ساعتي البيولوجية في النوم خاصة مقلوبة!
 

السلام عليكم

امس كنت في انتداب للعمل في مدينه اخرى نمت بعد شروق الشمس وقمت الساعه 9 صباحاً عشان اخلص بعض امور العمل طبعا وضعت المنبه على الساعه 9 عشان ما اتأخر وقويت نفسي وقمت .. المهم خلصت الساعه 2 الظهر واضطريت اني اقبل عزيمة على الغدا لاحد الزملاء وانا تعبان فيني نوم قوي وخمول لاني ما اخذت كفايتي من النوم !
اضطريت اني ارجع الساعه 10 بالليل وقلت فرصه اعدل النوم انام الحين واقوم الفجر ياسلام ! ونمت الساعه تقريبا 11 وفجأة ! القى نفسي صاحي الساعه 1:30 شبعان نوم ! احاول اتقلب يمين يسار مافيه فايده المشكله وراي خط !

نبذة قصيرة عن محدثكم

18 سنه من السهر بالليل والنوم بالنهار من ايام الجامعه
معروف عني كثر النوم حيث ان متوسط نومي 12 ساعه يوميا ! طبعا نوم بعد الفجر واصحى العصر ولو ماقومثي احد ممكن امغطها للمغرب ..الخ واذا بالعمل انام بالعمل او استأذن ..

يبدو لي ان عقلي ماستوعب اني ابي اعدل نومي وان الساعه البيولوجيه يبي من يوديها للحميضي يحط لها خابور ولا يشوف لها حل

ياجماعه اكلمكم الان وانا مانمت الا ساعتين ونصف فقط وش الي حاصل ؟

كيف اعدل ساعتي الداخليه يمينا بالله كرهت حياتي وتعطلت مصالحي بسبب كثر النوم بالنهار والسهر