منتديات شمس الحب - ياقايلٍ تكفى . بتكفى شقينا = ياما لجل تكفى لقينا المضرات.......

ياقايلٍ تكفـى ... بتكفـى شقـينـا = ياما لجل تكفـى لقـينـا المضــــرات

ياما لجـل تكـفـى نزلنـا ورقـيـنـا = وياما تجشمنا الدروب العـسـيـرات

تكفى تـرى تكفـى دمـارٍ عـلـينـا = تكفى دمار اهل الـكـرم والمــروات

باسبابهـا صرنـا لهـم كافليـنــــا = ولاجـنينـا الا الزعـل والغـرامــــات

وكم ليلـةٍ لعـيـون تكفـى سـرينـا = نسري لجل تكفى على غير مشهات

وياما حملنـا ارواحـنـا في يدينـا = والعـمـر ماياقـاه كثـر المـــــــدارات

وكم غاليٍ لعـيون تكفـى عـطينـا = نعـطي ولا نحسب حساب الخسارات

وان قلت تكفى قلت ابشر وجينا = نجـيك لو دونـك بحـورٍ غزيــــــرات

نسـوق لجـلـك كـل شـيٍ ثميـنــا = نجـيـبهـا بالمـال والا الوجاهـــــــات

على البلا نصبر إلـى مـن بليـنا = نصبر على شيل الحمول الثـقيـــلات

لاتستغـل الحلـم والطـيـب فـينـا = الحـلم له حــزه وللـطـيـب حــــــزات

كم جاهـلاٍ لعيـون تكفـى نصينا = وكبرت بعين الجاهليـن التفاهــــــات

الجهـل أعـيَـى كـل طـبٍ مكـينا = من عصرادم لين عـصر الحـضارات

اخشـى عليكـم ساعـةٍ تعـترينـا = نسرج بها خيل الجهـل للجهــــــالات

دام الدواء جهلٍ على الجاهلينا = نجهل جهل اعوام في ظرف ساعات

نجهـل وحنا للجهل كـارهــيـنـا = مضـطر والمضـطر يرقى الصعـيبات

ياللي تقول الحـزن خيم علـينا = الحزن بعض احيان للنفس مـلـهـات

شعر/
(نديم المجره)