بغرفتها تلقي نظره على شكلها بعد ما انتهت

لابسه بنطلون بيج ، وقميص مشجر متداخله فيه الوان البني مع البيج يوصل لنص الفخذ وفيه فتحات من الجنبين
ومسويه شعرها بشكل فوضوي ورافعته بالماسكه ، ومكياجها ناعم يناسب ملامحها ، واخيرا رشت من افضل عطورها ولبست جزمتها البيج ،، طلعت بتصحي عمر


فتحت الباب بشويش وراحت تصحيه بهدوء ، وهو صار يناظرها باستغراب
دانه : هههههههه بسم الله عليك ، خفت
عمر : ديونه متى جيتي
دانه : الحين جيت
عمر : يضمها وهو متعلق برقبتها ، لا تروحين ثاني الله يخليتس محد يلعب معنا
دانه : ما اروح لاتخاف ، وضمته بحب وعطف
صوت روان من بعيد : دانه ، شيماء هنا
دانه تترك عمر : حبيبي البس وانا بروح شوي واجي
عمر : طيب







بعد استقبال ام عمر لشيماء ، وتقهوو مع بعض
ام عمر : دانه خوذي شيماء لغرفتس خذوا راحتكم
شيماء : ولو ياخالتي مابينا خصوصيات عنتس
ام عمر : هههههه خليكم لوحدكم يمكن تجيبين راسها وتخلينها ترجع لوظيفتها
دانه : لا تجيبون طاري الوظيفه
شيماء : ههههه ولا يهمتس ياخالتي خليها علي






استغرب متعب من وجود ابراهيم ، جار عمه عبدالرحمن عندباب بيت عبدالعزيز


دخل البيت بعد سلم على عبدالعزيز اللي شبه مشلول ، يشوفهم لكن مايتكلم ولا يتحرك ، ورجع عايد موضي اللي كانت تجلس بالصاله ، سألها عن عبدالعزيز والعيال


وباهتمام : من اللي عند الباب
موضي : يمكن سواق شيماء خوية دانه
متعب حط يده على شعره بحركه تلقائيه : وش عرفكم فيهم
موضي : البنت زميلة دانه بالمدرسه وزايرتها ، وش اللي انت خايف منه
متعب بقلق : لا بس اسأل ، وبدى الخوف عليه من انتشار الموضوع وتكون فضيحه بالنسبه له وبنفس الوقت ماحب يوضح لموضي شي
لأنه مايبيها تعرف اي شي عن اهله
متعب : اهم ماعندي لا انتي ولا بنتس تقولون لأي شخص مهما كان عن علاقتي بعبدالعزيز
موضي : انت تعرفهم؟
متعب : ضيع الموضوع ، الدنيا صغيره والناس مرتبطه ببعض ولا ودي اي مخلوق يعرف عن الموضوع
موضي : وش نقول للناس ان شافوك معنا
متعب : قولو اللي تقولونه ، الزم ماعندي لحد يعرف علاقتي بعبدالعزيز ،،،،، انا بطلع مشوار وارجع بعد العصر



شيماء بعد ما انزلت هي ودانه شافت متعب من ورى الزجاج اللي بين الصاله والحديقه وواضح انه كان مستعجل
شيماء شهقت من الصدمه : متعب
موضي انتبهت لشيماء وتداركت الموقف ، وشو
دانه بقمة حيرتها : انتي تعرفينه ؟
شيماء ابتسمت بقلق : لا وش بيعرفني فيه ، لكن هو ولد خالة خطيبي ،، بصراحه استغربت وجوده
موضي وهي تحاول تسيطر على الموقف بشكل سريع وبابتسامه تحاول تخفي فيها التوتر اللي عم المكان
ايه متعب خطب بنتي دانه قبل يوم من مرض ابو عمر ،،،،، و انتي عارفه الظروف يوم ابو عمر دخل المستشفى واجلنا الموضوع
وتقدرين تقولين ان الموضوع خاص ماصار شي ، كان جاي يتطمن على عبدالعزيز
دانه التفتت لأمها بشكل سريع والأسئله تملأ وجهها
شيماء بينها وبين نفسها " اها عشان كذا ام خالد كانت تسأل عن دانه "،،، : يا قلبي يادانه ، الله يكتب اللي فيه خير ، ويقوم ابو عمر بالسلامه ونفرح فيكم
دانه ابتسمت وهي تحاول تجاري شيماء
شيماء تكلم موضي وهي تضحك : شكلنا احرجنا دانه بموضوع الزواج
موضي : ههههه ايه انتي عارفه البنات وحياهم
شيماء وهي متجهه للباب ومعها موضي : والله ياخالتي اني فرحت لدانه ومن بختها ماراح تلقى احسن من متعب
الكل يشهد بأخلاقه ومواقفه اللي تشرف مع اللي يعرفونه
موضي : اكيد يابنتي ، متعب رجال ولا فيه قصور
شيماء تسلم على موضي : مع السلامه
موضي : مع السلامه ، سلمي على الوالده
شيماء : يوصل







دانه بغضب : يمه وش لازمة الكلام اللي قلتيه
موضي : اجل وش تبيني اقول
دانه : قولي الصدق
موضي : الصدق وشو ، تبيني افضح الرجال اللي سترنا كلنا ورد روحنا علينا عقب ماطحنا
دانه : انتي كذا بتحطينه بمشكله مع اهله ، اقلها بيقولون خطب واهله مايدرون
موضي : يقولون خطب واهله مايدرون احسن مايقولون انه مو ولد جارهم اللي يعرفونه
دانه مكتفه يدينها : كان قلتي غير كذا ، في كل مره تخليني الشماعه اللي تتحمل غلطاتكم
موضي بعصبيه : ماجا على بالي غير كذا ، وانا ببلغ متعب بالموضوع قبل لا شيماء تقول لأحد
دانه بعصبيه : يمه لاتحرجيني مع الرجال
موضي : خليه يعرف الموضوع مني ولا يعرفه من الناس ، على الأقل يكلم اهله انه كان بيخطبتس وماحصل نصيب
دانه حست انها في كل مره يزيد حقدها لأمها اللي ماتراعي مشاعرها ولا حاسبه لها اي حساب