ياقـايل(ن) تكـفـى بتكفـى شقـيـنـا = ياما لاجل تكفـى لقـينـا المضــرات
ياما لاجـل تكـفـى نزلـنـا ورقـيـنـا = وياما تجشمنا الدروب العـسـيـرات
تكفى ترى تكفى دمار(ن) عـلـينا = تكفى دمار اهل الـكـرم والمــروات
باسبابهـا صرنـا لهـم كـافـلـيـنــــا = ولاجـنينـا الا الزعـل والغـرامــــات
وكم ليلة(ن) لعيون تكفى سرينا = نسري لاجل تكفى على غير مشهات
وياما حملنـا ارواحـنـا في يديـنــا = والعـمـر ماياقـاه كثـر المـــــــدارات
وكم غالي(ن) لعيون تكفى عطينا = نعـطي ولا نحسب حساب الخسارات
وان قلت تكفى قلت ابشر وجـيـنـا = نجـيك لو دونـك بحور(ن) غزيـرات
نسوق لاجـلك كل شي(ن) ثـمـينا = نجـيـبهـا بالمـال والا الوجاهـــــــات
على الـبـلا نصبر إلـى مـن بـلـيـنا = نصبر على شـيل الحمول الثـقـيـــلات
لاتستغـل الحلـم والطـيـب فـيـنـا = الحـلم له حــزه وللـطـيـب حــــــزات
كم جاهل(ن) لعيون تكفى نصينا = وكبرت بعين الجاهليـن التفاهــــــات
الجهـل أعـيَـى كـل طـبٍ مكـيـنــا = من عصرادم لين عـصر الحـضارات
اخشى عليكم ساعة(ن) تعـترينا = نسرج بها خيل الجهـل للجهــــــالات
دام الدواء جهل(ن) على الجاهلينا = نجهل جهل اعوام في ظرف ساعات
نجهـل وحـنا للجهـل كـارهــيـنــــــا = مضـطر والمضـطر يرقى الصعـيبات
ياللي تقول الحـزن خيم علـينــــــا = الحزن بعض احيان للنفس مـلـهـات
شعر/
احمد بن عبدالرحمن العريفي
(نديم المجره)
تستطيع المشاركة هنا والرد على الموضوع ومشاركة رأيك عبر حسابك في الفيس بوك