البارت السادس عشر









بعد ما انهت صلاة الظهر استغلت وجود منيره لوحدها وقالت فرصتي اكلمها عن موضوع امي








دانه : السلام عليكم
منيره بدون نفس : وعليكم السلام
دانه تبتسم : بساعدتس بالمطبخ
منيره مو معطيتها اي اهتمام : مشكوره مو محتاجه احد يساعدني
دانه تاخذ منها الرز تبي تغسله
منيره وعينها على دانه بكل حقد : متى بتروحين لأمتس
دانه حست دمها نشف من الإحراج وبابتسامه مصطنعه : مليتي مني
منيره : لافي كل شوي يسأل عنتس ، وترى حنا ملينا من المشاكل اخذي اغراضتس وروحي لأمتس
دانه بتوتر : ولد عبدالعزيز فبيت ابوه وانا مستحيل اجلس بينهم وهو مو من محارمي




منيره : ومن متى عبدالعزيز له ولد
دانه : كان مسافر مع امه وتوه رجع
منيره : خبري ابوتس ، انا اللي عندي قلته
دانه : البيت شايلكم وانتم تسعه ، يعني انا اللي بسوي انفجار سكاني بينكم

منيره تلتفت لدانه بتحقير : ليه انتي ماوصلتس خبر ان لافي ملك لهيا بنتي عشان يخفف مصاريف
دانه : وشو ،،،،،هيا صغيره على الزواج حرام عليكم
منيره : حرام علينا ولا حرام عليه هو ، الله حسيبه
دانه : وراتبي اللي ياخذه كل شهر لمدارس خواتي وين يوديه
منيره : اي راتب ؟؟؟؟ كل ماكلمته ان احتجنا يقول مامعي شي ودانه ماعاد ترسلي شي
دانه : حرام عليه ، كل شهر ارسله راتبي وآخذ منه شي بسيط لنفسي
منيره : حسبي الله ونعم الوكيل ، ياربي فكنا من بخل وطمع هالرجال اللي بيضيعنا معه





دخل عليهم لافي وبكره : انتي مارحتي لأمتس
دانه تضغط يديها فبعض وتناظر الأرض
لافي : انتي لازم ترجعين لأمتس وتخلصون موضوع وظيفتس ، اجل منين نعتاش وانتن 7 بنات وولدن الله يخلف علي
دانه : انت تاخذ راتبي كل شهر ، وخواتي مايوصلهم منه شي ، حتى مدارسهم ماعادو يروحونها
منيره : كل ماسألتك ، تقول دانه ماعاد ترسل شي
لافي : اقطعي لسانتس لا اسمع لتس حس
دانه : حرام اللي تسويه فينا كلنا ، تحرمني من راتبي وتحرم بناتك من اللي يجيهم مني
لافي : حرمت عليتس عيشتس ، ان مارجعتي لوظيفتس ترى بيتي يتعذرتس ، وارجعي لامتس
كانها خذتس اول الوقت بالقوه ، انا الحين اردتس لها بالقوه
منيره خافت لا ترتفع اصواتهم وتكبر المشكله وتوصل للضرب
خلها انا بخليها تروح لأمها
لافي بعصبيه : مقطوعة النصيب عقب من ربيتها جايتني تقول انت تاخذ راتبي






منيره : وين صالح
لافي : وش يدريني عن ولدتس العايب اللي مابه رجا ,,,,,وتركهم وطلع
منيره بأسى وصوت خفيف : ياليت بناتي الست عيال ، ماكان حالي كذا
دانه بغضب : حنا بوقت صارت البنت مثل الرجال





طلعت منيره من المطبخ وصوتها العالي اللي كله قسوه وهي تصايح على بناتها بعنف وبدون رحمه وعلى اتفه الأسباب
دانه تناظر منيره من بعيد وفي بالها " انا عارفه تحت هالقسوه حنان ماله نهايه ، لكن العتب على الظروف





،،،،،،،،،،،،،،،،،،،،،،،،،






في أيام رمضان الأولى كانت أيام لها طبيعتها الخاصه والجو مليء بالروحانيه والتقارب الأسري
ومتعب كان روتينه من بعد الدوام يكون فبيت خالته الى وقت الإفطار ، ومن بعد التراويح كان يتفقد موضي وعيالها وينام عندهم ومر اسبوع من رمضان على نفس الوضع




موضي بالمطبخ تجهز الفطور ، روان وعمر يلعبون بحديقة الفيلا
متعب نزل من سيارته وتوجه لداخل الحديقه ، اول ماشافه عمر صار يركض له بيسلم عليه
متعب يشيله ويحبه بعطف : وش مجلسك بالبرد يابطل
عمر : لعبنا انا وروان
متعب : وش لعبتم
عمر : لعبنا بالرمل كل ما ابني بيت ، روونه تدوس عليه
متعب : ههههههه ، روان انتي دستي على بيوت عمر
روان : ههههههههههه احسن عشان لا يوسخ ملابسي مره ثانيه
متعب : ههههههههه ، وين بيان
روان : بيونه تبكي
متعب : اوووووووووووووووووووه لي الحين وهي زعلانه ، انتم متأكدين انها بنت موضي مو بنت دانه
روان : هههههههههههههههههههههههه
متعب ينزل عمر : انتظرني هنا بشوف بيونه وارجع لك





دخل البيت ، سمع صوت موضي بالمطبخ ومعها صوت بيان ، واتجه لهم




قبل يدخل قال : ياولد في احد هنا



موضي غطت شعرها وقالت : ادخل مابه احد


سلم عليهم وعينه على بيان وعيونها كلها دموع : وش فيها الأميره زعلانه
موضي : لاتشغل حالك فيها ، دلع بنات
متعب : دلع بنات ، وبيونتنا تستاهل دلع البنات ، قرب منها وشالها وحط يده تحت فمها : ليه زعلانه
بيان بدت تشاهق : ابي دانه
متعب : بس كذا ، نجيبلتس دانه
بيان : كلكم كذابين كل يوم تقولون كذا ولا تجيبونها
موضي : بيان خلاص انا قلتلس عندها شغل وبترجع ، لاتوجعين راسبي
متعب : تعالي معي بنروح نتمشى بالسياره شوي
بيان : لا لا ،، ابي دانه
موضي تلتفت لمتعب : اتركها لا تشغل بالك بتجننك
متعب : خليها معي ، ولي جا وقت الفطور ارسليه لمجلس الرجال



موضي مستغربه ، اول مره متعب يفطر عندهم : معك ضيوف




متعب : لا
موضي : اجل افطر معنا هنا ، مافي احد غريب
متعب : انتم ماترسلون لشاهر فطور كل يوم ؟
موضي باستغراب : الا
متعب : ايه زيدوه وافطر معه
موضي : تفطر مع السواق ؟


متعب يكره اسلوب الطبقات الاجتماعيه ، قال : دام الرجال مسلم مافي فرق بيني وبينه



موضي بدت تنظر للحياه بنظره ثانيه " معقول فيه ناس كذا

موضي بخجل : ان شاء الله




،،،،،،،،،،،،،،،،،،،،،،،،،،






ياخواتي لازم نذكركم ونبشركم ببشرى من الله سبحانه وتعالى
قال تعالى ( وعسى ان تكرهوا شيئا وهو خيرا لكم )

ياحبيباتي من ألطف بنا غير الرحمن
حتى لو اصابتنا مصيبه وكانت مصيبة عظيمه ، علينا بالصبر ولا نجزع منها ، واعلمي اخيتي ان ما اصابك هو خير مهما عظمت مصيبتنا ،،،،،،،،،،،،،،،،،



سرحت موضي بكلام الداعيه اللي بدت تعظهم وتقوي ايمانهم بعد التراويح ، ومن حسن حظ موضي انها كانت تكلمهم عن المصيبه وكيف التعامل معها
وكيفية التصبر عليها مهما عظمت




بدت مصيبتها مع ظهور متعب اللي كانت تلح على عبدالعزيز انه ياخذه لمستشفى خاص للأمراض العقليه ، وكانت الخيره انه هو اللي انقذهم بأزمتهم
وفعلا كانت الخيره مما واجهوه بمصيبتهم ،،،،،،،،،،،، شعورها بالضعف والحاجه الى الله تعالى ،،،،،،،،،،،،،، استغفارها من

ظلمها لمنيره ،،،،،،،،،،،،،،،،،اعترافها لبنتها عن خطأها ،،،،،،،،،،،،،، تنهدت موضي ودمعت عينها من الندم على ذكرياتها المره

، وصلها احساس انها انسانه جديده
استبشرت خير ان باب التوبه مفتوح
حياتها تغيرت وتأكدت ان المظاهر ماتنفع احد، وكل انسان لابد يقتنع بما اعطاه الله





،،،،،،،،،،،،،،،،،،،،






مر تقريباً مايزيد عن اسبوع من رمضان ويوميا لافي يطلب من دانه ترك بيته وترجع لمدرستها

دانه بقهر : انت ابوي وملزوم فيني
لافي والشر يتطاير من عيونه : امتس اخذتس بالقوه والعناد وبيتي كان خالي ، وذلحين خليتس معها بالطيب ،، لا المكان ياسع ولا المصرف يوفي معنا





دانه :بجلس هنا ، مالي رجعه لبيت امي وهي ماتبيني
لافي : ترجعين لأمتس و لمدرستس غصب عنتس

طال الجدال بينهم واصواتهم بدت تعلا وانتهت بـــــــكف من لافي على وجه بنته بكل قسوه وعنف




دخلت منيره بهلع وبصوت عالي : وش فيك على البنت ، انت ماقد جيتنا ووجهك يتهلل بخير




لافي : لاتدخلين بيني وبين بنتي

منيره : الا بتدخل ، وش الدبره معك كل ماجيتنا وبعيونك شر ، ترى ماخلقنا لكذا ، يومك متولي الضعيفه بشي ماتقدره
لافي : اسكتي لايجيتس ماجاها ، وتركهم وطلع





دانه دخلت بنوبة بكاء بينها وبين نفسها
منيره : قومي غسلي وجهتس وتعوذي من الشيطان وارقدي ،،،،،،،،،،،، ثم انصرفت





في آخر الليل الكل نام بعد السحور ، وحطت منيره راسها تستعد للنوم وفجأه تذكرت دانه ، واتجهت للغرفه اللي تجمع باقي افراد الأسره
فتحت الباب بهدوء وكان الظلام عاتم وبصوت هادي :دانه
دانه بصوت مليان دموع :سمي
منيره : تعالي بشويش اخوانتس لايحسون
دانه قامت بكسل وراحت مع منيره للمطبخ الصغير المظلم وجلست معها
منيره بحنان تخفيه عن الكل : ياميمتس تسحري قبل الأذان
دانه وعيونها تملأها الدموع استغلت رقة قلب منيره بهالوقت




دانه : خالتي
منيره وهي تغرف لدانه الأكل : وشو
دانه : خالتي سامحيني
منيره تناظر دانه : وش اسامحتس فيه
دانه : على قول امي فيتس
منيره تجلس وهي تحاول تتهرب من الموقف : اللي كان كان
دانه بدموع غزيره : كل مايعسرني شي ، اقول ذي حوبة منيره
منيره بأسى : حوبتي كانها بتظهر ، بتظهر بامتس مهوب فيتس يابنتي
دانه : جاها اللي اكفاها ، وجاني اللي اكفاني
منيره تناظر دانه بحزن : الله يعوضني خير ويعوضكم خير
دانه تضم منيره ، سامحيني



منيره تجردت من قسوتها والقناع اللي تلبسه وظهر جوهرها الخفي ، ، الطيبه والحنان والعطف دمعت عيونها وضمت دانه بكل حنان
وصاروا يبكون على القسوه اللي فرضتها الظروف على بعض القلوب الطاهره ، القلوب النظيفه اللي كل عيبها انها تحاول تخفي انكسارها بقناع القسوه



منيره : مسامحتس ويعلم الله اني من ذالساعه وان اللي بقلبي انغسل ولاني بشايلتن عليتس

دانه مستمره بالبكاء والحزن خيم عليها



بعد وقت قصير مضى بينهم وهم يتكلمون بالموضوع نفسه ،،،،، هدت نفوسهم




منيره تحاول تحسس دانه بأنها قريبه منها وبابتسامه : باتسر الجمعه وعقب التراويح نوير بنت مصلح المذّن بتحدّث علينا
وش رايتس تروحين معي
دانه ابتسمت رغم دموعها اللي كانت تسيل : ان شاء الله
في داخلها تفكر بطيبة الانسانه اللي نست كل اللي صارلها من موضي من ظلم وقهر ، عمره سنين طويله وقابلت دانه بإحسان بعد مافهمت موقفها
قامت منيره : انا بدخل انام وانتي ارتاحي ، تمسين على خير
دانه : الله معتس




بعد مادخلت للغرفه تحاول تلقى لها مكان تنام فيه ،، واخيرا خذت صالح بحضنها ونامت بجنبه





وهي تفكر بالموقف اللي صار ، وتفكر بجشع وبخل ابوها واخيرا فكرت بوضع امها واخوانها ، وتذكرت آخر يوم كانت معهم
كان متعب من النوع المتسلط وتوقعت انه بيكون سبب لقلق امها وانهم يعيشون في جحيم مع ظهور متعب المفاجئ اللي خلى حياتهم تنقلب رأساً على عقب

وبعد تفكير طويل استسلمت للنوم




،،،،،،،،،،،،،،،،،،،،،،،،





خالد وواضح عليه ضيقة الصدر : هاه حجزتوا ولا لا
متعب : الحجوزات عليها ضغط وخالتي الله يطول بعمرها تقول ما تاخذ عمره الا شهد وسلمان ( الصغير اخو خالد) معها
خالد بملل : خلها تاخذهم
متعب : وش تقول انت ، تبينا نعتمر ولا نجلس ندور البزران لي ضاعوا وسط الزحام
خالد : دام نايف معك لا تخاف هو بينتبه لهم
متعب يبتسم لخالد : وش رايك نخلي سلمان وناخذ الدكتور خالد مكانه ، نستفيد منك
خالد : لا توكلوا على الله ، خلوني بحالي
متعب يمزح على خالد : الظاهر بعد الحبيبه يضيق الصدر
خالد بملل : اقول ، وش رايك تطلب الأكل بسرعه ، شكله الجوع مخليك رومنسي
متعب انفجر من الضحك : ههههههههههههههههه ،، عليك اخلاق اللهم ياكافي ، ماني لايمها يوم هجت من البيت
خالد يقلب المنيو يدور على شي ياكله
متعب يأشر للجرسون عشان يسجل طلبهم
خالد : تصدق مالي نفس آكل
متعب : لا ياشيييخ ، بتاكل وغصب عنك ، ولا انت مو متعود على المطاعم الراقيه
خالد : انت رايق على الآخر
متعب يضحك : لا بقفل اخلاقي واحذف المفتاح بالبحر
خالد : تصدق احس اني بديت اكرهك
متعب : هههههههههههههههههههه
متعب يحاول يفتح اي موضوع مع خالد عشان يقطع الصمت : قبل كم يوم واجهت وليد مع واحد من قرايبه
يقول انه مسجل بنفس جامعتك ببريطانيا ، لكن هو تخصصه عظام
خالد بانتباه : وش اسمه
متعب : ماني متذكره
خالد : انا معي مجموعه شباب خليجيين كانوا معي من اول ، صحيح تخصصاتنا تختلف لكن بيكون سكنا واحد
متعب : وغير اللي بتتعرف عليهم ، بتحس انك بالسعوديه من كثرهم
خالد ابتسم : ذكرتني ايام بريطانيا قبل نتخرج
متعب : لاتذكرني الله يخليك ، احس انها اسوء مراحل حياتي
خالد يضحك : ههههههههه انا لو ادري ان طاري مشاعل يضيق صدرك كذا ، كان من يوم عزمتني وانا مسولف فيها
متعب ابتسم لخالد : المصيبه عمتي تبي تخطبها لي
خالد : ههههههه ايه تقوله ذاك الليل
متعب : ماشاء الله ، اشوفك صرت تضحك منت اللي من شوي
خالد : هههههه ياخي من صدمتي بموضوع خطوبتك انت ومشاعل ماقدرت اسأل كيف وليه
متعب : احلف بس ، اخاف اتزوجها ، والله لو مابقى الا هي
خالد : وعمتي وش عرفها فيهم
متعب : تعرف عمتهم اخت سعد ، ساكنه قريب من عمتي بالشرقيه ، واكيد شافتهم عندها
خالد : بس اللي واضح انها سحبت عليك ، ماعاد اشوف جوالك يرن بالساعات
متعب : شكلك ماسمعت عن حظر المتصل
خالد : ههههههههههههههههههه
متعب : تحرجني باتصالها ولي قلتلها شوي واكلمتس ، ماتفتهم القاها تتصل بأقل من خمس دقايق
خالد : لاااا شكلها هيمانه فيك
متعب : هههههههههههههههه





يتبع