السلام عليكم ورحمة الله وبركاته
اسعد الله اوقاتكم بكل خير يارب
حدثني احد الزملاء عن سفره له لاحد دول الخليج وتفاجأت من صراحته وحكمته بكل امانه وشاركنا الحديث احد الزملاء اب لعائله كبيره واكد لي تجربة الزميل انها هي فعلا الصحيحه
زميلنا ذهب لاحد دول الخليج بعد الحاح من زوجته بالسفر وكان الرجل معه مبلغ مايقارب الثمانية الاف ريال حسب كلامه يقول عندي فواتير والتزامات خاصه بي
المهم ان الرجال قال لزوجته انا ترا ماعندي الا خمسة الاف الباقي ترا كله فواتير ولا ني رايح اتسلف من فلان وعلان
خلي السفره بعدين الطياره كم بتكلف ومن هالكلام
يقول قالت لي يصير خير
يقول ساعه بس الا هي جايتني قالت فلان قلت هلا قالت ماله داعي طياره والفنادق حصلت اسعارها حلوه اربع ليالي بتكلفنا تقريبا الفين ريال والاكل والشرب ترا كلها وجبتين لما نصحى والعشاء والتمشيه كوفي خفيف
المهم ان الرجال توكل على الله وبسم الله ماشاء الله مسك الخط وحط رجله ووصل للديره وعلى حجز البوكينج ودفع وقضى يقول رجعت مادفعت الا مبلغ اربعة الاف ريال بالضبط تمشيه وسعة صدر ووناسه
قام ابو العائله شاركنا الكلام قال انا عائلتي كبيره وانتم عارفين
الصيف وكل شوي قرق وكلام من العيال والحرمه نبي نسافر نبي نروح يقول اوفر مبلغ حد ادنى والباقي اخليه للضروريات اللازمه
واجي اقول ياعيالي راتبي كذا وكذا وكهرباء كذا وكذا يقول اعطيهم بالهلل
وترا اذا بتسافرون ترا ميزانية السفره مبلغها كذا تبون نجلس يوم نجلس يومين ثلاثه اربعه انتم اللي تبون تتحكمون
ان بغيتوها يوم احجزوا في افخم فندق على حسب المبلغ واطلق مطعم عشاء نتعشى والسوق واحلى مقاضي بعد واليوم الثاني راجعين
يقول كلن في جواله وكلن يبحث عن المطاعم الحلوه واللي اسعارها مناسبه
يقول نجتمع وكلن يعطينا من اللي براسه فلان قال الفندق الفلاني ورد عليه فلان هذا افضل وارخص سعر واتفقنا وصارت كلمتنا وحده وتوكلنا على الله
بكذا وفرت على نفسي مبلغ اخليه للوقت وضروريات الحياة والشي الثاني صارحت عيالي وانبسطنا ورحنا مقتنعين
وكمل حديثه يقول بعض الاباء يكون شحيح على ابنائه لما يروح يصيف مثلا باحد المدن لدينا يبحث عن شقق بارخص سعر ويستاجرها وكل ماتكلموا عياله نبي ونبي راح ودفع جلس يومين ثلاثه الا هو مطفر واتصل فلان بالله حولي مبلغ
رجع وعليه ديون وحالته حاله مافيه مصارحه بينه وبين ابنائه
وكل ماتكلم احد من عياله قال لا هذا غالي خليه وانا مامعي الا خمسميه ترا طبعا مو بخل بس طمع بانه يبقى مبلغ زائد ويكذب على التابعين معه سواء زوجته ولا ابنائه وبالاخير مديون
فاعجبني كلام الزملاء الاثنين وحبيت انقل لكم تجربتهم والموضوع للنقاش
تستطيع المشاركة هنا والرد على الموضوع ومشاركة رأيك عبر حسابك في الفيس بوك