منتديات شمس الحب - ولا صبوا لي الفنجال يبرد ما تقهويته

الحقيقه اني طفشان مرررر ولو اني متقاعد كان هاجرت
الاصحاب الحمدلله كثير
لكن الجماعه كلن مشغول ولا نشوفهم الا في المناسبات
علي ما يقولون غريب في بلدي
وين ايام الديره وأيام السهر على ضوء القمر وصوت الكلب والغنم
وصوت البعير والناقه
والديك يأذن صباحا
وصوت مكينة الرستل
ناس سافروا في مدن مختلفه وناس ماتوا رحمهم الله

والآن مع
عوض الدواي
الا يالله طلبتك يا إلهي وانته المطلوب
تفرج همي اللي من سنين طوال عانيته
ملازمني سواة الظل وأقرب من زرار الثوب
مع انه لو يضايقني زرار الثوب فكيته
تحاصرني هواجيسي وتاخذني وانا مغصوب
تسافر بي من المجلس وكني مير ما جيته
تدور السالفة عندي وقلبي في سفر ودروب
ولا عدت وأنا مثل الذي نايم وصحيته
تدور الدلة الصفرا ونفسي تشتهي المشروب
ولا صبوا لي الفنجال يبرد ما تقهويته
ألا يا من بإحسانك رجع يوسف على يعقوب
ويونس وسط جوف الحوت نادى ثم نجيته
تساعدني على الدنيا وترزقني صبر أيوب
وتحسن خاتمتنا في نهار حق توقيته
وتغفر لي ذنوبي وانت عالم وش علي ذنوب
ولكن بابك أوسع لي وغفرانك ترجيته
وبابك ما يرد اللي نوى بعد الضلال يتوب
ولا أحد يا كريم الوجه جاء تايب ورديته
وأنا مذنب وأنا تايب وأنا خايف وأنا مرعوب
ولك وحدك جبيني في تراب الأرض حطيته