استشارة : اشتريت بيت بقرض سكني من البنك وملتزم بالسداد وعلي(سند لأمر)
 

السلام عليكم ورحمة الله وبركاته

باختصار وأستفيد منكم
أنا موظف بنك ولله الحمد اشتريت بيت عن طريق البنك
والإجراءات لنا ميسرة لأننا موظفين بالبنك.

البيت قيمته مليون و 500 ألف وطبعا وقعت العقد وسند لأمر قبل 4 سنوات وشهريا يتم الخصم من راتبي.

حاليا استقلت وانتقلت لشركة بالقطاع الخاص
وعقبالكم التوفيق والنجاح

اللي صار الآن إن البنك مو قادر يحول القرض الى الفروع أو يحوله قرض بفائدة أعلى لأني ما وقعت على الشرط هذا.

البنك رفض يسلمني مستحقاتي حول 30 ألف وشهادة المخالصة واخلاء الطرف بحجة إنك مطلوب للبنك.

صرت شهريا أحول اقساط البيت على حسابي بالبنك عشان يخصمون وأصير ملتزم بالسداد.

راجعت الموظفين .. وعندهم يا تسدد البيت كاش والا انقل البيت لأي شركة تشتريه منا و انسلخ بالفوائد والاقساط.

أنا راجعت البنك وقلت لهم خلونا نتفق ونسوي اي حل وسط لأني فعلا ملتزم بالسداد وما أحب أدخل مشاكل وخرابيط مالها أول ولا تالي.
ومع ذلك ما فيه اي نتيجة ايجابية من عندهم.

قلت كل اللي قلتوه .. مو حل وانتم ما تبون تشتغلون
حاطين رجل على رجل وتبون نشتغل عنكم.
وفوقها اصلا متورطين قانونيا لأن العقد بيننا ناقص ولا يحميكم ولا يحميني لكن معاكم سند لأمر.

الوضع حاليا أنا ملتزم بالسداد والبنك معاه سند لأمر
فكل قلقي لو شكيتهم لوزارة العمل أو مؤسسة النقد ان البنك يقدم سند لأمر لمحكمة التنفيذ ويسجنوني بسبب ما عندي كاش اسدد البيت.

أعطوني رايكم وتوجيهاتكم