عارف انه ماراح يوافق ، انا بفهمه اني بتزوج البنت ،، ووقتها بلقى اي عذر واقوله طلقتها ،،، لاتخافين ، مو صاير الا اللي تبين ام خالد : الله يعيني على اللي جاي متعب : مو جاي الا الخير الحين بخليتس ، ارتاحي وفكري بالموضوع ، وان قررتي كلميني عشان اكلم ابوي ام خالد : على خير قرب منها وحب راسها : يالله ،، فمان الله ام خالد : الله معك ،،،،،،،،،،،،،،،،،،،،،،،، بعد يومين من الازمه اللي شلت تفكير متعب دخل بكل صمت وهدوء حصه تناديه : متعب التفت لها وواضح عليه الضيقه : سمي حصه : عبدالرحمن كان هنا متعب : خير فيه شي تنزل راسها : كلم ابوك بموضوع وشكلهم ما اتفقوا مع بعض متعب : وش موضوعه ، وش فيه ابوي سكتت شوي : موضوع زواجك حاول قد مايقدر ان نظراته ما تواجه نظرات عمته ، صار مثل اللي بدوامه مو عارف يطلع منها متعب : طيب انا بدخل اكلمه حصه بخوف : هو اصلا ينتظرك ، ، لكن وش اللي صاير بينكم متعب يناظر عمته وهو ساكت حصه بخوف : ابوك مايتحمل زعل ،، الله يخليك سو اللي يبيه لو غصب عنك متعب يهدي عمته الخايفه : لاتخافين مو صاير غير اللي ابو متعب يبيه ارتاحت حصه شوي ، مع انها مو عارفه موضوع الزواج ولا عارفه البنت من تكون ، كل اللي تعرفه ان متعب بيتزوج وابوه رافض الموضوع متعب بانكسار يروح لأبوه ويحب راسه سلمان يجاول يكتم غضبه قدر المستطاع متعب : شلونك يبه سلمان وهو اول مره يقابل ويكلمه بهالشكل : انا ماطلبتك هنا عشان اقولك وشلوني متعب بدى يستغرب : وش اللي صاير ، وش فيكم علي ، كل ماشافني احد صار يلومني سلمان بغضب شديد وصوته المرتفع : انا ماربيتك وخليت لك مكانتك لجل تقابلني بالمهزله اللي تصير من وراي متعب يحاول يضبط اعصابه : اي مهزله وش صاير سلمان بصوت عالي : انت عارف انا وش اقصد سكت وجلس وهو مقرر ماقاطع ابوه ولا يثير اعصابه اسمع يامتعب ، انا لايمكن اتدخل باختيارك لشريكة حياتك مهما كانت الأسباب ، ولا يهمني من تكون بنته لكن اللي مايرضي رب العالمين ولا يرضيني ، انك تستر نفسك وراء بنت مالها ذنب بظروفك ، عشان تمنع نفسك عن كلام الناس متعب بغضب : وش تبيني اسوي يعني ، وكيف بفسر وجودي داخل بيت عبدالعزيز وترى خليتو الموضوع جريمه ، وهو ولا مستاهل كل اللي صار سلمان بتهديد : ابتعد عن عبدالعزيز ، ولا ابي اسمع انك معتب بابه وقف بغضب : مابي اسمع احد يقول ابتعد عنهم ، انا المسؤول عن اللي صار لعبدالعزيز وانا اللي اتحمل غلطتي سلمان وصوته ارتفع : الحين عرفت انها غلطه ، وينك وقتها يوم احاول اقنعك ماتسحب اسهمي من السوق متعب : كنت ابيه يخسر واقهره على اللي ضاع منه ،، ولا كنت حاسب حساب للي صارله وما عندي خبر ان الرجال معه ازمات بالقلب سلمان بثقله وشيبته وشخصيته اللي تفرض على الكل احترامه : انا تكلمت بوضوح ، واتمنى تعتبر كلامي امر ويلزمك التنفيذ متعب : وشو ؟، واخواني ،،،، بعد ماجهزت التوكيل بصعوبه ، تبيني اتركهم سلمان : اقولك اطلع من بيت عبدالعزيز سكت ولا له خاطر يزعل الرجال اللي انتشله من اللاشيء وخلاه شيء مهم بعصبيه يحاول يقطع صمت متعب : انت تحسب بنات الناس لعبه ، ماخفت الله باللي تفكر فيه يناظر ابوه وعيونه من الغضب صار لونها احمر ، ومن غير اي كلام كان منصت له باحترام سلمان : لو بغيت تملك مثل الناس ، انا موجود وكلي لك ، وانت عارف اني انتظر اللحظه اللي اخطبلك فيها على نار لكن لو حاولت تخدعني وتتزوج البنت لغرض غير انها تكون زوجه ، ماراح اسامحك ولا ربي بيسامحك ارتاح متعب شوي وعرف ان ابوه خوفه انهم يظلمون البنت وبس ، وهو كان معتقد انه رافضها رفض نهائي لأنها بنت زوجة عبدالعزيز يقرب من ابوه ويحب راسه : يعني انت مو رافض الزواج سلمان : ارفضه لو كان كلام عبدالرحمن صحيح ، اما لو انت تبي البنت وشاريها ، تأكد اني بكون اسعد واحد بالموضوع متعب بتصنع : انا ابيها ، وخالتي ماكانت بتوافق غير بالحيله اللي قلتها لها تهلل وجه سلمان بعد الغضب الشديد اللي كان على ملامحه ان كان الموضوع كذا ، حدد الوقت اللي تبيه واروح معك ونملك ، وكانها على خالتك ، بسيطه الوقت بيعلمها ان الزواج قسمه ونصيب ابتسم متعب لأبوه اللي كل يوم يكبر بعينه اولا لخوفه من الله حتى في ابسط الامور ، وثانيا انه يحاول يرضي متعب بأي شيء يتمناه : حاضر يالغالي ولا يهمك بفكر بالوقت المناسب وابلغك سلمان : الله يكتب اللي فيه خير ياولدي ،،،،،،،،،،،،،،،،،،،،،، في المطار خالد ينتظر رحلته ومتعب معه متعب : لا تلومني على اللي صار ، الموضوع صار كذا وانا مليت من الكلام فيه خالد : مو مهم ، ماراح الومك ولا بعاتبك على التصرف اللي صار ، لكن بقولك حاجه مهمه لا تظلم بنت الناس على حساب نفسك متعب : انا ماظلمت احد ، البنت موافقه واهلها موافقين ، ارجوك فكنا من الموضوع ،،، صار يضايقني ولا عندي اي استعداد اكثر الكلام فيه خالد : براحتك بعد وقت قصير ، يشرب قهوته : متى ترجع خالد : برجع على وقت ولادة نوف ، بحاول اكون معها اسبوع او اكثر خذ شنطته واستعد للرحله ، سلم على متعب بحراره وقاله : لاتزعل من كلامي معك متعب يبتسم : انت اخوي ياخالد ، مابينا زعل خالد : الله يعزك يالغالي ، ماوصيك على شهد ههههههه متعب : بعيوني ولا يهمك ،،، لو احتجت اي شي كلمني سلموا على بعض وكل واحد اتجه لطريقه ,,,,,,,,,,,,,,,,,,,,,, |
البارت الثامن عشر دانه ومنيره علاقتهم بدى يكتسيها التودد جالسات يفكرون بموضوع صالح ، وظلم لافي فيه دانه : كل اللي معي مايوصل 2000 ريال ، ماراح تغطي تكاليف زيارة الدكتور منيره : حسبي الله ونعم الوكيل فيه ، غرته الدنيا على مصلحة ولده دانه : الله بيفرجها ، انتي بس اصبري ومايصير الا الخير منيره : منين بتفرج وهو كل ماصار معه قرش قفل عليه ولا خلاه للبقاله اللي ماشفنا منها منفعه، غير له هو بنفسه دانه : مدري وش اقولتس ، لكن الله بيهديه ان شاء الله منيره بع تفكير : انا ببيع ذهبي دانه : عندتس ذهب منيره : ايه دانه : معقوله ، وابوي ما اخذه منتس منيره : مايدري عنه ، ولا كان ماخذه من زمان ،، لكن انا خليته لليوم الأسود دانه : الله بيعوضتس غيره ، لايضيق صدرتس عليه بعد صمت قليل دانه : خليني اشوفه هو يسوى ولالا منيره بغرور : ايه بالله يسوى ، ذا ذهبن طيب وارثته عن امي الله يرحمها ، ماهو من ذهب ذالحين المخلوط قومي قفلي الباب لا يجي لافي دانه : طيب تقوم تقفل الباب بحذر ، وتراقب منيره اتجهت لسريرها بكل هدوء وحذر ،،،،،، شالت الفراش اللي على سريرها ،،،،،،،،،،،،،،، ثم شالت خشبة السرير ،،،،،،،،،،،،،،، وطلعت صندوق قديم فيه قفل بعد مافتحت الصندوق ، طلعت منه صرّة مربوطه فيها صندوق ثاني دانه تراقب " احس انها بتطلع كنز" اخيرا وصلت للصندوق ودانه عيونها ماغابت عنها وبكل انتباه وبدون اي صوت ترتقب تصرفاتها فتحت الصندوق وطلعت اسواره دانه تراقب الصندوق ، تنتظرها تطلع باقي الذهب ، ،،،، لكن منيره خلت الصندوق على السرير ومامعها الا الاسواره دانه وش ذا منيره : ذهبي دانه تناظر الصندوق : في غيره منيره : لا بس هو دانه انتي لتس ساعه تحوسين آخرها بس ذي منيره اللي تشوف الدنيا كلها بهالأسواره ولاترضى احد يهين اسوارتها: ذي تسوى آلاف دانه تحط يدها على فمها و تضحك بهدوء : المفروض بيطلعلنا احد يقول شبيك لبيك على اللي سويتيه بالصندوق منيره بأسى : ليه ، ماتجيب لنا شي دانه : وش تجيب الله يهديتس ، ذي ما لها وزن ، " وبمزح" الصناديق اللي كانت فيهم الاسواره بتجيب اكثر من ثمنها منيره فقدت الأمل وبمزح قالت : اجل بهديها لهيا لي تزوجت دانه : هههههه ان شالله ،،، لاتشغلين بالتس الله بيسرها بصوته اللي يهز اركان بيتهم الصغير : دانـــــه دانه بفزع : وش فيه شكله معصب من شي منيره : ذا لافي من عرفته ، لي دعا له احد تقولين بيجلده دانه بابتسامه : بشوفه وارجع قربت منه بضعف وخوف : سم يبه لافي يناظرها بدقه : قدام للمجلس ، ابيتس بحاجه مشت معه وهي خايفه وعارفه ان ابوها ناوي نيه جلست وهي تنتظر اللي بيقوله بكل خوف لافي : اليوم جاني رجال ، يخطب ،،،،،،،،،،،،، دانه باستغراب : من يخطب لافي : يخطبس انتي ، اجل من بيخطب دانه : الموضوع تكلمنا فيه قبل كذا وانت عارف رايي بالزواج لافي : رايتس ذا هو اللي قطع نصيبتس دانه : اجل تبيني اغش الناس لافي : الرجال ، ماينرد ، ولو قلتله عن وضعتس بيتركتس مثل غيره دانه : ارجوك يبه ، انا اوافقك بكل شي تبيه الا اني اغش احد فيني اسمعيني زين ترى الرجال له افضال علي ولا يقصر ، ولا لي نيه ارده ،،، والحمدلله من يوم طلعلي ترخيص البقاله ربي منعم علي صعقها اللي سمعته من ابوها " متعب " مستحيل ، محد طلع لأبوي الترخيص غيره صارت تناظر ابوها بخوف اكثر من انه صدمه ،،،، تملكها احساس ان الموضوع خطه وهي بتكون الطعم لافي : وش بتس تناظريني ماكنتس قد شفتيني انتبهت ان نظراتها طالت ونزلت راسها بسرعه لافي :الرجال معروف وينطمع بقربه ، و انا عطيته كلمه تحاول تسمع ابوها وش يقول لكن صدمتها مخليتها موحاسه بأي شي لافي : الرجال بيعوّد عقب ليلتين ، يجيب اهله ويملكون تحاول تكلم ،،،،،،،،، ، تحس ريقها نشف ،،، ودمها نشف ،،،، : منهو الرجال لافي : يقاله متعب سلمان الـــ، رجال ينشرى وعلومه طيبه ولا قدطلبته في حاجه وردني دانه معقده حواجبها والضيقه خذت منها عنوان : وش عرفك فيه لافي باستغراب : وش اللي وش عرفني فيه ، وش عليتس انتي من علوم الرجال بخوف : وليه بيتزوجني ،،، قصدي وش اللي جابره ياخذني انا بالذات لافي : الزواج نصيب ، والرجال لا له ام ولا خوات عشان يشوفون له زوجه ، وهو جاني بنفسه وشارييتس وحتى يوم كلمته بموضوع مدرستس ، ماقصر وتزهل بالموضوع تناظر بالأرض والغضب يخنقها ، تأكدت انها فعلاً مؤامره وانها بتكون الضحيه ، واللي عصر قلبها اكثر ، ان امها اللي دبرت الحيله بينها وبين نفسها " طيب يايمه ، انا بخلي حدود لقراراتس فيني " لافي : انا اقول علمي امتس ، ولاتنسين اني وافقت وخلصت قامت بثقل : ان شاء الله ، وطلعت لغرفة خواتها وهي في توعد لأمها على تصرفها من غير علمها بالموضوع ،،،،،،،،،،،،،،،،،،،،،،،،،،،،،،،،،، بعد يومين خذت حاجاتها ، بتجلس فبيت امها الى نهاية العام الدراسي ، خصوصا بعد مابلغتها شيماء عن القرار اللي وصل المدرسه بخصوص رجوع دانه دخلت بيت امها بضيقه ، لقت اخوانها يشوفون التلفزيون ،، سلمت عليهم بشكل سريع ، واتجهت لأمها بغرفتها بدون مقدمات : ممكن اعرف آخرتها استغربت حضور دانه بالطريقه ذي : منتي مسلمه علي تسلم على امها بكره : لي متى وانتي تخيطين وانا البس ؟؟؟ موضي : انتي عارفه ظروفنا ، والرجال جزاه الله خير وافق يتزوجتس ، عشان يقطع كلام الناس عنا ويكون مع اخوانه بظروفهم الصعبه دانه باستهزاء :الله يجزاه خير ويكثر من امثاله ، لكن انا ، ممكن اعرف وش ذنبي انتي شايفه بعينتس اخوان عبدالعزيز ومشاكلهم على حلالهم اللي يطالبونه فيه ،،، وش تبينا نسوي لي طلعونا من بيتنا وباعوه تحاول تقنعها : ولا تنسين شيماء ، وزميلاتس بالمدرسه ،وش بيكون ردتس لهم وهم ينتظرون خبر ملكتس بدت عيونها تمتلي بالدموع : وش آخر الملكه ؟ بيتزوجني ولا بنملك لحد ماعمر يكبر ويتصرف بتس وبخواته موضي : مثل ما انتي عارفه التوكيل يبيله وقت ، وان خلص ان شاء الله بيطلقتس ، من غير زواج بكت بحرقه : والناس اللي خايفه من كلامهم الحين ، منتي خايفه من كلامهم وبنتس مطلقه على الملكه ، وش بيقولون عني ، خافي الله فيني عمرتس ما حسستيني انتس امي ، ،،،،، حملتيني غلطة طلاقتس من ابوي ،،،،،، وتحملتيني مشاكتس مع منيره ،،،،،،،،،،،، والحين بتحمليني غلطة عبدالعزيز وولده حرام عليتس ، كافي ، ماعاد فيني اشيل ظروفي وظروف غيري موضي تجلس بقلة حيله ودموعها تنزل بغزاره بخنقه : هو قالي انه كلم ابوتس ووافق ، والرجال الله يجزاه خير قال انه ما راح يملك الا بموافقتس انتي دانه : قوليله ماوافقت موضي : الرجال يبي مصلحتنا ، والدليل انه وقف بوجه خالته يوم رفضت تزوجه من طرف عبدالعزيز تلتفت لأمها : يبي مصلحة نفسه و اخوانه ، مو مصلحتنا كلنا موضي : مصلحة اخوانتس ومصلحتنا وحده دانه : لا ، انتي اللي مصلحتس ومصلحة اخواني وحده ، لكن انا الأداه اللي بتستعملونها لغرضكم ،، وان خلصتم مني بترموني على جنب موضي استسلمت لقرار بنتها : اليوم بكلمه انتس رفضتي الموضوع وما كنه شي صار تناظر امها وهي تبكي : اتمنى بالمشاكل الجايه تتركيني بحالي ، ولا تعتبريني حل لكم موضي ساكته ودموعها بعينها من غلب الموقف وقلة حيلتها : خلاص ارتاحي وانا بكلمه بكل شي بعد المغرب ، بنفس اليوم ، طلبت متعب على الجوال انا مو على كيفتس انتي وياها ، مره تقنعيني اتزوجها ومره تقنعيني اتركها ،، انا واجهت صعوبه على مااقنعت اهلي ، والحين بكل بساطه تقولين بنتي ماتبي موضي نفسيتها بدت تنهار ، انا خلصت من كل شي ، اخذ اخوانك وحل امورهم بعيد عني خلاص ماعدت اعرف افكر بمن واترك من كلمها بعصبيه : لافي عطاني كلمه و نهاية الاسبوع بروح املك ، ان وافقت البنت وان ماوافقت موضي حست انها حرب جديده بينها وبين بنتها متعب : انتي اللي تكلمتي وخليتيني بموقف صعب ، تحملي النتيجه وكلمي البنت مره ثانيه ، ،،،،، لتس مني اسبوع لحد ما اخلص الموافقه الرسميه من دوامي ،، وبعد كذا بيتم كل شي حتى لو ما اقتنعت البنت |
،،،،،،،،،،،،،،،،،،،،،،،،،،،،،،،، عبدالرحمن : كلمي حصه تجي ، ماراح نملك الا بوجودها سلوى : كلمتها ، بتكون هنا اليومين الجايه عبدالرحمن : وينه عريسنا ، ماعاد يشاف ام خالد تبتسم : الله يعين شيماء عليه ، بيتركها ويقابل الطيور عبدالرحمن : هههههه باتسر بتعلمه يترك الطيور ويقابلها بعد نص ساعه والكلام يجر بعض ام خالد : وش صار بموضوع متعب عبدالرحمن : كلمنا سلمان ، ماكان بيوافق لولا متعب قاله انه يبي البنت ام خالد : قلبي ناغزني ، احس متعب يلعب علي وبيتزوج البنت بعد الملكه عبدالرحمن : ان تزوجها ، خير وبركه ، على سنة الله ورسوله ام خالد بغضب : وشو ؟؟؟ يتزوج بنت زوجة عبدالعزيز ، اللي قهرني انا واختي طول عمرنا عبدالرحمن يتهرب من عصبية سلوى : يابنت الحلال امزح معتس ، هو اصلا مايبيها ولا فكر حتى يتزوج ارتاحت ام خالد : متى بيملك ابو خالد : هاليومين ان شاء الله ، بنخلص من نايف وعقب نشوف متعب بخلي عشاهم بيوم واحد ام خالد : الله يوفق نايف ، ويفك متعب من هالبليه وافرح فيه بالبنت اللي تستاهله ،،،،،،،،،،،،،،،،،،،،،،،،،،،،،،، مرت خمس ايام ، وموضي يوميا تكلم دانه عن اوضاعم السيئه ، وانها راح تسوي فيهم معروف لو وافقت دخلت عليها للمره الأخيره وهي بفراشها بتنام موضي : مانمتي دانه بكسل : كنت بنام موضي : وش عندتس بتنامين بدري دانه : شيماء قالتلي انه وصلهم تقرير عني وبداوم باتسر موضي : كنت بقولتس ،،، تحط الظرف على الكوميدينو ،،، ذي اوراقتس ، خوذيها معتس ،، جابها متعب دانه : اشوف متعب مهتم للموضوع موضي : ابوتس مكلمه عليتس ، وهو ماقصر كلم ناس واهتموا بالموضوع غرقت بالتفكير ، مره تفكر بأبوها ومصالحه اللي يبيها منها ، ومره تفكر بأمها واستغلالها لبنتها والسبب خوفها ان متعب يتركهم بمصيبتهم ويتبهذلون مغمضه عيونها وهي على فراشها : قلتيله اني رفضت موضي : ايه دانه بلامبالاه : ياليت يبتعد عن ابوي ، قربه منه ماراح ينفع موضي خايفه لاتقولها عن قرار متعب وفكرت تشوف ردت فعل بنتها قالت بتردد : ابوتس عطاه كلمه ، وخوفي يرجع له ويتم كل شي وانا مدري فزت من مكانها : فهميه لا يرجع لأبوي دام انه عرف رفضي ، وبكذا ماراح يتم شي موضي : لكن الرجال كلم اهله ، والحين صعبه يرجع يقولهم ماراح اتزوج بعصبيتها اللي اعتادتها مع امها : مالي دخل باهله ، محد قالكم تتخذون قرارات تخصني ومن غير علمي موضي : ان شالله ان شالله ،،، انتي بس ارتاحي لتس وقت وانتي حالتس مايسر احد دانه بغضب : اكيد حالي ماراح يسر احد وانتي وراي موضي بحزن: ياميمتس انتي كبيره بتعرفين تشوفين امورتس ،، لكن اخوانتس صغار يبيلهم رجال يشوف امورهم مابيدي شي ربي شاهد اني عارفه انها ذنوبي اللي خلتنا كذا استمرت موضي بنفس كلامها اليومي لدانه ، وبعد اكثر من ساعه قررت دانه توافق بعد الحاح امها المستمر حست انها قست على امها ، وانها الشخص الوحيد اللي ممكن تساعدهم بأزمتهم دانه : طيب ، بوافق لكن بشرط موضي بفرح : اللي تبينه يجيتس دانه : دام الرجال بيطلقني على الورق ، ما ابيه يعرف اي شي عن ظروفي الصحيه موضي : ولا يهمتس مو بعارف شي ، واكيد لافي ماراح يقول شي الا ان طلبتي منه ضمت بنتها : الله يسعدتس يابنتي ويقدرني افرحتس مثل مافرحتيني بخلاص الهم اللي على قلبي و راحت باستعجال بتزف الخبر لمتعب جلست دانه وهي تتكبد القهر على حالها المر ،،،،،،،،،،،،،،،،،،،،،،،،،،،،،،، ثاني يوم : استعدت للمدرسه وهي غايبه عنهم اكثر من شهرين دخلت عليهم وكانت مفاجأه للبنات وكلهم بصوت واحد : دانه ، حمدالله على السلامه قاموا يسلمون عليها بحراره ، ويسألون عن سبب غيابها المفاجئ دانه بابتسامه : حصلت ظروف بالبيت منعتني نوره : وصلنا خبر عن عبدالعزيز ، مأجورين ان شاء الله عبير : الله يشفيه ، والله حزنا عليه مسكين بعد ماتكلمو بمواضيع مختلفه ، اللي تقول نحفانه ، واللي تقول ، تغيرتي كثير ،،، ومن هالأحاديث الخفيفه شيماء ابتسمت لدانه : بنات بقولكم خبر حلو البنات بفضول : وشو دانه كساها الخجل رغم معرفتها بحقيقة الوضع شيماء : انا ودانه بنكون فبيت واحد نوره : لغز ولا وشو ههههههههه شيماء : هههههههههه ياذكيه ، بتتزوج ولد عم وخالة زوجي ، وبنكون فبيت واحد البنات بفرح : مبروووووك ، من جد فرحتينا ، تستاهلي كل خير صارت دانه حديث المعلمات في كل اقسام المدرسه الكل يباركلها ، ومبسوط بالخبر ويتمنون لها السعاده ، واضطرت انها تبادلهم احساس الفرح ،،،،،،،،،،،،،،،،،،،،،،،،،،،، وهو جالس على مكتبه بكل وقار ابتسم لصوت دقات الباب وهو عارف ان متعب اللي ورى الباب دخل متعب وبابتسامه غير كل مره (كانت شبه تمثيليه حتى ابوه مايشك بالوضع ) عطاه تحيه عسكريه اللي عود ابوه عليها اذا بيبشره بخبر يسعده ، سلمان يبتسم وفجاه ضحك وهو يحس دخلت متعب غير عن كل مره توجهله وهو يضمه بحنان الأبوه سلمان : اليوم قلبي يقول انك بتفرحني بخبر متعب بابتسامه جذابه : اليوم بنروح نملك سلمان اللي حس ان العبره خنقته وحس انه فعلا ابو متعب ضمه بفرح وحنان ابشر ياولدي بس خلنا نخطب اول ههههههههههه متعب بأبتسامه : انا كلمت الرجال وهو موافق واليوم بنملك سلمان بمزح : هي البنت اللي قلتها ولا غيرها هههههههه متعب بابتسامه : ايه بنت لافي سلمان : ههههههههه القلب ومايهوى ، مصر انك تاخذها رغم رفض خالتك " اللي مخلي متعب متطمن للموضوع ومرتاح ،،، هو معرفته ان البنت وافقت بقناعه وبكذا مايكون ظلمها معه ،،،،،،،،،،،،،،،،،،،،،،،،،،،،،،،،،،،، في بيت ابو صالح سمعوا طق الباب وكل وحده تقول للثانيه انتي قومي افتحي فتحت نوره الباب بستايلها المقزز وكشتها الطايره متعب ناظرها بقرف وين ابوتس نوره بلقافه : يبه يبه رجال يبيك سلمان بوقاره وهدوءه ابتسم لمتعب وقال الصغار فيهم براءه مهما كان شكلهم متعب بابتسامه نص كم يجاري فيها ابوه اييييه اكيد خاصه البنت ذي براءتها ما مرت علي طول عمري ههههههههه ابو صالح هلا يالله حيهم يالله حيهم اقلط اقلط دخل سلمان وابو خالد ومتعب ،،،، ضيفهم ابو صالح بالمجلس قام بصوت عالي القهوه ياولد دقايق والقهوه واصله وهو يقهوي سلمان ومتعب والكشره من الأذن للأذن متعب بينه وبين نفسه " مو منك كل هالكشره من الفلوس اللي جمعتها مني ابو صالح وهو يناظرهم يالله حيهم وش الساعه المباركه سلمان بكل هدوؤ : والله يا بو صالح يشرفنا انا نناسبكم وحنا جايين نبي القرب لولدنا من بناتك الكريمات بعد ماتم الكلام بخصوص الملكه والامور اللي بينهم واتفق معهم لافي على شروط عاداتهم وتقاليدهم ان زوجها مايشوفها الا وقت الزواج ، والملكه تقتصر على الرجال فقط وافق ابو متعب وابو خالد ، احتراما لعاداتهم وتقاليدهم لافي ببلاهته المعتاده : في مهر ولا على وقت الزواج بترسلونه متعب مخنوق من الضحك :هههههههه اكييييييييييييييييييد افا عليك اللي تبيه لك ، قبل الزواج بوقت بأجيب المهر انا بنفسي لافي رجعت كشرته المعهوده وقال تم ، والله يكتب اللي فيه النصيب بعد ماملك سلم على لافي وقام بيسلم على ابوه ، سلمان ماقدر يمنع دمعه نزلت غصب عنه متعب يضم ابوه وبينه وبين نفسه حس بضيقه " والله ماتستاهل اني اخدعك بموضوع زواجي سلمان : الله يبلغني الوقت اللي اشوف عيالك متعب : لك طولة العمر وتشوفهم وانت بعافيتك عبدالرحمن يسلم على متعب ويباركله : الف مبروك ياولدي متعب : الله يبارك فيك ،،، اتفقوا مع لافي انهم بيرجعون بوقت ثاني يناقشون فيه ترتيبات الزواج وتوجهوا لسيارتهم والكل مبسوط لسلمان اللي كان اسعد واحد بالموضوع |
البارت التاسع عشر مر اسبوعين على ملكة نايف ومتعب ،،،،، حصه لها يومين عند ام خالد ، تساعدها بترتيبات العشاء الخاص بملكة نايف ومتعب نوف تكلم خالتها : خالتي ماشفنا زوجة متعب ؟ ام خالد تخفي توترها بحكم سرية الموضوع : كيف ماشفناها ؟ الا شفناها ، ماتتذكرين اللي طلبتنا بمدرسة شهد نوف : اييييييييييييييه ، الدنيا صغيره ، ما كانت عارفه انتس بتكونين ام زوجها ام خالد بتصنع : ههههههه صدقتي محد يعرف وش مكتوب له نوف : الله يوفقهم يارب ، ومتى الزواج ام خالد ، زواج نايف بيكون نهاية الأجازه ،اما زواج متعب مافكرت فيه ، هو يقول اجلوا الموضوع نوف : ليه يأجله ؟ عمره راح وهو ماتزوج ،،،،،،،،،، خليهم بيوم واحد ، بيكون زواجهم مميز ام خالد : وقتها بفكر ، واكلم متعب بالموضوع دخلت عليهم حصه : صحيح انا ماشفت زوجة متعب ام خالد : ههههههه صح النوم حصه : ههههههههههه من جد ماشفتها ، وش رايتس نزورهم ام خالد : بتشوفونها يوم الزواج ، البنت اهلها عاداتهم غير عنا ولا يحبون الزيارات اللي كذا حصه : وشو ؟؟، البنت صارت بنتنا ومن حقنا نزورها بغض النظر عن عاداتهم ، وش الغلط بكذا ام خالد بنرفزه : خلاص كلمي متعب وروحي معه حصه : وانتي ونوف ؟ نوف : صح خالتي لازم نزورها ونسلم عليها وعلى اهلها ام خالد : انا شفتها وخلاص ، وانتو سوو اللي تبونه قامت ام خالد وتركت حصه ونوف بحيره من تصرفها وعدم اهتمامها لزواج متعب ،،،،،،،،،،،،،،،،،،،،،،،،،،،،،، على رجعتها من المدرسه حست بحركه غريبه بالبيت ، اتجهت لمصدر الصوت موضي : كلمي شاهر يجي دانه : وش فيه موضي : شكلها ازمة القلب رجعتله ، كلمي شاهر بسرعه دانه مستعجله : طيب طيب دخل شاهر يحاول يشل عبدالعزيز للسياره ، لكن وضعه مايسمح موضي بقلق تكلم متعب على الجوال وتستعجل حضوره ،،،،،،،،،،،،،،،،،، و دانه تحاول تهدي اخوانها من خوفهم على ابوهم بعد ربع ساعه وصل متعب ، وبشكل سريع شال عبدالعزيز هو وشاهر ودخلوه السياره خذت عباتها بسرعه وطلعت معهم متعب : وين طالعه ، خليتس مع الصغار موضي بخوف : ماراح ارتاح لين اتطمن عليه متعب : لاتشغليني ، انا معه خلاص موضي : خلني اتطمن عليه متعب بغضب : اقول خليتس مع الصغار ، لاتتركينهم بلحالهم جلست موضي بمكانها وهي بقمة خوفها دانه تستغرب انصياع امها لأوامر متعب ، وهي من عادتها تحب القياديه على الكل ، ولا تسمح لأي مخلوق انه يمشي رايه عليها ردت على جوالها بسرعه بعد ماعرفت انه متعب متعب : الحمدلله وضعه استقر ، ماعليه الا العافيه ، بيراقبون حالته كم يوم وان شاء الله بيتحسن اكثر موضي رجعت روحها : اقدر اشوفه متعب مقدر حالتها النفسيه : صدقيني مافيه شي ، خليتس مع الصغار موضي بلهفه : الصغار معهم اختهم ، ماعليهم خوف ،،،، بجي مع شاهر متعب : انا باخذتس له الصبح ، بيكون وضعه تحسن اكثر بدت شهقاتها تطلع متعب : لو فيه شي بقولتس ، لاتخافين عليه ، بجلس معه للصبح سكتت موضي وتقبلت الوضع اليوم الثاني بوقت مبكر دخل البيت بتعب وكسل ، الكل عينه عليه يحاولون يلتمسون بشارات الخير من نظراته عيونه حمراء ووجهه ذبلان دليل التعب وقلة النوم ،،،، نزل مفاتيحه وجواله على الكرسي وجلس بكسل ابتسم لعمر وفتح له ذراعه ،،،،،،،،، جاه بكل خوف وجلس بحضنه موضي : وش يقول الدكتور متعب : انسداد بالصمام ، يحتاج عمليه بسيطه لكن ينتظرون وضعه يستقر اكثر ويرتاح موضي : يعني بيتحسن يحاول يطمنها : ان شاء الله ، بيتحسن ، ولو حالته استدعت اني اعالجه برا ، ان شاء الله ماراح يجي مني قصور ، اهم شي لاتخوفين الصغار عليه موضي تبكي : الله يشفيه متعب : ان شاء الله بيكون بأحسن حال ،،،،، يعطيها المفتاح ، خلي الشغاله توصله لشاهر عشان يوصلهم مدارسهم يتلفت بالمكان : وينهم ؟ ما اشوفهمجاهزين للمدرسه موضي : لا مو رايحين اليوم متعب باستنكار : ليه وش اللي يمنعهم موضي : روان وبيان مانامو كويس ، بخليهم يجلسون اليوم يقوم بيطلع لبيته عشان يتجهز للدوام قالها بتردد : بنتس بتطلع المدرسه ولالا موضي : ايوه ، الحين بتكون جاهزه متعب : من بيوصلها موضي : شاهر بيوصلها وهو ماشي : خليتس معها ، لاتتركينها مع السواق بلحالها موضي بغيض من اوامره المستمره : طيب ، بكون معها ،،،،،،،،،،،،،،،،،،،،،،،،،،، بعد العصر موضي مبسوطه لأن الدكتور سمح لعبدالعزيز بالأكل ، وصارت تجهز له الشوربه والحاجات اللي يحبها موضي : روان ، يالله اجهزي انتي وعمر روان طايره من الفرحه : ان شاء الله يمه دانه بغرفتها لبست تنوره بيضاء وبلوزه ماسكه على الجسم بأكمام طويله ، الوانها فاتحه ، بين الوردي والأصفر رتبت شعرها بشكل انيق ، تزينت بمكياج بسيط يناسب ملامحها وقلوس وردي بعد ماخلصت ، رتبت شعر بيان ولبستها برمودا بني فيه نقوش ورديه وبدي ربع كم وردي وصندل بني دانه بتحذير : بيونه لاتكلمين احد عن متعب بيان : لا ما اكلمهم دانه : طيب وان نسيتي وقلتيلهم بيان تأشر بالنفي : ما انسى دانه تبتسم لها وتحبها : شطوره حبيبتي خذت شنطتها ولبست عباتها وغطاها ونزلت لأمها ، ،،،، موضي : روحو ذلحين قبل متعب يجي دانه تضحك من قلبها : ههههههههههههههههههههه موضي : وش اللي يضحك دانه : ههههههههه لي زمان ماضحكت كذا موضي ابتسمت : طيب ضحكيني معتس دانه تحاول تكتم ضحكتها ، اضحك على خوفتس من متعب ، محد عرف لتس غيره موضي ارتبكت : اقول روحي بس دانه : ههههههه ، يالله بيونه موضي : لا تتأخرون دانه تلتفت بمرح : خايفه علينا ولا من متعب ابتسمت موضي على نفسية بنتها اللي تحسنت وبدت ترجع ضحكاتها مثل اول ،،،،،،،،،،،،،،،،،،،،،،،،،،،،،،، عمر : ماما متعب جاء موضي تغطت بسرعه وخذت الحاجات اللي جهزتها وطلعت لمتعب ومعها روان وعمر بالسياره يناظر المرايه بيشوف الموجودين : ما اشوف بيان موضي نشف دمها من الخوف : مو رايحه استغرب : وليه مو رايحه ؟ ماتبي تشوف ابوها موضي : ان تلاقت هي وعمر بيسببون ازعاج ، بخليها تزوره وقت ثاني متعب : البنات لاتتركينهم بالبيت بلحالهم ، انزلي هاتيهم ولا اجلسي معهم روان بلقافه : اصلا هم مو هنا راحوا لبيت شيماء متعب : بيت شيماء ؟ مع من موضي انخنقت وحست انها تتمنى تكسر راس روان : كلمت شاهر يوصلهم ويرجع بسرعه متعب : كم مره نبهت على شاهر مايحرك السياره الا يقولي وين طالع شكلي بشوف سواق غيره موضي بدت تتوتر : انا اللي جبرته ، هو مسكين ماكان بيوصلهم متعب بدى صوته يرتفع : وانتي ماتعرفين تحكمين بنتس وتمنعينها موضي بهدوء : زميلتها عزمتها ، واضطريت اوافق متعب : بنتس يبيلها عقال يكسر ظهرها ، هي عارفه موقفي من السواق ، وشو له العناد شغل السياره واتجهوا للمستشفى ، وقلبه منقبض من تصرفات دانه ،،،،،،،،،،،،،،،،،،،،،،،،،،،،،، بالأستراحه ، جالس مع خوياه ، باله مشغول ومقهور من شاهر اللي خالف اوامره وليد كان جالس بقرب متعب : وين وصلت انتبهله وابتسم بشكل سريع يحاول يغير تفكير وليد : افكر اغير سيارتي ، ،،،،،،، محتار مدري وش آخذ دخلو بمواضيع السيارات والمعارض ، ومتعب ياخذ ويعطي معه بملل وليد يضحك بشكل مفاجئ : هههههههههههههههههههه من اللي ضحك عليك وقالك ان موضوع السياره دخل مزاجي حس انه ارتبك : انا بمشي ، عندي شغل وليد مستمر بالضحك : اوكي ، بسامحك اليوم ، لكن باتسر بعرف منك وش اللي ماخذ عقلك خذ مفاتيحه من الأرض وهو يقوم قال لوليد : بغير سيارتي عشان تصدق وليد : هههههههههه خلاص صدقتك لاتغيرها ودعه بابتسامه وكأنه يقوله ، اللي فبالك صحيح ،،،،،،،،،،،،،،،،،،،،،،، |
بعد ماسلمت على ام ابراهيم وجلست معها شوي ، خذتها شيماء لغرفتها حتى ياخذون راحتهم دانه شالت عبايتها وغطاها شيماء تناظر دانه بإنبهار : ماشاءالله ، تغيرتي وصرتي احلى من اول دانه تبتسم بخجل شيماء تغمز لدانه : لو متعب شافتس بيستعجل الزواج تلخبطت من سيرة متعب ، وهي بتناقض بين الحقد اللي تكنه له وبين الخجل من كلام شيماء شيماء : هههههههههههههههه خليتس دوم خجلانه ، شكلتس احلى كذا تطلع لسانها بمزح : انا حلوه بكل حالاتي شيماء : ههههههههههه ومن اللي قال غير كذا تبادلو الاحاديث ومنها تخطيط شيماء لتجهيزات الزواج وغيرها ،،، تناظر ساعتها : سرقنا الوقت ، انا لازم ارجع البيت شيماء : بدري ؟ ليش مستعجله ، ما تعشينا دانه : خليها وقت ثاني ، امي محتاجه السواق وقالتلي لا اتأخر شيماء بأسى : طيب ماراح اعتبرها زياره ، المره الجايه بتتعشين معي تبتسم : ان شاء الله ،،،،،،،،،،،،،،،،،،،،، بعد صلاة العشاء ، استئذنه شاهر بأنه يروح لدانه فبيت شيماء ، خصوصا بعد ما متعب هزأه وهدده بالعقاب ، لو راح مكان من غير لا يستئذنه استغل عدم وجود موضي وجلس ينتظرهم بحديقة البيت دخلت ومعها بيان ، ماتوقعت وجود متعب بحديقة البيت ،،،،،،،،،،،، حاولت تدخل بسرعه متعب بهدوء : وين كنتي كملت طريقها تتحاشى الكلام معه ارتفع صوته : ان كلمتس توقفين وتكلميني التفتت له : نعم ممكن اعرف وين كنتي دانه بثقه : ممكن اعرف من حضرتك عشان تسألني ماعجبه اسلوبها ، خصوصا انه ماتعود احديكلمه بطريقتها السواق مايطلع مشوار غير المدارس والكلام ذا عدته اكثر من مره ، واعتقد انتس سمعتي رايي بالموضوع دانه : ممكن اعرف السبب متعب : مطلوب منتس تنفذين الأمر ، من غير لاتعرفين الاسباب دانه بملل : و الأمر ذا ، لي انا ؟؟؟ متعب : لتس ولغيرتس دانه : امرك على زوجة ابوك واخوانك رفع حواجبه مستغرب جرأتها بالرد عليه : وعليتس بعد بيان تحاول تتخبى وراء دانه من الخوف اللي تعودوه من متعب ، بالفتره الأخيره دانه : لايكون صدقت انك زوجي انقهر من اسلوبها وبيحسسها بعدم اهتمامه لها : انا مسؤول عن اللي بالبيت ، وانتي منهم وعشان ترتاحين ما تهمني طلعاتس من البيت ، ولايهمني المكان اللي تكونين فيه ،،،،، اللي يهمني السواق يكون هنا ولا يتحرك الا بموافقتي دانه بعناد : طيب مو مشكله ، لو احتجت مشوار بكلم ليموزين احسن ماتوقع ردها بيكون كذا ،،،،، ابتسم لاشعورياً لذكائها وكأنها فهمت قصده وحبت تغيضه انحرجت من ابتسامته : خلصت كلامك ؟؟؟؟ اقدر ادخل البيت ولا فيه اوامر ثانيه وهو بنفس ابتسامته ، اشر لباب البيت : تفضلي مشت بسرعه واحساسها بقمة الخوف من تجرأها بالكلام معه ، وكلها قلق من ابتسامته اللي كان يخبي فيها كلام كثير وقف بمكانه وهو يراقب دخولها للبيت وكان متأكد انها كانت تحاول تحسسه بعدم اهتمامها لأوامره ،، لكن بالواقع كانت في قمة الخوف وذا اللي ترك ابتسامته تاخذ وقت طويل على شفايفه ،،،،،،،،،،،،،،،،،،،،،،،،، |
| الساعة الآن 11:32 AM بتوقيت مسقط |
Powered by vBulletin® Copyright ©2000 - 2025, Jelsoft Enterprises Ltd.
Search Engine Optimization by vBSEO 3.6.0 Designed & TranZ By
Almuhajir