منتديات شمس الحب - قال ما أدري , لكن الله يدري

فريزر التمر خرب عندي وهو ما كمل سنة ,قلت أصلحه عند الكهربائي القريب عندي لانه لو وديته للوكيل يصلحه على الضمان راح ياخذ وقت ويخرب التمر .

المهم الكهربائي حاول فيه وما قدر يقول كل شيء سليم الماطور ممتاز و الفلتر جديد وعبيناه غاز بس المشكلة في المواسير الداخلية فيها سدد وما قدرنا عليه .

كلمت الوكيل قال نصلحه على احسابك لانك اشتغلت فيها , قلت مافيه مشكلة
المهم أنهم شالوها وذهبت لمهم بعد كم يوم , قالوا ما قدرنا على السدد بس بعد إسبوع يبي يجيء من المدينة الفلانية فني متخصص .

يوم شفت الدعوى مطولة شريت من عندهم فريزر جديد
بعد أكثر من شهر إتصلوا علي وقالوا خلاص الفريزر تمام . قلت جيبوه
عطوني الفواتير وحاسبتهم . قالوا شغله بعد ساعة إذا ركد الغاز .
بعد تشغيلة طلع مثل أول تحط الماء فيه وبعد كم ساعة تلقى الماء أحر من حاله عند حطه.

رحت لمهم وتعبت معهم وكلم فلان و كلم فلنتان وتعال بكرى و أخذ ورد . قلت بنفسي حسبي الله عليكم , وما كنت راح أخليهم لكن الله سبحانه قطع علي خط الرجعة عليهم بشيء أغرب من الخيال .
يوم رحت منهم ذاك اليوم وصار بعد العشاء وتجيني رسالة بالجوال تقول ( تم إيداع مبلغ كذا إلى حسابك ) جلست أفكر من الي مودع هالمبلغ وحاول أتذكر هالمبلغ وبالأخير طلع المبلغ نفس مبلغ شراء الفريزر منهم قبل أكثر من شهر .
قلت يالله كم أنت كريم . بس لازم بعد إسبوع أراجع البنك لايكون واحد مسكين غلطان بالتحويل مع إن هالإحتمال ضعيف لان المبلغ يحتوي على ألاف ومئات و عشرات وخمسه الي هي قيمة الفريزر .

بعد كم يوم راجعت البنك وسألت عن اخر مبلغ قال إيداع مبلغ كذا . قلت من من؟
قال : ما أدري ماهو واضح عندي
قلت بس واضح عند الله
قال : وعندك؟
قلت وعندي

المهم الفريزر الي تحت الضمان وماله سنة فيه علة ما إقدروا يصلحوه والكهربائي الأول قايل لي هالسدد ما راح يتصلح الا إذا شق داخل الفريزر وشيف مكان السدد
يعني الفريزر كان واجب إنهم يستبدلوه لكنهم بدل هذا أخذوا مني فلوس تصليح وهمي .

والله المستعان