اللي يقدر يتزوج يتزوج ماعليكم من حكي المنتديات ماندمنا الا على تأخير الزواج
 

السلام عليكم

ماعليكم من حكي المنتديات وخرابيط مواقع التواصل

اللي يقدر يتزوج ولو بالقوة يتزوج وربك بييسر امور كثيرة

مدامك موظف ولك دخل ثابت اعرس اعرس اعرس واترك حياة العزوبية كنك قطو كل شوي في عشة

تزوجنا وحنا طفارى ماعندنا شي ورزقنا ربي خير والمره والاطفال يجون معهم رزقهم

كنا نسمع بعض الملاحيس المرضى لاتتزوج الا مكون نفسك ومن هالخرابيط والحمد لله اننا ماسمعنا كلامهم

يوم تزوجنا جاتنا العانيات وجانا الخير والبركة في المال ووفرنا في المصروفات بدال ماكنا عزوبية كل شوي وانت شايل خلاقينك للمغسلة وعيشتك من المطاعم صار طبخك من البيت وغسيلك في البيت وريحتك طيبة وفي عيون الناس محترم ومقدر وتيسرت امور كثيرة بفضل الله تعالى

زمان كان يجيك رزقك لحالك هالحين يجيك رزق مرتك وعيالك فاحسن الظن بربك

لاتقول مديون بكون نفسي ومن هالخرابيط
مافيه احد سالم من الديون
مادام تقدر تفتح بيت ولو بالضغط على نفسك تزوج
ترا الزواج الان مع هالمغريات والصور والمقاطع اللي في النت صار الزواج ضروري وحتمي حتى تعف نفسك وتغض بصرك وترضي خالقك

يكفيك ان الله وعدك بإعانة الناكح يريد العفاف

عن أبي هريرة رضي الله عنه أن النبي محمد صلى الله عليه وسلم قال: (ثَلاثَةٌ حَقٌّ عَلَى اللَّهِ عَوْنُهُمْ : الْمُجَاهِدُ فِي سَبِيلِ اللَّهِ ، وَالْمُكَاتَبُ الَّذِي يُرِيدُ الْأَدَاءَ، وَالنَّاكِحُ الَّذِي يُرِيدُ الْعَفَافَ) [رواه الترمذي].

استعن بالله واول ماتتوظف لاتفكر بسيارة جديدة وارض وتمشيات
فكر اولا بالزواج ثم بعدها بارض وخلي اولوياتك مرتبة


اذا كان عندك استطاعة للزواج ولم تتزوج حتى الان تراك آثم وعليك ذنب عظيم حيث ان لديك قدرة على اعفاف نفسك بالحلال وتنصرف للحرام فاحذر


لاتقول بنات اليوم فيهم وفيهم احسن الظن بالله وقل انا ادور الحلال وربي مايخيبك ابد ترا كل الناس متوفقين وجاهم عيال وامرهم زينه ماعليك من اللي ماتوفق لان اللي متوفق اكثر والله بيده الخير كله