 منذ /09-01-2018, 01:52 PM
|
#1 |
| رقم العضوية : 249 | | تاريخ التسجيل : 4 - 4 - 2008 | | المشاركات : 216,906 | | الحكمة المفضلة : Belgium | | SMS : | |  في يوم من ايام الشتاء القارصه خرجت لطلب الرزق في الصباح الباكر
صحيت من النوم قبل صلاة الفجر وافتح باب المنزل الا وارى الامام يمشي متجه للمسجد يبي يفتحه قبل صلاة الفجر ب20 دقيقه
واتوضأ واذهب الى المسجد كان الجو باردا جدا في العقارب
المهم دخلت المسجد
واحصل الامام جالس مع رجل اخر حارس مستشفى رجل دين وخير مااشاء الله عليه
ويتحدثون عن امور الدين
واسلم
عليهم
وادخل واصلي صلاة التهجد قبل الاذان
صليت ثلاث ركعات
وجلست اقرأ ماتيسر مما احفظ من القرآن واكرره خشية ان انساه
ثم حضر الامام عند المكرفون واذن ونحن نردد خلفه
ثم وقفنا وصلينا سنة الفجر واطلنا السجود ودعونا الله
وتباكينا او بكينا حتى سحت منا الدموع ثم جلست واركيت ظهري على سارية المسجد واخذت مصحفا وقرأت منه ماتيسر لي حتى سمعت الامام يقيم الصلاة طبعا هو امام ومؤذن في نفس الوقت
بعد الفراغ من الصلاة جلسنا نسبح ونهلل ونتعوذ من الشيطان الرجيم ثم اخذت كتاب رياض الصالحين وقرأت فيه حتى طلعت الشمس وخرجت الى المنزل
ثم مسحت الثلج عن زجاج سيارتي وادرت محركها ثم اتجهت الى جاري شايب كبير ويجتمع عنده شيبان كبار سن اجلس معهم واخدمهم واتسانس بسوالفهم ودعواتهم الصالحه لي بالتوفيق واثناء جلوسنا دخل علينا شايب من منطقه اخرى لااعرفه لكنهم يعرفونه الشيبان
جلس الشايب في صدر المجلس واحضرت بعض الحطب وزودت فيه النار حتى يتدفى
وصبيت له فنجال قهوه واعطيته التمر قلت اقدع ياعم تمر وسمر واسم حمر قال والنعم فيك ان اشهد انك وافي قلت نتكرم من كرم غيرنا هذا مجلس ابو سلطان طال عمرك وهو راع المحل حنا معازيب قال ابو سلطان لا ياعقاب انت راعي محل وتمون وانت ولدنا قلت تسلم يابو سلطان انا اشهد انك كفو ومجلس عامر يدهلونه الرجال ماهو مثل مجالس بعض الناس اللي مغبر مغير تنظفه الخدامه وتقفله
طبعا الشايب
قال ياجماعة الخير انا عندي ارضين ابغى ابيعهن ولاادري كم يسون
قالو الشيبان
شف عقاب عنده مكتب ويترزق الله
قلت ياعم عطني الصكوك
فااعطاني الصكوك
وشاهدتها عرفت ان الاراضي تسوى قيمه قلت ياعم ماسيمن منك قال ماسيمن
فسمتهن منه بالمقسوم وباعني وقلت استرح ياعم ابي اروح لكتابة العدل اسجلهن وامر البنك اصدق لك شيك بالمبلغ واذا اتصلت عليك تعال علشان نفرغ
خلصت اموري واتصلت عليه وجا وافرغ لي
وبعد مااستلمت الصكوك بإسمي ويلحقني واحد شغال بكتابة العدل
قال يااخي الاراضي هذي ادورها من زمان وطلعت اسم راعيها لكن سألت عنه وبحثت عن رقم جواله ماحصلت له جوال
قلت هذا شايب جاي من هجره ومشتري مبطي ايام الرخص
ولاعنده جوال ولايعرفله
قال كم تبغى فيها ياعقاب قلت ماني بايع في هذا الوقت خلني اسأل واشوف واركد الرمي قال انت تبي تبيع بمبلغ كذا
طبعا مكسبي 250 الف ريال في الارضين قلت وراك شوي المهم بعت الارضين بمكسب 365000الف ريال سعودي في نفس اليوم
خلال ساعات فقط والحمدلله.
عَنْ صَخْرٍ الْغَامِدِيِّ رَضِيَ الله عَنْهُ قَالَ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: "اللَّهُمَّ بَارِكْ لِأُمَّتِي فِي بُكُورِهَا"
تستطيع المشاركة هنا والرد على الموضوع ومشاركة رأيك عبر حسابك في الفيس بوك
|
|
|  |