3 تجارب شرائية من متجر لاعب La3eb
 

بسم الله الرحمن الرحيم


السلام عليكم ورحمة الله وبركاته،

اللي ماوده يقرا الموضوع كامل ويبي شي مختصر لا تفكّر تشتري من متجر لاعب


شاءت الاقدار اني انحد لطلب PS5 ووقع الاختيار على موقع لاعب بحكم اني متأخر نوعًا ما بالطلب فما كان فيه الا هم

توكلت على الله وطلبت من عندهم نسخة الديجيتال ووعدوني انها بتوصلني يوم الاطلاق واتصل علي المندوب في يوم الاطلاق

على الساعة 3 العصر وارسلت له الموقع وانتظرت لين وصلت الساعة 7 بالليل ورجعت اتصلت عليه وقلت له وينك وقال لي شحنتك مع مندوب ثاني

وبعدها بساعة تقريبًا وصلتني رسالة من لاعب تفيد بأن شحنتي خرجت مع المندوب ورجعت اتصلت عليه ونشبت له لين عطاني رقم المندوب اللي معه شحنتي

كلمته وقال انه مايمديه يوصلها لي اليوم - كان الخميس - ولازم اصبر للاحد وقلت انا بجيك وارسل موقعه ورحت له بحي يبعد عني 25 دقيقة

واستلمت الجهاز ولله الحمد بعد قلق منهم، وبعدها سووا عرض اطلب 105$ بسعر 100$ فقط واستفدت منه

ووصلتني الاكواد على الايميل بدون اي مشاكل وبنفس التوقيت

التجربتين اللي فوق كلها كانت بفلوسي كاملة واستلمتها والموضوع كان سهل وماواجهت مشاكل كبيرة

وبحكم اني طالب السوني طلب مسبق عطوني 250 ريال رصيد بالمحفظة اقدر استخدمها على 3 حزمات فقط

الحزمتين الاولى عبارة عن يد وشريطين لكل حزمة، والحزمة الاخيرة عبارة عن اشتراك بلس مدة سنة وسماعات PULSE

طلبت الحزمة الثالثة وطلعت علي بسعر 437 ريال بعد خصم الـ250 اللي من المحفظة وللاسف ماوصلني اي كود على الايميل

تواصلت معهم وكانت ردودهم بتوصلك قريب وكلها ردود مماطلة وتسكيت لدرجة انهم 4 مرات يقولون طلعت مع المندوب !

بعد اسبوعين من الطلب قررت ارفع شكوى لوزارة التجارة، بعد رفع الشكوى بيومين تواصلوا معي وقالوا لي عندنا مشكلة بالنظام الداخلي

الخاص بالتسليم الاوتوماتيكي لبطاقة البلس الخاص بالحزمة هذي وبنرجع لك مبلغ البلس بالمحفظة (165 ريال تقريبًا) وارجع اطلبه بنفسك

اما السماعة بنوصلها لك خلال 3 ايام وانتهت المكالمة وارسلوا لي ايميل مكتوب فيه هالكلام

وكاتب "رقم التتبع 223898xxx" برسالة الايميل وهو نفس رقم الطلب اللي طالع لي اصلًا بالموقع بس

وانا مو محتاج انه يعطينياه بس طلع قايل للوزارة انه عطانياه وقفّلوا الشكوى بوزارة التجارة ورجعت فتحتها مباشرة لأن موضوعي ماانتهى

وانسحب علي من الكل، لا السماعة وصلت ولا الدعم الفني يردون ولا الوزارة تحركت

ونشبت للوزارة كل يوم اكلمهم ويقولون بنسوي لك تنشيط للشكوى ومن هالكلام التسكيتي لين طحت بموظف الله يسعده

قال لي بسوي لك تصعيد للشكوى الآن وبتابع معك الموضوع باذن الله، بعد التصعيد اتصلوا علي لاعب وقالوا بنوصلها لك بكرة،

واليوم الثاني كلمني المندوب وطلب الموقع واستلمتها بنفس اليوم


الغريب بالموضوع اني استلمت شحنتين وحدة من الصين ووحدة من امريكا كلهم طلبتهم بعد السماعات

لكن مستودع الشركة بالرياض وانا بالرياض وجلست شهر و3 ايام عشان استلمها !!

واللي قهرني اني لما استلمت السماعة كان الكرتون الخارجي مليان غبار لدرجة ان حتى كرتون السماعة نفسه اللي مفروض مايدخله شي كان مغبر

معناته ان السماعة عندهم جاهزة من زمان لكن ماكانوا ناوين يسلمونها لسبب قد اجهله


والغريب ان حتى خدمة العملاء لما يقولون لي انها خارجة للتوصيل اطلب رقم المندوب يقولون مو عندنا !


بعد هذي التجربة اعتقد اني مستحيل افكر اطلب منهم ثاني مرة، بالاضافة الى انهم حاطين كل وسائل الدفع ومانعين الدفع عند الاستلام

وهذا يضع علامة استفهام كبيرة جدًا على الموقع، وطبعًا الموقع تابع لوكيل سوني (الالكترونيات الحديثة)

وهالشيء مفروض انه يطمنك لكن اللي صاير انه يخوفك للاسف تحسهم مسوينه عشان ياخذون راحتهم بدون الاساءة لسمعة الوكيل نفسه

وختامًا ذكرت الـ3 تجارب كاملة عشان اكون محايد بقدر المستطاع واسلوبهم بالتعامل مع الشكوى مااعجبني صراحة تمنيت تعامل احترافي اكثر

وحاولت اكثر من مرة اني اطلب استلام من اي فرع او اي مستودع وكانوا يقولون حنا متجر الكتروني فقط

هذا الموضوع منقول من :: موقع البوابة الرقمية :: يمكنك زيارته في اي وقت للاطلاع على مواضيعه
كما يمكنك زيارة اقسام مواقعنا مثل
التجارة الإلكترونية او أقسام الآيفون والآيباد والسيديا او قسم الأندرويد وأجهزة سامسونج الذكية او قسم الجيل الرابع للإتصال بالانترنت STC او أقسام PlayStation والترفيه او شاشات التلفزيون والمسرح المنزلي او أخبار شركات الإتصالات او الأخبار التقنية او
https://www.adslgate.com/upload/amaz...on-banner8.png