قال لي / الاسهم طيرت علي 30 مليون وقربت انهبل
 

الرجل توه ناقل عندنا وتعرفت عليه وطلعنا مع بعض لكن لاحظت انه مايحب يطلع كثير.المهم دائما اشوفه مسرح او يطقطق بالاله الحاسبه . مسكته في يوم وسألته قال /

انا توظفت عام 1422 تقريبا وبعدها بسنه وشوي اخذت قرض ابي اكشخ بسيارة اخذت 60 الف ريال. وقابلت واحد من الشيبان عند ابوي وقال لي ياولدي خلك من الفشخره ونصيحتي لك حطها بالاسهم ترى المستقبل عليها . يقول اخذت فترة افكر ثم سألت واحد اعرفه في بنك وقال ان الاسهم بدا عليها اقبال وبتصير سوق ضخم. يقول واجلس معه فتره واقعد اطالع بالشركات في اوراق معه والقى اسم شركة (ألمصافي) وسعر السهم كان 600 ريال بس(مستحيل انسى ذيك اللحظه وانا اطلع بالسعر واسم الشركة وانا اضحك واقول وش المصافي؟شركة يقلدون الصافي للالبان.؟)
المهم استخرت واشتريت سيارة ومع الوقت بديت اسمع كلمة الاسهم الاسهم بكل مجلس وبدا سوق الاسهم وعزه. لكن ماكان عندي سيوله كبيرة كنت ادخل شركة والقط لي الفين او الف ثم اطلع وماعمري سألت احد عن توصية لاني كنت احب اكون انطوائي واستحي اسأل احد عن حاجه واطلع قدامه اني مااعرف شي..
.
يعني بشكل عام كنت اسولف مع الناس عن الاسهم لكن مااشتري. ولحد ماجا في يوم واستأذن مني زميلي من الدوام يبي يطلع وقلت رح انا اغطي دوامك. وهو طالع قال اجل خذ هالنصيحه هديه , لاتطوفك المصافي ترى سعرها امس 2200 او 2500 ناسي والله واليوم الاثنين لاتفوتك ... يقول هزيت راسي وقلت خير ان شاءالله وفي يوم االخميس كنت اشيش في مقهى الصباح واقعد اطالع بالاسهم على العربية واشوف سعر المصافي5000 ريال.
يقول اخذت فترة وانا اسمع النصايح لكن مااشتري

_
ملاحظه لازم اسجلها هنا بقصته ( يقول اول ماتوظفت كانو عيال عمي وخالي 5 طالعين عند الاستاد وكلنا متسدحين على الفرشه وجا طاري الراتب حقي ولان بعضهم كان عاطل والثانيين يدرسون قلت لهم راتبي 6 الاف. عاد ذيك اللحظه اقسم بالله العلي العظيم رب الكون ومالك الملك والله والله اني لحظتها حسيت الارض كأنها اهتزت ورجت واحس انه صار شي لكن ماادري وشو . ومن ذيك اللحظه الى اليوم وانا كل يوم في هم وغم ونقص بالفلوس )
_
وكنت اسمع نصايح كثيرة لكن الاكيد منها مازلت اذكرها
المصافي من 600 الى 5500
المتطورة من 700 الى 1700
المواشي بعد الانهيار من 10 الى 50
الاسماك من 49 الى 130
التعمير من 15 الى 32
الصحرا من 27 الى 61
موبايلي من 20 الى 70


كل مره اسمع توصيه من هذولي تدخل راسي لكن ماانفذها لكن مستحيل انسى هالشركات.. والان انا متزوج وعندي بنت والحمدلله عمري 37 تزوجت قبل 5 سنوات (تأخرت بالزواج ماادري وش صار فيني كأني كل هالسنوات فيه غشاوه على عيني . زملائي طورو انفسهم وترقو ومسكو مناصب وانا على حالتي.وكل مالي يزيد الهم والديون )

صرت اخذ الجوال وادخل في غرفه بعيده عن زوجتي وبنتي واشبك السماعات على اغنيه وابدا اتخيل لو اني دخلت بال60 الف في ذيك اللحظه يوم علمني الشايب ثم دخلت بالشركات اللي قلت لك فوق كان الان معي مالايقل عن 30 مليون ريال, ثم اسكر عيوني وابدا اتخيل اني اروح للديره وابدا اوزع ذهب على خالاتي وعماتي وسيارات على خوالي وعماني وافتح نادي رياضي في قريتنا واخليه هديه لهم وابني لامي وابوي قصر واسكنهم فيه هم وخواتي واتخيل خيالات كثيرة مثلا اوقف عند عامل نظافه واعطيه 500ريال ادور على كم عامل او افتح مسجد في تركيا او افريقيا واتخيل اني ادخل ساكو واشتري اثاث الحدائق ومظلات واتخيل اني ابني عمارة شقق وادخل العمارة واراقب العمال

_
انا انصدمت ان كل هذا كان في قلبه وشايله وساكت. وهو يقول انا قد قلت لناس عن همي هذا وضحكو علي, انا سكت شوي وقلت علمني وش تتخيل انك بتسوي بال30 مليون .. الرجال واضح انه ارتاح وجلس يسولف عن حاجات كثيرة لكن يعلم الله ماجاب اي شي عن افكار محرمه .
ماادري وش اقول له ذيك اللحظه الا جملة
(لو كان معك 30 مليون يمكن ماكنت عايش قدامي الان,يمكن انك سافرت بسيارة وصدمت فيها وتوفيت ويمكن سافرت لدولة كسياحه وانخطفت او اي شي ثاني وانت اساسا ماحصلت على ال30 مليون علشان تخسرها.هذا ستيف جوبز مات وبحسابه 8 مليار دولار مات من سرطان المرئ وهذا من اشد انواع السرطانات فتكا وايلاما, احمدربك انت دام صحته موجوده تراك بنعمه ولو تبي امرك بكره اخذك لواحد اعرفه كانت صحته مثلك وحصل له حادث والان مشلول)

اخذ يأشر بيده ويقول لي يااخي انا ابي افضفض لك انا عارف اني بنعمه واحمدالله عليها كل يوم لكن الفرصه مره بالعمره وفرصتي راحت علي, انا ابي انفس لك عن اللي داخلي والله ماتدري قد ايش انا منهم ومنغث

_

يااخوان عطوني نصايح اقولها له لاني الى اليوم اشوف الرجال الهم راكبه وودي اخفف عنه لكن ماادري كيف..