يالابسين الجوخ
 

يالابسين الجوخ بأفعال الكلام
ياصانعين المجد بهروج الرّدي

لاتحْسبون السالفه صفحة طعام
وكل ٍ على قسمه من الشاة يحدي

السالفه تاريخ ياروس النّعام
ماسطّروه اللي ورى الذلّ تعدي

مايستوي خُف العماني والسنام
ولايستوي سرحان الأمعط والجدي

لايغرّكم وقت التسامح والنّظام
الكذب مايحلب من المزْن بردي

يوم انها بالسيف وملاعب لجام
جدّك وجدّه في ذرى الرّفّه هَدِي

وش جاب سقم الضّد حمّاي الجهام
للي وجوده لا نشق ريح القَدِي

لاتكبر نفوس العرب وقت السلام
وسيوفهم مابين مثلوم وصدِي

تفاخروا في وقتنا كل الهلام
والهيس كفّه في تصاويره ندي

حلّابة ديوس المعز وقت الخطام
بالمال نافوا في زمان العربدي

ياللي فشقكم ثار في جنب الحزام
ماتسْعطون العلم مع طول جهدي

المستصح اللي بجيرانه جذام
ماطاب له من قبـْل عام المرقدي

مواكر الندّر بها فروخ الحمام
والذيب بيدين الجبان مقيّدي

وش عاد لو قلنا على الدنيا السلام
ماتقصر الليله ولو ملّ سهدي

سوالف التاريخ .. بقبور العظام
وسرد الهـلايـم وسط قصر مشيّدي

يامكبرين الهرج في جنح الظلام
الكلب نبحه مايضرّ الفرقدي

اللي جهل هو ويش سام وّيش حام
ياجعْل مثله عن شواربنا فدِي

الحنظلة لو تنبت بقصر الرّخام
تفري كبود اللي كلوها وتغدي

اللّاش لاقي من يطبّـل له ونام
والحر عن نومه حداه المعتدي

تركّدي يانفسي وشومي شمام
دام الشهد في روس الأوتاد شهدي

الرأس هامه مع رفيعين المقام
والسيف سيفي والظفر مقبض يدي

فيصل الشن