قصيدة تطوير الذات بدون دورات !!!
 

قصيدة تطوير الذات بدون دورات !!!

كتبها الشاعر !! محمد الجذع
➖➖➖➖➖➖➖➖➖➖

يامطورين الذات بحثاً عن الذات..
انا بعد طورت ذاتي بذاتي

لأنني غيرت روتين الاوقات
ولها السبب قدرت اغير حياتي

ماعاد افكر بالسنين القديمات
ولا اشيل هم سنيني المقبلاتي

اللي مضى ماهوب راجع بعد فات..
والجاي يمكن قبله الموت ياتي..!!

يعني أعيش اليوم واليوم ساعات
واللي يبي الراحة يسوي سواتي

العمر رحلة والليالي محطات
والموت رمحه مثل رمح الزناتي

أثري من اول عايشٍ في متاهات
ومقزرن عمري على ذكرياتي

لكن بلا تعقيد.. واحزان وآهات
قررت الملم ما بقى من شتاتي

وعملت في نفسي شوية اصلاحات
واصلاحي لنفسي على النحو الآتي :

بنيت في صدري مساجد وروضات..
وقمت اتهجد يوم غيري يباتي


سويت فلتر للهواجيس بالذات
والحزن داخل سلة المهملاتي

ورتبت بالترتيب بعض الملفات
وحطيت بالرف القريب امنياتي

وركزت في وقتي على الاولويات
والأول الأهم ... عندي صلاتي

واثنين بالإثنين برٍ ومرضاة
بابوي وامي سلوتي مع غناتي

والثالث الإحسان مع المساواة
لعيالي الغالين وايا بناتي

والرابع امشي ماحسبت المسافات
لان السفر يرسم لي اجمل صفاتي

وخمسة حرمت الذات بعض الملذات
والإتزان أصبح سمة من سماتي

والحمد لله عايشٍ في سهالات
متريحٍ بالي... ولا عاد احاتي

يعني كذا ماني بحاجة لدورات
في عقلي الباطن أو إيحاء ذاتي

أنا فقط محتاج رب السموات
يغفر ذنوبي.. قبل ساعة وفاتي