علي شان الاخوه وكذا قال الشاعر السوداني ....

خاوي الكارب البعرف معاني الخوة .......... وخاوي البعرف المعروف وعندو مروة

خاوي الفي المحاص ثابت رجالة وقوة ........ لا تخاوي الجبان الفي الحريم اتحوة
-------------------------------------------------------------------

خاوي اليوت بعزك وللصلاح يهديك ......... وخاوي النيتو صافية وديمه بفخر بيك

لا تخاوي الخسيس الفي الغلط راجيك ....... خاوي البحفظ السر وديمه بيواسيك
------------------------------------------------------------------

خاوي البعزو الزول ويعلو مقامو ........ بسدو الفرقة كان دار الزمن وايامو

التلقاهو ذاكرك فوق حروف اقلامو ....... مابتكافي كان سفيت تراب اقدامو
---------------------------------------------------------------------


سمحة الخوة للبعرف مكانا يقدر ........ وسمح الليدو تزرع في الجميل وتخدر

التلقاهو شاكرك من وراك متسدر ...... مابتكافي اوعاك لي جمايلو تودر

------------------------------------------------------------------

الزول الصديق دايما حنين ووافي ...... حافظ لي ودادك ان حضر اومافي

مابيحمل خصامك وليك تب مابجافي ....... وان اسقيتو مر بسقيك ناقي وصافي