منتديات شمس الحب - ما ابغا منكم غير المشورة والدعوة الطيبة .. ادخلو لاهنتوا

السلام عليكم ورحمة الله

اخوتي وأحبتي .. تحية طيبة وبعد :

تعقيبا على موضوعي الشائك والسابق :

http://www.hawamer.com/vb/showthread.php?t=1859297
..
تستمر معاناتي مع هذا البنك البغيض ..
فانظروا واحكموا بانفسكم على ماحصل :

بعد الحوسة اللي صارت معاي مع البنك
وبعد ما ارسلت برقيات واشتكيت ورفعت وصحت ونخت ،
سلمت امري لله وقلت بنفسي مافي فايدة مالك الا الصبر والله المستعان ..

اخبروني موظفين الفرع بان التزم بالسداد وبحول الله كلها 6 اشهر
ونضمنلك اعادة تمويل ..
والتزمت كما اوردت سابقا بالموضوع السابق الذكر ،
وجيتهم بعد الستة اشهر وقالو لا ..
باقيلك شهرين وانت الصادق ..!!

قلت ليش ؟ عندكم كشف الحساب يفصل بيني وبينكم ومبين فيه كل شي ..
قالوا الادارة ما قررت الا بعد ما انت التزمت بشهرين ..
يعني الان لك اربعة اشهر فقط ..

اوكلت امري لله وقلت شهرين ماتفرق مع ان ضرفي يشكى الى الله

هذا الشهر اللي هو رمضان هو الشهر الاخير بالمهلة ..
نزل الراتب .. لقيته كامل مكمل ماخصموا منه ولا هللة ..
وجلس تقريبا 4 ايام قسطهم ماسحبوه .. لانهم يسحبونه 25 بالهجري

وبليلة الخميس الاسبوع اللي فات قلت ياولد ادخل على الحساب وشيك وشوف وش اللي حاصل .. هم سحبوا والا لا ..؟!

دخلت وللاسف لقيت القسط ناقص ..!!
لاحول ولاقوة الا بالله .. وش اللي نقصه ووش اللي صاير ذا ؟؟!!

اتصلت على الهاتف المصرفي وانا في غير شعوري ..
الو .. اخوي انا انسحب من رصيدي مبلغ 2000 ريال
وما اعرف مين اللي سحبها ؟
الموظف : لا اخوي ما انسحب منك المبلغ موجود بس معلق ..!
قلتله : كيف يعني معلق ؟!
قال : ادارة التحصيل حاجزة المبلغ لوجود التزام مالي لجهة خارجية تطلبك
وانت مسويلها استقطاع ..
قلتله : ابد مافي عندي استقطاع ولا اي شي من اللي تقوله ..!
قال هذا اللي عندي ..
قفلت السماعة لانني ادري ماعندهم سالفة ..

رحت النهار الثاني وكان يوم خميس اخر يوم للدوام ..
ودخلت على مدير الفرع وانا باتجنن واخبرته باللي حاصل ..

اجرى اتصالاته وقالي اخوي انت مسوي استقطاع لشركة تقسيط جوالات ..
والشركة ذي تطالبك باقساط وتم حجزها ..

قلتله عطني اسم الشركة ذي ووريني الاستقطاع ذا ..؟

قالي مهو من صلاحياتي اقولك اي شي انت تاكد من اوراقك ومعاملاتك ..!!

تركت موضوع الشركة ماني مهتمله ولاني بيمه اصلا .. انا بالي مع قسط البنك :

قلت للمدير طيب الان قسط التمويل الشهري ناقص
وانا ما عندي مايوفيه ..
اثبتلي هذي الحالة او بلغ قسم التحصيل باللي حصل معاي
لانه انا عندي معاهم قضية وانت تعرفها وهذا الشهر
اخر شهر بمهلتهم ..!
وانا ضروفي ماتسمح بالتاخير والعطلة من جديد ..!!

قال ماعندي صلاحية اخاطب اي جهة بهذا الخصوص ،،
عندك قسم الشكاوي ارفع شكوى ..!!

خرجت من عنده وانا الدنيا ضايقة فيني وانواع الهموم والضيقة ..

كيف اسوي ..؟؟
الجيب مافيه ولا ريال ..
والقسط ناقص ..
وانا ابغا اخلص وضعي ومحتاج للتمويل ذا الديانة يطاردوني من مكان لمكان ..
انا لله وانا اليه راجعون .. يارب انني في حكمك ،،

رحت لرجال شرواكم ببيته بالظهر ورميت عقالي عنده
وقلتله بالسالفة وتعاطف معي
وطلبته 2000 ريال الى ان تنتهي هذي القضية واردها له ..

ماقصر الرجال اعطاني المبلغ
ورحت للبنك اودعته لاجل يكتمل مبلغ القسط ..

اودعته ورحت للبيت مهدود حيلي ونمت وقمت صلاة العصر
وبعد الصلاة جاني هاجس بنفسي انني ادخل على حسابي
واشوف الايداع واتاكد ..

دخلت على الحساب واحصله برضه ناقص 1300 ريال ..

والله يا اخوان انه علم الله اللي حاصل ..
المصيبة ان رسايل الخصم والايداع ماتجيني
على جوالي والا كان لحقت اتصرف .. !!
وياما اشتكيت وطلبت منهم تفعيل هذي الخدمة
لكن بكل وقاحة يقولون انت عميل ماتتمتع بهذي المزايا ..!
ولله الامر او وآخر ..!

المهم كيف اسوي الحين .. ياربي خير وقسمة خير ..؟!

رحت دبرت المبلغ لمره ثانية 1300 ريال ويعلم الله
ان منها 50 ريال اخذتها من حارس العمارة المصري ..!!

بعد الفطور رحت للفرع ابغا اودع المبلغ عن طريق مكينة الصراف ..
وياللاسف لقيت الايداع عطلان .. ومافي عندنا الا فرع واحد فقط ..
ياربي انني في حكمك وامنت بك ..

كيف اسوي الحين .. البنك اجازة والايداع متعطل والفلوس
لازم تكون بالحساب لاجل ماينقص الرصيد ..؟!

دقيت على الهاتف المصرفي وبلغتهم باللي حاصل
وقلت للموظف حولني على المشرف وحولني وشرحتله الوضع
وقالي شوفلك اي واحد عنده حساب بالفرنسي وخله
يحولك المبلغ على حسابك مافي غير كذا .. والله يعينك

قلتله طيب لو تكرمت انا ابغا اعرف اسم الشركة ذي اللي تطالبني ؟؟
وماقصر اعطاني اسمها ..
وتفاجات انها شركة اخذت من عندهم جوال لاخوي ايفون4 اول مانزل ..
يعني عام 1428 هجري ..

وانتهيت منهم وربي الشاهد .. مابيني وبينكم الا الله سبحانه وماحلفت كذب
لكن غلطتي انني ما اخذت مخالصة وجبتها للبنك لاجل ينهون الوضع ..!

المهم .. دقيت على الشركة ذي ولقيت المحاسب وبحث عن اسمي
وقال باقي عليك 650 ريال ماوفيتها ..!!
قلتله ابد .. هذا الكلام ماحصل
عندكم محاسب اسمه احمد شوقي واساله بنفسك هو يعرفني زين ..

قال (( احمد ذا بالسجن وعليه قضية اختلاسات من الشركة ..)) !!

قلتله طيب كيف اثبت حقي انا كنت احول لكم شهريا وابلغه شخصيا
واخر شهر هو بنفسه اتصلبي وقالي كل سنة وانت طيب ياباشا انتهينا ..!!

قال كل اوراق القضية الان بالمحكمة وبامكانك تقدم مع المشتكين
لانه فيه مثلك الاف حاصل عليهم نفس الشي ..!!

قلتله طيب اللي تبغونه مني انتم او اللي رافعين به للبنك كم ؟؟
قال 650 فقط لاغير .. ووصلت لنا خلاص ومشكور ..

قلتله اخوي انا سالفتي غير كذا ..
انا انخصم مني لصالحكم اكثر من 3000 الاف ريال ..

قال ماعنديش فكرة .. دا انتا تسويه حضرتك مع البنك ..
احنا خلاص بالسليم ..

سكرت من عنده واتصلت على المصرفي وطلبت نفس المشرف
وشرحتله الوضع اللي اللي صار بيني وبين محاسب الشركة ..
قال ياعزيزي انت مسوي تفويض لهم ينتهي شهر 7 بعام 2016 ..!!
والبنك له الحق ياخذ الاقساط اللي يعتبرها متاخرة ..!!

قلتله اولا المبلغ حق الجهاز من عام 28 هجري الى حد 2016
كم بيكون برايك ..؟!

قال انا ما اعرف .. انا لي باللي ظاهر امامي ..!!

قلت واللي ظاهر امامك انني انا كاتب بالتفويض الى عام 2016 ..؟
قال نعم ..
قلت عز الله ماصدقت لا انت ولا هم ..
وثاني شي الشركة ذي تطالبني بقسط واحد فقط ..
والبنك حجز 4 اقساط كيف ذا الكلام .. ؟!

قال راجع الفرع يفيدونك انا ماعاد بيني وبينك اي تخاطب ..؟!

رجعت دقيت على محاسب الشركة ورد عليه بعد شق الانفس
وقلتله انتم الان وصلكم الشي اللي تبغونه مني صحيح ؟؟
قال نعم صحيح ..
قلت طيب انا ابغا مخالصة لاجل انهي سالفتي مع البنك ..؟
قال من حقك تعال وخذها الاحد !
قلتله انا بمدينة وانتم بمدينة وضروفي ماتسمح انني اجيكم
وانا صادق وربي ما املك هللة ..؟!
قال دا اللي عندي حضرتك وسلام بئه انا مشغول .. وقفل الخط

اندوش راسي وربي ماعاد اعرف كيف اسوي ..؟؟!

)- كيف اخذ المخالصة ..؟
)- كيف اودع الفلوس لحسابي ..؟
(مالقيت شخص عنده حساب بالفرنسي يشهد الله )..
)- كيف اتحاشا تمديد فترة حرماني من التمويل من قسم التحصيل لو لقيوا المبلغ ناقص ..؟

رحت عند الصراف اللي بالفرع وقلت بنفسي اطلب اي شخص يجي للصراف ،
واشرحله وضعي يمكن يحولي من حسابه لحسابي ..
وعينكم ماتشوف الا النور ..
اللي يطالع فيني من فوق لتحت ويتحمد
واللي يتشمت فيني ويقول روح اشتغل بدال الوقفة ذي
واللي جابلي الدورية وتحقيق وشبهة ،، وما اقول غير حسبي الله ونعم الوكيل ..

رجعت للبيت قبل شوي بعد مرمطة مع الشرطة وتحقيقات وليش تسوي كذا
وانت مين وايش عندك وماعندك ..؟!

استحقرت نفسي ولمت نفسي الف مره بانني وصلت عمري وحالي
للمستوى ذا لكن خلوكم مكاني ياسادة ياكرام وش بتسوون ..؟!

الله لايحوجكم لخلقه ولا يذوقكم حرة الحاجة ..
قولولي بالله هل انا صاحي والا اللي حولي مجنن ..؟!
ولو انتم بمكاني كيف تسوون ..؟

حتى تغيير البنك سويت اوراقه للاستثمار ولكن للمصداقية والامانة
قلت للموظف باللي حاصل معاي بالفرنسي
قال انصحك نصيحة اخو لوجه الله :
ماراح تنقل راتبك ،، لان هذا شي عالق ( بسجلك الإئتماني )
وكل البنوك تتعامل بنفس الوتيرة ..!
فأنصحك لاتتعب نفسك ..!

شوفوا هالمعاناة واستخلفكم بالله لو لقيتوا فيها شي مايتصدق
تواصلوا معي بالخاص واثبتلكم كل ماحصل
لاجل فقط تحسون وتصدقون بانني عجزت وتعبت
وماعاد اعرف كيف اسوي ..؟!

حسبي الله ونعم الوكيل .