اللي شفته بالكامري 2016 والامبالا 2014
 

توجهت مع اخوي لبيت صديقنا حتى ناخذه ونطلع لملعب استأجروه اخوي وزملائه ولما وقنا عند باب بيته كان هو مطلع سيارته من البايكه كامري جي ال 2016 ماشاءالله . قال خلونا نركب بالكامري علشان امرنها توها واصله ل800 كيلو . ركبت انا قدام واخوي ورا وبصراحه السيارة جميله لكن ماتغير فيها شي داخليا . اللهم تحس انها اوسع من ناحية السقف وبدري الحكم عليها لكن العزل جميل وماتوقعته يكون كذا بصراحه . التسارع هي الكامري ماتغيرت . المكيف باااارد
العيب /

يااخوان والله ماتصدقون كيف اضاءة الاصطب الخلفي سيئه وبشعه . الاصطب اغلبه غير مضيء ومافيه الا لمبه صغيييييره جدا جدا
.
راح تشوفون الكامريات الجديده بالشارع طالعو في اصطباتها الخلفيه بصراحه فاشله جدا جدا واتوقع بيكون فيه عيوب مصنعيه بجهة الاصطبات الخلفيه خاصه الجهه اليسرى

.
قيمتها تستحق 80 الف او85 الف بالكثير . سعرها 95 الف اعوذبالله

.
طبعا انا احتجت امشي بدري واخوي اعجبته الجلسه( هذي فوائد العزوبيه :hawamer3912 ههه)

فلقيت واحد من زملائه بيمشي وهو ساكن قريب لأشبيليا وركبت معه

سيارته 2014 امبالا

الى ذيك اللحظه دايم اسمع كلام عن الامبالا وانها افضل ماانتجته الشفر من سيارات السيدان بعد فضيحتهم الكابرس(سيارتي) واللومينا

ركبت مع الرجال واول مالفت انتباهي ثقل الباب واتساع داخليها والمراتب الجميله رحت للخلف ابحط جزم الكورة تكرمون وفتح الشنطه انا انصدمت والله يااخوان مساحة الشنطة شي مو معقول فوق الخيال وفوق الوصف كبيرة جدا جدا جدا الى مالا نهايه .
.
السيارة تسارعها جميله لكن الفرمله نكبه بصراحه واحنا واقفين عند الاشارة جت عيني على امبير الحرارة واقعد اضرب كتفه واقول ياولد سيارتك بتنفجر شف الحرارة واصله النص
قعد يضحك وقال عادي ترى عادي حرارتها اصلا اول ماتشغلها توصل الربع وماتحرك الا لما توصل للنصف

هالنقطه هذي مسحت كل شي جميل شفته بالسيارة لاني من معذبي شفروليه بالكابرس واعرف وش معنى كثرة وصول الحرارة للنصف وارتفاع صوت المراوح والمكينه وقت الوقوف الطويل
.
الحق يقال العزل فيها يتفوق على كل منافساتها افالون وتوريس
عزلها عجيب .
فخامتها تعجبك وتحس انك مادفعت فيها اكثر من حقها . 110 الاف و 135 الف للفل

الاضاءة الداخليه ال اي دي جميله
لكن الخارجيه مثلها مثل كل السيارات الامريكيه فشل ذريع بالاضاءة انا ماادري ليش الامريكان مو قادرين يقلدون الالمان بالاضاءة
.
الدرج صغير ماتقدر تحط فيه استمارة السيارة . جدا صغير


حبيت اشارككم باللي شفته لعل فيه احد يستفيد منها واكسب الاجر بإذن الله