|
أخوي أزعجني و تورطت "بناء" https://upload.hawamer.com/d.php?has...UUE66B3BMHNO8M السلام عليكم و رحمة الله شور علي او أنصحوني او شوفو لي حل يالربع الله يرضى عليكم... الموضوع بأختصار أخوي بداء يبني بيته في المنطقة اللي أنا ساكن فيها و هو موظف بمدينة ثانية و بالبداية لمح لي أنه متورط كيف يبني و هو في مدينة ثانية و العمال يبغى لهم متابعة ووو قلت أبداً ارقد و آمن حلالي و حلالك واحد اتابعها كأنه بيتي و الحقيقة أني مهتم فيه أكثر من لو أنه بيتي علشان ما ابغى أقصر مع أخوي الكبير. كنت أتوقع البناء بيأخذ 6 شهور عظم و بعدها 6 شهور تشطيب قلت سنة من عمري اهديها لأخوي....لكن الان لي سنة و نص و أنا لا ليلي ليل و لا نهاري نهار في هذا البيت تعبت و ضاع وقتي و جهدي و أهملت بيتي و عيالي و حتى دوامي تأثر من كثر ما إستأذن و من كثر الأتصالات و التفكير بهذا البيت. أنا تعبت تعبت تعبت و أخوي مروق رجل على رجل و يمرني كل اسبوعين او ثلاثة و يعطيني من هذه الملاحظات و هو ما عنده سالفة بالبناء ليش ما سويتم كذا و ليش كذا و ابغى أعدل الشي الفلاني و ابغى أغير تصميم البيت وووو راعي طويلة لانه مو مستعجل على البيت أنه يخلص مع أن الفلوس جاهزة عنده لكن مرتاح الرجال و جالس يتفنن على راسي ؟ الان لنا سنة و نص و الشغل متواصل و تونا خلصنا اللياسة مع أنه ما وقفنا ولا يوم !!! و تعرفون كثر التعديل بالبناء و كل يوم عنده رأي جديد هد هذا الجدار و سوي واحد جديد والتغيير يتعب و يحتاج مراقبه و العمال تطلب فلوس أكثر و إذا أتفقت مع عمال قال لا غالي روح دور تحصل أرخص.... هذا غير الصبة اللي يطلب مني أكون مع المقاول وقت الصب و أكون هناك من 5 الفجر و ثم بعدها أروح للدوام ووووو تعبت و هلكت... والله العظيم لو هو بيتي ما تعبت كل هالتعب و كان يمديني أكمل الشغل أي كلام بس علشان ارتاح من هالعناء أخوي الكبير و ودي أخدمه لكن تعبت أهملت بيتي و عيال و تعبت و هو مروق ببيته و مع عياله و يسافر أجازات... واللي يضايق بعد لا شكر و لا يذكر لي جميل... (فقط الله يعطيك العافية و تحملني) طبعاً ما ابغى منه و لا ريال لكن المفروض عرض علي "صحيح راح أرفض" لكن أقل شي يحسسني أنه عارف أن الشغله متعبه... المشكلة الثانية كم مرة قدامي بالمجالس عند الرجال يقول والله ما ادري ليش الناس تقول البناء صعب بالعكس سهل بس أهم شي تتابع العمال. طبعاً انا ما قلت له ولا كلمة علشان ما يحس أنه جالس امن عليه لكن والله أحس أني بديت أكرهه و ما بالقوة أتحامل على نفسي و أكلمه بالجوال... اللي غثني اليوم بعد ما انتهت اللياسة يبغى يعدل جدار حمام و هذا يعني عمال تهد الجدار أولاً ثم عمال يبنون جدار جديد ثم السباك يجي يغير المواسير ثم يجي المليس يجي مرة ثانية يليس و كل واحد فيهم بيطلب فلوس!!! الموضوع فضفضة و ابغى حل مع العلم أني ما ابغى أنسحب بعد ما كملت نص الطريق... (للتأكيد أخوي مو خبيث أو نذل لكن ما يعرف يتعامل مع الناس و يقدم نفسه على الناس أهم شي نفسه) آسف طولت عليكم لكن والله منغث و تعبت سنة و نص و باقي ممكن سنة قدام كلها راحت من عمري بشقى البناء و بالنهاية مالي شي منها... |
| الساعة الآن 10:23 AM بتوقيت مسقط |
Powered by vBulletin® Copyright ©2000 - 2025, Jelsoft Enterprises Ltd.
Search Engine Optimization by vBSEO 3.6.0 Designed & TranZ By
Almuhajir