عندما تعارك الثلاثة عند رأسي
 

السلام عليكم
ارتميت على الفراش بعد يوم حافل بالعمل وسهر طويل
وما ان وضعت جنبي واستعديت للإقلاع
اذا بيد ٍ حانية تربت على كتفي بكل رفق !
تجاهلتها للحظات
ثم احسست بها مجدداً تداعب ماتبقى من شعيرات بمقدمة راسي
التفت لأستطلع الامر
فإذا بهاجسي جالس بالقرب مني !
خير يالخو ؟
قال قم قامت عصبتك !
وشفيه , وش تبي ؟
قال قم فز وجع
يعني ماتدري كم باقي على صلاة الفجر ؟
قلت لا
قال ماعاد إلا خير
ولاتنسى عندك مراجعات الى بقيق !
حاولت اطنشه وسحبت البطانية
حسيت البطانية ساعتها خفيفة !
يوم دققت , إلا الاخوين الكسل والنعاس يسحبون معي
قالوا وهم يسحبون البطانية
لايهمك ذا المعقد
نام واللي عليك بالخير , وكل مطرود ملحوق
ماصدقت خبر , دخلت راسي تحت المخدة
والاثنين يتهامسون الكسل والنعاس
يقول الكسل تدري كم درجة الحرارة ؟
رد عليه وقال مووووت بررررررررررد , الحرارة سبع درجات
وذا الخبل يبيه يقوم
شوي وتنسحب البطانية
لاحول ولاقوة إلا بالله
ياخي وش تبي
قال قم , حاول تصبر شوي للصلاة ثم تخلص مراجعاتك
فما اطال النوم عمراً يابني , ولاقصر بالاعمار طول السهر
استقعدت وجلست مثل السكران ! بين الصاحي والنايم
تهاوش الثلاثة , وعلى صوتهم اكثر واكثر
ثم تماسكوا بالايدي
فخفق بجناحية النعاس وطار بسبب الصوت المرتفع والازعاج
وانزوا الكسل بزاوية الغرفة , متلحفاً بطرف روب الحمام
بعدها رمقني بعينيه هاجسي منتصراً عليهم
قلت وبعدين ؟ وش اسوي الحين ؟
قال الصلاة ثم كبدة الحلة
ترى من زمان عنها
تضيع الوقت شوي , ثم تخلص مراجعاتك ..
صليت وركبت السيارة والدنيا بررررررررد
واول ماوصلت تذكرتكم وخذيت الصورة هذي للمحل من الخارج
http://im17.gulfup.com/Qlvq2.jpg
وخذيت الصورة هذي من الداخل
http://im17.gulfup.com/ipr21.jpg
قبل كل شيء
ترى حقوق الدعاية والاعلان محفوظة :hawamer1812

بما ان محلات الكبدة ماشية بالعكس
اطلب صحن بصل , وقله يزود الكبدة شوي !
لأنك اذا طلبت كبدة جابوها كلها بصل
فاختصاراً اطلب بصل مع زيادة الكبدة !!

اول ماوصل العامل
قلت عطني نص غنم
وكاسة شاي تعدل المزاج
جاب الشوربة والخل مع خبز البر
ثم جاب الكبدة تفوووووح :hawamer6312
اول ماحطها قلت اسعفني بالنص الثاني
لأني لو طلبته كامل برد
لذلك الافضل تطلب نص ثم نص
حتى تستمتع وتتلذذ بالكبدة الحارة الطازجة

حمدت الله بعد الشبعة
وتوجهت الى السيارة
فأخذني الفضول بالمواقف لدخول سوق اللحوم المجاور
فدخلت واخذت هذه الصورة
http://im17.gulfup.com/i2vD3.jpg
وتبين الرؤوس والمقادم
وهذه الصورة ايضاً
للكبدة والكرش والمصران والكلاوي
http://im17.gulfup.com/7ZEE4.jpg
وصورة اخرى
للحوم العجول والحاشي
http://im17.gulfup.com/qBfG5.jpg
ثم عرجت
لمحلات السمك بأنواعه
http://im17.gulfup.com/z01p6.jpg
وعند خروجي
من الجهة الشمالية الشرقية
تفاجأت بهذه الحملة المنثورة على الارض
http://im17.gulfup.com/8D2p7.jpg
واثناء توجهي للسيارة
تذكرت الايام الخوالي وسنين المراهقة
ايام البحث عن اشرطة ابو حمد
ومحمد السليم
فأخذت هذه الصورة
لمحلات بيع الادوات الموسيقية
ولازالت نفسها لم تتغير او تتطور
http://im17.gulfup.com/mttP8.jpg
ركبت بعدها السيارة
وتوجهت لمعركة المراجعات المعقدة
حاملاً ملف وزنه كيلو على الاقل من الاوراق
به كل صورة وكل اصل يطري على بالك
مع كم معروض واسترحام
وعشرين واسطة اللي قدامي واللي على التلفون
لعلنا نخلص على خير !