إهدا لمليكي ، عبد الله بن عبد العزيز ال سعود
 

يالله ياربنا الاعلى مليك الملوك=عسى لنا في البخوت الساميات سموه
ياسيدي يا خادم البيتين لا فض فوك=في كلمة عانقت حضر الوطن وبدوه
ولّفت شعبك على حبك وهم والفوك=كلمتك بقلوبهم مسموعةٍ مقروه
يقبّلونك على التلفاز لا شاهدوك=في حب شخصك تهيم وتشتهيك شهوه
شوفت حنان الابوة والحجاج الضحوك=تسوى كنوز الذهب والماس واللؤلؤه
يا مجوّر المستجير و يانقاذ الهلوك=أنا أشهد إن فيك طيب ومرجلة ونخوه
يا ثامن المعجزات ويا حصان رموك=صابت ملوك العرب من فعل يمناك افهوه
القادة اللي يراودها الريا والشكوك=راحت على غرّب خطوب الزمان اثعوه
صارت عليهم تخام الارض دكا دكوك=ولا شماتة لمن صابة من الله ادعوه
وانت طلعت ابياض الوجه مطلع مكوك=وخليتنا بين الاجوا الغايمة بصحوه
الله يطول بقاك ويرحم أمك وأبوك=حبل النقا كل عدٍ يارده برهوه
وانته توليت عرش الملك من ورث أبوك=وابوك بينه ومن بين الملوك انهوه
أسس قبل لاتطول الأرصدة بالبنوك=ام القرى نصب عينه والسلام انحوه
فوق الحراير وفوق ملجمات الحنوك=مسعى ميات السنين يحققه بضحوه
روس السلاطين تحت اجباب سيفه بروك=عند الجمال رغوة والمحصنات انعوه
لا يلتفت للملوك ولا عيال الملوك=يقص راس الملك ويقول صب قهوه
يا سيدي يا خادم البيتين لا فض فوك=واثني التحية على حضر الوطن وبدوه


قصيدة الشاعر بن جدلان