لاتجادل سفيه ولاتخاوي ذليل
 

لق عينك سماها .. يابعيد الخيال

الأماني ثقيله والليالي تميل

..

إن عصتك الصعايب لاتحقر المُحال
وإن تبسم زمانك .. روّض المستحيل


..


من وقف في طريقـك لا تلقيـه بال
ومن سعى فانكسارك .. فالنخيل النخيل


..


ان رويت القناعه عشت يا بن الحلال
وان فقدت الشجآعه لا تقط الصميـل


..



عابدين الدراهم وسـط سـوق الريـال
الكريم بهواهم .. يحسبونـه بخيـل


..


من تهقوى المراجل في شمـاغ وعقـال
فالمراجل كليفه .. والفعايـل دليـل


..


ومن عمل فيك خير .. وشفته بعسر حال
ويش خانة حياتك .. دون رد الجميـل


..


واحداً مايعينك .. لاحدتـك الليال
قلت متى هو بينفع .. جعل مثله قليل


..



الرفاقه تجاره والوفـا راس مـال
آشتر اللي يعزك لا تعوود بخيـل


..


لا عصتك الاجابه .. هاك رد السـؤال
الليالي معـآرك والمشاريـه .. خيـل


..


وإن بغيت المعزة في عيـون الرجـال
لا تجآدل سفيـه ولا تخـاوي ذليـل