السلام عليكم، معاكم مصرف الراجحي، خير وش فيكم أكلتوني بقشوري ؟؟؟؟
 

أنا وربعي البنوك سالفتنا مع هيئة الزكاة سالفة

ياخي مدري وش سوينالهم

ترانا والله سعوديين حالنا حالكم وفي مركب وحدة

نوظف سعوديين وسعوديات ولنا الفضل بعد الله سبحانه في استقرار الاقتصاد السعودي



هيئة الزكاة عودتنا على طريقة احتساب زكاة ومشينا عليها سنين وبنين، وفجأة صحت من النوم وقررت تجحفلنا وجابت أوعيتنا الزكوية وأضافت لها (1) الاستثمارات طويلة الاجل و(2) الوديعة النظامية و(3) الايجار التمويلي (كنا نستبعدها أول وكانت أمورنا ماشية تمام) وبسبب هذي الإضافات زادت علينا الزكاة، بعدها رحنا واعترضنا انا والربع لكن ما حولك أحد :)

الزبدة إني عشان أبري ذمتي سويت لي احتياطي على جنب وخليته لين توضح الصورة، وكبيت العشاء في قوائمي المالية حقت السنة الماضية علشان لا تقولون بورويجح ما علمنا :)



يا مساهميني صحيح بتنقص حقوقكم شوي، لكن أوعدكم بشد حيلي وأبشروا بالعوض، لا تنسون اني في الربع الثالث ربحان أكثر من البنك الأهلي اللي مسوي فيها أضخم بنك سعودي وما ادري وشو وفي النهاية طرحته لعيونكم :)

واللي يقولون لكم إني بفلس وبندمج ومدري وشو عطوهم جوهم ولا تتجادلون معاهم الله يرضى عليكم هذول وضعهم صعب خلونا نصير أحسن منهم

وعلشان ترتاحون ترى الاحتياطي النظامي 100% من رأس المال وعندي أرباح مبقاة مجمعها لكم قيمتها 14.4 مليار ريال هذا غير أرباح الربع الرابع وغير الاحتياطي اللي سويته للزكاة بخمسة مليار، يعني من الأخير مطالبة الزكاة الإضافية اللي صجوكم فيها تراها ما تجي 11% من إجمالي حقوقكم من غير أرباح الربع الرابع، وتأثيرها على مركزي المالي نفس التأثير لما أوزع عليكم (3.3 ريال لكل سهم) وتراي العام الماضي موزع عليكم 4 ريال لكل سهم، وعن النص الأول من هالسنة وزعت عليكم ريالين وشوفوني ما أعلنت إفلاسي للحين :)

وإذا جاكم أحد وقال اني ما افيد المجتمع بشيء وما غير ألهط بذا الدراهم وروه هالصورة من قوائمي:

https://upload.hawamer.com/d.php?has...SMRRMIU2GHLXK8

تراني في سنتين نقيت فوق الأربعين مليون وللحين مو عاجبهم، ما قلت لكم وضعهم صعب :)

أعتقد إني وضحت لكم كل شيء وداومت لكم يوم السبت وباقي البنوك مسكرة :)

وإذا بكرة هبد سهمي وسحبت السوق معاي، تراني أختبر معزتي في قلوبكم، وأشوف إلى أي درجة بتتمسكون فيني :)

يلا تصبحون على خير