منتديات شمس الحب - عرض مشاركة واحدة - قـــصــــــة جـــنــــيـــــه شــــــــــاعره وعـــاشــــــــقه

بقايا عشق · منذ /12-13-2012, 09:20 PM

قـــصــــــة جـــنــــيـــــه شــــــــــاعره وعـــاشــــــــقه

هذي سالفة سمعتها من جدتي وحنا مسافرين ذكرتها لنا وعجبتني وحبيت اعلمكم فيها قـــصــــــة جـــنــــيـــــه شــــــــــاعره وعـــاشــــــــقه

هذا طول الله عماركم رجال شاطري يقاله العظامي من اهل المطاوي اللي على خط ساجر من صوب نفود السر

المعروف انها قريه يسكنها الشطر من الصعبه من مطير كان فيها بويتات طين ومن ظمن هالبيوتات بيت العظامي

وفي احد الأيام نزلو اهل المطاوي للفيضه فيضة الارطاوي ونزلو هناك الشطر مع بني عمهم المهالكه ..

اما العظامي تأخر باللحاق مع جماعته وكان عنده اخت تدعى مضاوي قالها يامضاوي زهبي غرضانتس وزهابتس ترى

مع الفجر حنا ماشين للفيضه عند جماعتنا قالتله ابشر ,,, قال انا بروح الأرطاوي ومع الفجر بعود لاتنسين شي أبد

ويطلع ويروح للأرطاوي ويترك اخته لحالها بالبيت وهي تقوم تزهب كل الأغراض وترقد ويوم جا نص الليل وهي تسمع

خرشه عند باب البيت وهي تقوم وتولع السراج وتروح يم باب البيت وتفتح الباب وتلقى اخوها راقد عند الباب

وتقول أبوك للنار وش مرقدك هنيا ؟ وهو يعطيها قفاه وهي تدخل وتكمل نومتها وتقوم على صلاة الفجر وتروح

تبي تقوم اخوها من النوم الا اخوها ماهو موجود وهي تسمي بالله وتعوذ من ابليس وتدخل وتصلي وتعين من الله خير

وتطل مع الباب الا اخوها مقبل من بعيد معه بعيرين ويوم وصل عند الباب وهو ينوخ البعارين ويدخل ويقول

هاه زهبتي غرضانتس ؟ قالت ايه مير انت وين امسيت البارح ؟ قال عند خويي بالأرطاوي قالت بسم الله علي ؟؟

هماك راقدن عند الباب وازهمك وتعطيني قفاك ؟؟ قال متى قالت نص الليل ... قال ايه ايه المهم بس هاتي الاغراض

خليني اباحملها على البعارين وهم يحمولون اغراضهم ويمشون لين نزلو بالفيضه عند جماعتهم وهو يقول لأخته انا بعود

للمطاوي أبجيب الرحى نسيته قالت مالنا فيه لزوم وانا مخليته بالبيت كانك تبي ادور لك من جماعتنا قال لالا انا بروح

قالت ماتشوف شر وهو يروح ويوم وصل في الليل ويشوف من بعيد ضو في وسط بيته وهو يجي يسبر مع شنق الباب الا حرمه جالسه

لابسه ثوب خضر وتطحن بالرحى وتغني تقول /

لولا العضامي ماسكنا المطاوي = ياويل من حب العضامي تبلواه

يوم سمع كلامها وهو يهج لجماعته ويحلف مايعود للمطاوي وراح مع المهالكه وسكن معهم بالارطاوي الا هذا اليوم

وبيت العضامي موجود الى الان في قرية المطاوي ويقال ان اللي تطحن وتغني جنيه كانت عاشقه العظامي ..

قـــصــــــة جـــنــــيـــــه شــــــــــاعره وعـــاشــــــــقه

واتمنى ان تنال اعجابكم تقبلو تحياتي ..

الموضوع الأصلي: قـــصــــــة جـــنــــيـــــه شــــــــــاعره وعـــاشــــــــقه || الكاتب: بقايا عشق || المصدر: منتديات

شمس الحب

تستطيع المشاركة هنا والرد على الموضوع ومشاركة رأيك عبر حسابك في الفيس بوك

المصدر: منتديات شمس الحب - من قسم: سلة المحذوفات والمواضيع المكررة

rJJJwJJJJJJm [JJJkJJJJdJJJJJi aJJJJJJJJJJhuvi