الغريبه في بلدان العالم عامه تحصل رجل المرور والشرطي وغيرها من القطاعات
ناس متعلمين ولديهم خبرة بالتفاهم مع الطرف الثاني وفوق كذا اخلاق مع الناس
بشتى اشكالهم وجنوسهم وطبعاً اجسامهم متناسقه
اما ربعنا لن اتحدث عن اجسامهم المعصقله اغلبهم
واللي بعضهم يملك السلاح بجيبه ولكن كرشته ماخذه متر قدام
وليس عن اسلوبهم فـ اغلبهم يتعامل مع الناس بتعالي وشايف نفسه دامه عسكري ولي كلمتي
المشكله جميعهم تقريباً ما يعرفون اللغه الانجليزية وهنا المشكله
صحيح بعض القطاعات تشترط لغه انجليزية والله اعلم كيف يتم قبلوهم
لكن شاهد بجهل العاملين بالقطاع المرور والشرطة باللغة الانجليزية
حتى الابتدائيه منها
طلعت اليوم قبل الظهر الى احد مراكز المرور فقط لكي اغير لوحه سيارتي
المهم كانت عند الحاسب الالي فكان امامي فلبيني تعب وهو يفهم العسكري وش يبي
مع اني موب لغتي الانجليزية عاليه لكن جيدة وفهمت وش يبي من العسكري
صحيح تعاطفت مع الفلبيني لكن في قلبي قلت يخسي اني اقول المشكله للعسكري
لاسباب اتحفظ ومنها ان العسكري ذا اللي بالشباك اسلوبه ولا اسلوب واحد بالشوارع
واي معامله يخلص لك يرمي الاوراق عليك وما يسملها بيدك مثل ما استلمها
يعني اسلوب تعالي وصراخ
وهالكلام اذكر من قبل 4 شهور مريت بموضوع اخر وسبحان الله الاسلوب نفسه
مازال يتعامل عليه
المهم العسكري قال " يا شباب احد يعرف وش يهرج ذا وفكونا منه "
الا شوي ويجي واحد من اصحاب الرتب العليا واعتقد اذا ما كنت غلطان بنجمتين
يصادفه من بعيد ويقول يابو .... تعال شف وش يقول ذا
قلت الحمدلله الله فرج للفلبيني بموضوعه رغم ان موضوعه يبي يطلع استمارة
للسيارة وعنده تصريح من الشركة ...
المهم جاء العسكري ذا ابو نجمتين وطلع هالكلام ولك التفسير " وات هذا يروح وين اس شركة انتا "
والباقي مشفر لانه كلام والله ما دري وش يقول جاب ام العيد باللغة
بالاخير يوم عرفت السالفه ماعنده سالفه ابو نجمتين وطال الموضوع
تدخلت لكن بحدود عشان ما ابي اوضح نفسي اني عارف ولا رديت المهم
بشكل بسيط وضحت الموضوع للعسكري وتم انهاء الموضوع للفلبيني
لكن استغرب هنا جهة حكومية ومراجعينهم من المواطنين والاجانب
وموظفينهم لا يتقنون اللغه الانجليزية حتى اكبر مرتبه
المشكله من الدولة توظف ناس تعليمهم ضعيف في قطاعات حساسه
ومهم ان يكون فيها اللغه الانجليزية بحكم التعامل مع الناس
لكن بالنظام العشوائي اشوفه خلل
لو انه بالقطاعات اللي لاتستاهل لغه مثل الجيش ولا الحدود اقول ممكن
لكن قطاعات مثل المرور والشرطة وما عندك لغه حتى ابتدائيه
مصيبه بصراحه وفوق كذا اسلوب لك عليه من التعامل
المواضيع المتشابهه 
" وات هذا يروح وين اس شركة انتا " لغة جديدة يستخدمها العسكري للتعامل مع الاجانب !! 
العرض الشجري
