السلام عليكم وأسعد الله صباحكم

بخش في الموضوع طوالي بدون مقدمات


حقيقة وبدون زعل .. ما راح أقول انتم مغفلين يا معشر المساهمين ( محشومين ) .. لكن في الواقع ملعوب عليكم
أبداً ما عندنا سوق أسهم .. هي مجرد لعبة أرقام خُصصت لسرقة مدخراتكم و قوت أبناؤكم
من قال فيه هوامير أو مضاربين .. الموجودين : عصابات و مافيا بدعم خفي من هيئة سوق المال .. بمعنى :
سرقة نظامية

تالله وبالله انكم تركضون خلف سراب .. حرق أموال و مضيعة وقت غير الأمراض النفسية التي سببها لكم مقابل الجهاز ما بين انطوائية وتقلب المزاج

اترك هالسوق السافل .. وابدأ في تكوين نفسك عبر الأعمال الحرة
تركتوا التجارة للأجانب .. جالسين يغرفون من الأموال وانتم تعوضون خساير الهوامير وتزيدون أرصدتهم
ليه ما شفنا جاليات يضاربون في السوق .. عمركم سمعتوا بحضرمي داخل سوقنا ؟

الأجانب أذكى من انهم يسلمون أرقابهم لحرامية

المهم:
الدولة ما قصرت .. بدأت بالتضييق على الأجانب و بإذن الله سنحتفل بطرد آخر أجنبي من البلد و في القريب العاجل ، وما أدل على ذلك إلا سن قانون سعودة محال الجوالات .. والمرحلة المقبلة سعودة مكاتب الأجار و وكالات السيارات .. ولن ينتهي الأمر عند هذا الحد .. سيأتي الدور على محلات الذهب وربما قطاع التجزئة بالكامل بمشيئة الله
الآن الفرصة على طبق من ذهب .. ابدأ في تشييد محل اتصالات كمثال .. وعلى قول المثل:
الأولين الروابح

بالمناسبة :
اعرف لكم عامل يطلّع 10 آلاف ريال شهرياً .. برأس مال قدره 45 ألف .. صدق أو لا تصدق ؟!!

البلد هذا كله خير .. بشرط الابتعاد عن هالسوق
بيع كل ما تملك ولا تتحسف وافتح مشروعك بعد دراسة متأنية وراح تعوض خسارتك بمشيئة الله
ممكن يدبل السوق ثلاث مرات فوق .. لكن صدقوني ومن واقع تجربة .. تدبل الأسهم اللي ما فيها أحد .. محد بيربح إلا الكبار .. أو ممكن تربح تدبيلة فوق .. لكن احسب شهر بالكثير وانت خسران جزء كبير من راس مالك
لا تتندم إذا طار سهمك .. فكر في مشروع صغير .. ولو يدر عليك دخل شهري ثلاث آلاف ريال انت ربحان
وإذا خايف من الخسارة ابدأ بالشراكة وقبل كل شيء لا تنسى تصلي الاستخارة
ادري فيه ناس هنا أبخص مني في التجارة بكثير .. لكن متأكد فيه بعد من هم في أمس الحاجة للنصيحة


تقول انا متعلق وانتظر يرجع سهمي عشان أبيع:
يا صديقي الهوامير أذكى من انهم يرفعون السهم عشان تبيع عليهم
لن يرتد سهمك حتى يتملك المضارب كل كميات الشركة .. ولن يتم ذلك إلا بعد مشوار طويل جدًا من التجميع ربما يستغرق فوق 10 سنوات

بتقول في شركات تعطي عوائد وجيدة مالياً و و و و .. ما راح اتكلم عن هالموضوع .. سوقكم وانتم ابخص به

بتكلم عن نفسي:

انا غادرت السوق من سنة تقريبًا .. يشهد علي الله ما تهنيت بالنوم ولا ذقت طعم الراحة إلا بعد تركته
التفت لعيالي و التهيت بمشروعي .. ومن فضل الله .. حصلت خير .. حالياً .. اقسم بالله لو اضمن تدبيلة في سهمٍ ما .. ما دخلت السوق بالمرة

أتمنى أتمنى ما أًتهم بالإرجاف .. أحسنوا النية .. والله ما اقصد الا مصلحتكم .. أنصح لأني سبق وعانيت مما تعانون منه الآن

كتبته على عجل لذلك اعذروني على اسلوبي الركيك .. وأي استفسار أنا حاضرِ