تكفون،، من يساعدني في امر بالعلاج لولدي في الخارج
 

السلام عليكم ورحمة الله ،،
موضوعي باختصار :: انه عندي ولدي له مايقارب 15 سنة عنده مشكلة في رجله اليمين عبارة عن اوعية دموية زايدة ( عيب خلقي) الولد مرّ على كل التخصصات تقريباً الاطفال واعصاب الاطفال والنفسية والعظام وفي الاخير استقر الموضوع في عيادة الاوعية الدموية ، كل هذا طبعاً بالمستشفى الجامعي في جدة ،، المهم الدكاترة ماقدروا ياخذون قرار حاسم في الموضوع ،
قدمت على الديوان الملكي رجعوا المعاملة للهيئة الطبية في جدة ،، ولما شافو التقرير قالوا انت مازلت تتعالج في المستشفى الجامعي ، قلتهم 15 سنة ماشفت منهم فايدة ،، المهم حولوني على المستشفى التخصصي في جدة بدوا معانا متحمسين وفي الاخير قالوا روحوا خلاص وحنا بنتصل فيكم بعد ماندرس الموضوع ،، ولهم الان كم شهر ما اتصلوا ولاشي ،،
وفي نفس الوقت حسيت انه هذه المستشفيات ما يبغون يكتبون تقرير انه ( لايوجد علاج ونوصي بعلاجه في الخارج) ،
وفي نفس الوقت ما يقولون ماعندنا علاج ،،
بس كل مرة يقولون خذ موعد وتعال بعد ستة شهور ونشوف الوضع ،، والولد تعب وصار يشتكي كثير من الالم ،،
وبرضه جبنا شيخ يقرأ عليه وماشي على زيت مقري ورقية شرعية يومياً ومافيه فايدة ،،
تكفون ياجماعة اللي يعرف لي طريق احصل فيه على علاج للولد في الخارج ،، عز الله بتدعي له كل العايلة ان الله يوفقه ويبارك له في كل مايملك من مال وولد ،،
تكفون شوروا علي ياجماعة تعب هالولد وتعبنا معاه والمستشفيات تعبتنا اكثر واكثر ،،
وجزاكم الله خير ،،