اولا نقول كل سنه وانتم طيبين المهم اخوكم بالله نزل الديره اول
ايام العيد بعد صلاة العشاء الديرة تبعد تقريبا 180 كيلو من المدينه الي ساكنها طبعا لمعايدة بعض الاقارب وفي نفس الوقت عندي شغيلات ابي اخلصها مره وحده المهم انتهيت من المعايده ومن الشغيلات الثانيه ورجعت المدينه الي ساكنها ووصلتها تقريبا قبل المغرب مالكم بطواله نزلت من السيارة ودخلت البيت قلت بستنى لين اصلي المغرب وبعدين بمدد ارجولي وانتم بكرامه وريح الجسم شوي من بعد التعب والسفر المهم وانا استنى الصلاة قلت خليني اتصل على فلان وعايده قمت من مكاني ودورت الجوال ماحصلته قلت اكيد انه بالسيارة كعادتي دايما انساه المهم اتكاسلت اروح اجيبه قلت بعدين صلت المغرب وتمددت وراحت علي غفوة وجات صلاة العشاء وانا لسى بالغفوة والله ماصارت غفوه المهم البيت كله هجود العيال وامهم نايمين تعرفون خربطة نوم بعد رمضان الله يعيده علينا وعليكم بالصحه ورضاء الرحمن المهم صحيت على دق جرس الباب قمت فتحت الباب الا
هاذا جاري جاي قلت اكيد بعايد ويروح المهم طول الرجال ماراح شوي والجرس مره ثانيه يدق فتحت الباب الا
هاذا واحد من الربع قلت حياك الله اقلط مااخذنا دقايق الا والباب يدق فتحت الباب الا كم واحد من زملائي يالعمل جايين مع بعض دخل في الشك وراح بالي بعيد صاروا يكلموني وماني معاهم المهم صار الجرس يدق كل شوي والضيوف بكثره لدرجة اني طلعت بعضهم للحوش لضيق المجلس المهم قلت بنفسي اكيد فيه شي بس مستحي اسالهم لاانها ماهي من عادة العرب تسال ضيوفك ويش عندهم المهم والضيوف يهرجون قال واحد فيه انا والله كنت بنزل ديرتي بس يوم جاتني رساله من جوالك ان العشاء عندك الليله قلت بتعشاء ونزل الديرة بعدين المهم لما سمعت كلمة الرساله نزلت على طول السيارة لقيت القزاز مكسور والجوال ماله أثر والسروق حسبي الله عليه جالس يرسل رسائل للرقام الموجوده ومخزنه في الجوال ويعزم الناس حسبي الله عليه وخسرني قيمة طليين بعد خسارتي بمقاضي
العيد ويادوب احصل عشاهم عن مطبخ اعرف صاحبه ومقدم النص والباقي اخر الشهر ومااقول الا حسبي الله ونعم الوكيل
تستطيع المشاركة هنا والرد على الموضوع ومشاركة رأيك عبر حسابك في الفيس بوك