طلاق صديقي هل هو على حق
 

السلام عليكم ورحمة الله وبركاته


امس اتصل فيني صديق عزيز وصوته ماعجبني قال ابيك ابي اجلس معاك


رحت له وطلعنا مقهى الرجال واصل حالة اكتئاب حاااااد مو خويي المزوح واللي بس يعلق ويضحك


جلسنا وسألته وش صاير لك وش فيك منفس


قال طلقت امس ومدري وش جاني ضيقة صدر غير طبيعيه


قمت اهدي فيه وان الطلاق مو نهاية العالم لأني شفت حالته ماتسر والله

سألته عن السبب

قال هي تراكمات سنين وزاده تصرفاتها

يقول قبل ثلاثه ايام قالت اخوي بيمرني يوديني السوق وقلت لها ممنوع ماتروحين معه لا سوق ولا غيره تبين السوق انا اوديك بس مسألة تتصلين على اخوك عشان يوديك السوق لا

قلت طيب عادي كان خليتها تروح مع اخوها قال انت ماتعرفهم بيجي في بالهم اني مقصر في حقها وانا قلت لها السوق انا اوديك
اخوك بيجي يتقهوى تعزمينه على غداء على عشاء عادي لكن مسألة ودني السوق ليه وش مقصر فيه انا

المهم قال رجعت البيت حصلت اخوها جالس قامت لبست قالت لأخوها يالله مشينا يقول سكتت ماقدرت امنعها مستحي من اخوها والا هي عارفه رايي في هذا الموضوع

يقول راحت السوق ولا حتى استأذان مني وانا جالس يقول يوم رجعت وانا ارمي عليها الطلاق بالثلاثه

يقول مو هذي المشكلة ماقطع قلبي الا ولدي الصغير سمعني وانا اقولها روحي بلا رجعه وجاني قال يابابا خل ماما ترجع ليه تقولها كذا

بصراحه انا كنت احسبه شي كايد وكنت متعاطف معه لكن يوم سمعت القصة قلبت عليه وشكلي زدت مواجعه