مرت اسابيع على ملكة رند .. كل يوم يعدي عليها تحس بالحب و الامان اتجاه عبد الرحمن
يحميها من كل شي .. اتقربوا من بعض اكثر ويطلعوا مع بعض دايما بعد الدوام

رند ماسكة يد عبد الرحمن وتلعب باصابيعه
رند : امم بنتين وولد
عبد الرحمن : وليش مو ولدين وبنت
رند : عشان عاجبتني عائلتكم .. احسها كذه تكفي .. صغيرة وملمومة وياريت بعد يكون الولد اخر العنقود
عبد الرحمن : اممممممم اللي يجي من الله حياه الله
رند : وان شاء الله يكون مثل ما ابي
عبد الرحمن ابتسم : ان شاء الله

×××××××××××××××××××××××
وُرٌوْدْ عَلَىْ أَرَآضِيْ اَلْهِـيَـآأمْ
×××××××××××××××××××××××

كانت واقفه عند السرير قدامها شنطة .. و تروح وتجي من الدولاب للشنطة و تحط ملابس فيها
طلع زياد من الحمام و هو يشوفها على هالحال
راح لعندها و جلس في السرير قدامها يطالع فيها وهي تتكلم
رنيم : شوف هنا البناطيل وهنا البلايز وهنا البيجامات .. لا اشوفك تحوس الدنيا و تقربع الاشياء ابغا الشنطة مثل ما راحت مرتبه تجي مرتبة

زياد : حاضر
رنيم : ولا تنسى قبل لا تنام تعطي حقون الفندق الملابس عشان يكوونلك ياها .. وانا رح اقومك كل يوم
ولمن توصل المكان كلمني و لمن ترجع كلمني .. ابغا اتطمن عليك اول باول مو اجلس متحقرصة على عمري
زياد : هههههه ان شاء الله

بعد ساعات

لبس زياد و اتجهز و شال شنطته و جاي طالع ورنيم وراه
حط الشنطة وضم رنيم اللي دموعها بدت تنزل : انتبهي لنفسك حبيبتي .. ماابغا تمر ثانيه بدون ما اكلمك فيها
رنيم : وانت بعد انتبه على نفسك
زياد باسها : احبك
رنيم اتنهدت ودقات قلبها تزيد والود ودها تقوله يلا انقلع بسرعه : وانا بعد
زياد ابتسم : خلي الجوال جمبك عشان اكلمك
رنيم ابتسمت ابتسامة جانبيه : اوكي
طلع زياد و سكرت رنيم الباب و هي تتسند على ظهره لثواني بعدها راحت لغرفتها ترتبها عشان تروح للمكتب

×××××××××××××××××××××××
وُرٌوْدْ عَلَىْ أَرَآضِيْ اَلْهِـيَـآأمْ
×××××××××××××××××××××××

فتحت عيونها وهي تشوف الفجر يطلع على سماء السعوديه .. " الشرقية "
السما رايحة على بنفسجي و اشعة الشمس متوزعة من ورى الغيوم تحاول تنور هالاراضي
ابتسمت براحه وهي تشوف مستقبلها اللي ينتظرها هنا .. مستقبل انتظرته كثيــــر .. انتظرته بكل ثوانيه ودقايقه وساعاته وايامه ..

غمضت عينها و هي تتذكر اللي سوته خلال اليوم
طلعت مع ريما و دارين قضوا كل يومهم برا بما انه داليا مرتبه اشياءها من بدري وما وراها شي
كانت متردده كثير اذا تروح قبر فيصل والا لا .. لكنها اخذت ريما ودارين معها و راحوا
وقفوا هما بعيد عنها بشوي .. اما داليا فقعدت قدام قبره تتأمل اسمه المحفور على الحجرة
اتنهدت و هي تقرا على روحه الفاتحة و قامت بعدها
مشت وهي تتمنى تنسى هالطريق و ماعاد تتذكره مهما صار ورجعها الزمن للندن
ما حست انها ودعته بالطريقه اللي يستحقها .. فيصل كان جزء من حياتها وهو عايش وحتى وهو ميت

اللهم ارحم من اشتآقت إليهم اروآحنا و هم تحت الترآب

نزلت من الطيارة .. تبغا ترتمي في حضن امها وتشم ريحة ابوها .. و تغرق في عيون راكان مثل ما كانت تغرق بصوته لما تسمعه .. و بكلامه لما تكلمه
كل اللي بغته تحقق لها لما شافتهم .. دورت على راكان بعيونها لكنها ما لقته !!
راح ابوها حتى يجيب شنطها وداليا جالسه مع امها تسولف
لمحت شخص واقف ينتظر اغراضه هو بعد
دققت في ملامحه .. ياربي مو غريب عليها هالانسان !! .. رفعت حواجبها متعجبه من هذا البني ادم .. يا الله شكثر اتغيــــــــــر
داليا : دقايق ماما بروح اسلم على واحد زميلي واجي
ام داليا : اوكي

قامت داليا ووقفت عند هذا الشخص اللي ياشر للعامل على اغراضه حتى يشيلله اياها
داليا : فهد ؟
فهد لف عليها وهو يدقق بملامحها حتى يعرف مين هذي اللي تناديه .. لكنه عرفها بسرعه .. من عيونها الغامضه و ملامحها : داليا ؟
داليا ابتسمت : اخبارك ؟؟ يا الله مرة اتغيـــرت ما عرفتك في البدايه
فهد وهو يطالع فيها : والله انتي اللي اتغيرتي مرة كثير .. احلويتي وما عادت عيونك ذبلانه مثل اول .. خلصتي دراستك ؟
داليا : ايه الحمدلله
فهد : الف مبروك
داليا : الله يبارك فيك .. شصاير بحياتك ؟ اتزوجت
فهد : هههه لا عاجبتني العيشة لحالي
داليا : عاد انا عرسي قريب وان شاء الله انت اول المدعويين
فهد : ماشاء الله مبروك يارب و عقبال ما نشوف عيالك
داليا : تسلم وعقبالك .. اخبار معارضك ؟ قاعد تسوي هنا ؟
فهد : في معرض قريب قاعد اجهز له .. اشتريت اللوحات من لندن جاية مع واحد صديقي و هذي هي وصلت و ان شاء الله نشوفك هناك
داليا : ان شاء الله

طلعوا من مطار الملك فهد و داليا كل املها انها تشوف راكان باي لحظة
ام داليا : لمدة سنه كامله ما ابغاك تبعدي عني ولا دقيقه .. لو تعرفي قد ايش اشتقتلك حبيبتي
داليا : والله انتي الاكثر يا ماما .. ما تعرفي قد ايش تعبت هناك وانا لحالي
ام داليا : الله لا يعودها من ايام يارب
داليا : امين

×××××××××××××××××××××××
وُرٌوْدْ عَلَىْ أَرَآضِيْ اَلْهِـيَـآأمْ
×××××××××××××××××××××××

كانت قاعده على طاولة وسط المطبخ اعتادت تدرس عليها
سمعت اصوت وراها .. لفت لقته قاعد يشرب موية .. جا لعندها و قعد على ركبه قدامها و هو ينطق بصوته المطعون : والله كنت احبك .. اسف اني اذيتك و قاعد اعذبك بحياتك .. لكن انتي السبب .. انتي اللي جبتيه لنفسك يا مدى .. لو كنتي ما عطيتيني فرصة اني ادخل بيتك كان ما صار اللي صار .. لكن انتي بعد ما عطتيني فرصة اني اصلح غلطي واتزوجك .. قتلتي حبي و قتلتي قلبي اللي ماكان ينبض الا عشانك .. بس انا رح اريحك من هالحياه .. رح اريحك من العذاب اللي قاعده تعيشيه .. رفع يده اللي كان فيها الكاسه اللي شرب منها و ضربها فيها

صرخت باعلى صوتها وهي توخر اليد اللي عليها باقوى ما عندها .. ما حست الا بصفعة على خدها تفوقها
ام مدى : باسم الله عليك يا بنتي .. لا حول ولا قوة الا بالله .. لا حول ولا قوة الا بالله

ظلت ام مدى تقرأ على بنتها مثل كل ليله .. اتعودت وهي تقوم كل ليله على صراخها بسبب كوابيسها اللي تحلم فيها وما ترضى تتكلم عنهم

بعد ما رجعت نامت طلعت من الغرفه .. عكس ما كانت تسوي دايما بعد ما تقرا عليها تنام جمبها و تطبطب عليها كانها طفله صغيرة .. تبكي بنص الليل اما جيعانه او تعبانه او حرانه .. او تحتاج لحنان امها
طلعت لقت ابوها قاعد على السرير يقرا قران
قعدت جمبه انتظرته يخلص و اتكلمت بعدها
ام مدى : والله البنت كل مال و حالتها تسوء اكثر .. انا رأيي نوديها عند دكتور نفسي يفهم في حالتها قبل لا يفوت الفوت
ابو مدى : ايش شايفه البنت مجنونة ؟
ام مدى : فال الله ولافالك يارجال .. بس البنت تعبانه .. وتحتاج لدكتور يفهم في تعبها .. اللي صار لها مو هين .. كل يوم نصحى على هالصراخ و البكا .. لمتى بنتنا رح تظل على هالحال ؟
ابو مدى : لسة الحادثة مأثرة عليها يومين وتنسى
ام مدى : لا حول ولا قوة الا بالله .. من متى انت كذه ما تهمك صحة البنت ؟؟ كانت بسبب كحة تجري فيها على المستشفيات .. خلنا نستعجل قبل لا تروح البنت من يدينا .. والا والله انا اخذها و اعالجها و بعدها ما تعرفني لا انا ولا هي
ابو مدى : حسبي الله ونعم الوكيل .. خلاص ان شاء الله الصباح نروح

×××××××××××××××××××××××
وُرٌوْدْ عَلَىْ أَرَآضِيْ اَلْهِـيَـآأمْ
×××××××××××××××××××××××

داليا دخلت غرفتها .. اتروشت ولبست .. نشفت شعرها بالسشوار و اتمددت على السرير بتعب .. دنت نفسها حتى جوالها من الشنطة اللي رمتها على الارض جمب السرير .. فتحته و دورت على اسم راكان
قبل لا تضغط زر الاتصال سمعت دقات على البلكونة .. قامت لبست روبها و راحت ناحية البلكونة وفتحت الباب و طلعت .. شافت راكان واقف تحت و ياشر لها .. ابتسمت بفرح وبادلته الاشارة
اشرت له انه ينتظر واختفت بعدها .. لبى طلبها و قعد ينتظرها

داليا تطالع شكلها بالمرايا .. مافي وقت تبدل .. رتبت شعرها وفتحت الباب وهي تطالع السيب الفاضي .. امها و ابوها رجعوا ناموا .. طلعت من الغرفة ونزلت الدرج وطلعت من واحد من البيبان اللي تودي على الحديقة و مشت على شافته قدامها .. ما انتبه لها الا لمن جت قدامه بالضبط
مد لها الوردة اللي في يده .. ابتسمت : شكرا
راكان : ترا في شي داخلها
داليا طالعت في الوردة الكبيرة باستغراب .. مو شكلها في شي داخل بتلاتها !! .. باصابعها الباردة توخر البتلات .. حتى وصلت لنص الوردة لقت شي صغير يلمع .. دخلت اصبعها وهي تحاول تلقطه حتى مسكت طرفه و رفعته .. ابتسمت وهي تشوف السلسال على شكل قلب صغير الماس .. اخذه راكان منها وهو يفتحه و يلبسها اياه .. ابتسمتله بخجل و طالعت فيه
راكان انربط لسانه وهو يشوفها قدامه مافي شي بينهم
داليا نفس احساس راكان .. مو عارفة ايش تقول .. راكان اتجرأ ومسك يدها وباسها : وحشتيني
داليا : انت الاكثر .. ليش ما جيت المطار ؟ انتظرتك
راكان : اممم .. قلت هنا احلى .. والا ؟
داليا ابتسمت : ايه صح
راكان ظل ماسك يدها و قعدوا يتمشوا في الحديقة .. جلسوا على مرجوحة تحت شجرة يكملوا حديثهم
داليا : وانت ايش قلت لهم ؟
راكان : بعد شهر
داليا : حرام عليك
راكان : ليش ؟
داليا : مرة قريب ما يمديني اسوي شي
راكان : حرام عليك والله تعبت وانا انتظر
داليا : معليه حبيبي عشاني خليهم 3
راكان طلعت عيونه : تبين تموتيني انتي ؟
داليا : ههههه خليني اعرف اتجهز يوه
راكان : 3 شهور تتجهزي
داليا : ويادوب
راكان : خلاص شهر ونص
داليا : يعني مرة سويت شي ؟
راكان بوز : انتي عارفة من اول انه اول ما تجي رح نتزوج
داليا ابتسمت ومسكت خدوده : ياربي عاللي زعلوا
راكان : ........
داليا : ياربيي لا تزعل الحين تنكد علي
راكان : يعني انتي اللي ما نكدتي علي ؟
داليا : خلاص لا تزعل نخليه بعد شهر مثل ما تبي
راكان : لا خلاص ايش الفايدة نسوية بعد شهر وانتي من الاساس ما تبين ؟
داليا : ياربي امزح معك وانت على طول تصدق .. اعرف انه احنا اول ما ارجع رح نتزوج عشان كذه عاملة حسابي
راكان طالع فيها وما علق
داليا : شفيك تطالعني كذه
راكان : ابغا اعرف ليش الانسانه اللي قدامي تبي تذبحني

×××××××××××××××××××××××
وُرٌوْدْ عَلَىْ أَرَآضِيْ اَلْهِـيَـآأمْ
×××××××××××××××××××××××

صارت الساعه 10 الصباح بتوقيت السعوديه
ام مدى فتحت باب غرفة مدى تشوفها اذا جاهزة والا لا .. لقتها قاعده على السرير بدون حركة والكوابيس في راسها تدخل في بعض
ام مدى : مدى حبيبتي شفيك ما لبستي
مدى تطالع في امها بدون تعابير و ترجع تطالع قدام .. ام مدى قامت و طلعت ملابس لبنتها و لبستها و لبستها عبايتها .. قومتها معها و نزلوا
ركبوا السيارة حتى وصلوا قدام المستشفى .. مدى طالعت في المبنى وما علقت بتعابير حتى تعلق على كلمة
طلعوا امها و ابوها من السيارة ومسكوها و طلعوها معهم

دخلوا كلهم عند الدكتور النفسي و خلوا مدى مع الممرضة
الدكتور شاف مدى تدخل الغرفة مع الممرضة : اتفضلي يا مدى
قعدت مدى على الكرسي و الدكتور صار يسألها اسئلة لكنا ما جاوبت على ولا واحد منهم
الدكتور اشر للمرضة انها تطلع ام وابو مدى .. حتى قعدت مدى لحالها مع الدكتور

الدكتور : ايوة يا مدى .. تقدري تتكلمي
مدى : ……………

كان كل سؤال يسأله الدكتور لمدى ما كانت ترد عليه الا بصمت .. تعب صوتها من الصراخ و البكا و الانين
الدكتور ما كان يقدر يتكلم كلمة او يشور عليه بمشورة او يعطيها طرق بدون ما يفهم منها اللي يبغا يفهمه
لكن مدى ما كانت تستجيب

مدى كانت منزلة راسها و قابضة يدينها .. صارت كتوفها تتحرك بسبب البكى و دموعها كانت تطيح على يدها .. كان مجرد بكى بصمت .. لكنه اتحول لانين .. شوي صار شهقات .. الى ما وصلت لصراخ

الدكتور كان يطالعها .. يبغاها تبكي .. بس في نفس الوقت عامل احتياطاته حتى ما تخطر حالتها اكثر

ام و ابو مدى برى مع الممرضة يبغوا يدخلوا يشوفوا بنتهم اللي صراخها واصل لعندهم .. لكن الممرضة مانعتهم

لدقيقة كان الوضع على ما هو .. لكن بعدها صارت مدى قادرة تسيطر على دموعها و بدت تقلل منها حتى وقفت بكى

ارتاح الدكتور و بدأ يبغى يجرها بالكلام .. لكنه طنشته وقامت و فتحت الباب و طلعت ودخلوا امها وابوها الغرفة

الدكتور : اتمنى انكم ما تخلوها في غرفتها وقت طويل .. خلوها تمارس حياتها طبيعي .. في البداية اكيد رح تعاند وترفض ورح تفضل ان تقعد بغرفتها .. بس بالهدوء حاولوا تقنعوها

ابو مدى : ان شاء الله
الدكتور : وعندك رقمي و انا في الخدمة .. واعطي كرتي لمدى وانا متأكد انها رح تتصل علي ووقت ما تبغى تجي لا تردوها .. الله لا يهينك يا ام مدى خذيها وتعالوا على طول وما افضل انها تجي لحالها

×××××××××××××××××××××××
وُرٌوْدْ عَلَىْ أَرَآضِيْ اَلْهِـيَـآأمْ
×××××××××××××××××××××××

هنا انا اقلب الصفحة لاكتب احداث شهر جديد تتقلب فيه الاحداث .. ولكنني ترددت وانا اتذكر حدثا مهما

حدثا غير من حياة شخصية من شخصيات الرواية

.
.
.

بعد هالصباح .. مرت الايام محد حاس فيها
نركز على رنيم وزياد
رنيم مفتقده زياد كثيـــر بالرغم من نفورها منه لما يقرب منها .. لكن احساسها انه مو معاها بالبيت مضايقها
اليوم صار يمر بشكل بطيء وبلا فايدة
تروح الدوام ترجع بالليل تنام و هكذا ..
رنيم ما داومت اليوم و قعدت في البيت .. تحس بالكسل و الخمول و بارهاق فقررت انها تقعد بالبيت هاليوم
اما زياد اللي كان يومه حافل بالاشياء المهمه اغلبها عبارة عن شغله و الباقي مكالماته مع رنيم .. رنيم تحب انها قاعده تشتاقله من صوته وودها يكون جمبها الحين حتى تضمه و تتدلع عليه .. لكن الحقيقه انه لو جا رح تنفر منه كعادتها الاخيرة

لكن اليوم !!
خرج زياد مع فارس " زميل اتعرف عليه "
فارس : يوووه شكلي نسيت المحفظة في الفندق
زياد : ما عليك انا عازمك امشي بس رح تلصق بطني بظهري من الجوع .. تصدق حتى انا ناسي جوالي !!
فارس : انت ما شفت شلون طلعنا من الفندق .. زين اننا اتذكرنا نلبس على كثر ما اتأخرنا
زياد : ههه من جد
دخلوا فارس و زياد مطعم من المطاعم السريعة يطلبوا منها غدا يتغدوا و بعدها يرجعوا لشغلهم
فارس : اففففف شهالريحة ؟
زياد حط يده على خشمه : تجي ندور مطعم ثاني ؟
فارس : لا يا شيخ لا نتأخر مثل الصباح خلنا نطلب ونطلع ناكل برا والا اي مكان ثاني
زياد : تدري شلون .. خذ .. اطلب لي مثلك انا بروح اكلم من الكبينه
فارس : اوكي

قعد فارس يطالع بالمنيو على بال ما يجي دوره و يطلب .. وطلع زياد من المطعم ووقف عند كبينه الاتصالات اللي بالشارع اللي قبال المطعم

طلب فارس طلبه هو و زياد و ظل واقف ينتظر يجيبله اياه

لكن !!

تعالوا نروح عند رنيم حتى نعرف ايش اللي صار

رنيم طلعت من الحمام مكشره من صوت التلفون اللي مو قاعد يسكت
- بعد الترجمة -

رنيم : الو ..
مازن : رنيم ؟
رنيم : نعم مازن
مازن يضرب باضافره على السماعة متوتر : امممم ابغاك في موضوع مهم .. لازم نتقابل مكان
رنيم : بسك خشخشة مو سامعه شي
مازن نزل يده : تعالي المكتب ضروري
رنيم : مازن مالي خلق اشتغل اجل الشغل لبكرى مو رايقه اليوم
مازن : المسأله مو مسأله روقان .. يلا انا انتظرك لا تتاخري
رنيم : افف طييب

سكرت رنيم ودخلت الغرفة بدلت ملابسها وطلعت رايحة لمكتبها

دخلت لقت مازن قاعد عند لجين ينتظرها تجي
رنيم : نعم شفيك وجهك قالب الوان ؟ .. امشي داخل
فتحت رنيم الباب ودخلت و قعدت على الكرسي و قدامها مازن واقف
رنيم : اسمعك
مازن اتلبك : اممم .. رنيم ! انتي ايمانك بالله قوي مهما اقولك حاولي تمسكي نفسك لحد ما نتأكد من الموضوع
رنيم : رح تقعد تقولي مقدمات ترا مالي خلق .. ابدا بالموضوع على طول
مازن سكت لثواني .. يطالع بعيون رنيم و ملامحها المرهقه .. استمجع قواه اخيرا و نطق : اتصلوا فيني من شرطة ليفربول
رنيم زادت دقات قلبها : ليش شصار ؟؟ .. زياد فيه شي ؟!!
مازن اتردد و سكت مرة ثانيه
رنيم رفعت صوتها : اتكلم شصاير
مازن بلع ريقه : رنيم .. ز .. زياد كـ .. كان في مطعم و و
رنيم : ايه
مازن : اتسرب غاز و و .. انفجر الـ ..
رنيم صرخت : ايــش ؟؟ ..انت شتقول ؟؟ وزياد وينه ؟؟ شفيك انطرمت اتكلم وينه زياد ؟؟
مازن : انا حجزت رحلة ليلفربول عشان نروح و نشوف الموضوع ونتأكد
رنيم : شقالولك عن زياااد
مازن بلع ريقه .. رنيم وقفت وصارت قدام مازن .. دفته وهي تصرخ عليه : اتكلم مازن شقالولك ؟
رنيم خايفة يكون رد مازن عليها الرد اللي متوقعته .. تصرخ عليه حتى يتكلم ويقول كل شي الا هالكلمة
مازن : رنيم .. اذكري الله ترا ما الباقي الا الله
رنيم انكسر سد دموعها و انجرفت حتى صارت تجري مثل الانهار على خدها : ايش ؟؟ " رفعت صوتها " انت لايش قاعد تلمح مازن حرام عليك قول غير هالكلام ريحيني .. قولي انه زياد ما صار فيه شي
مازن : لا اله الا الله .. رنيم .. يلا رح نتأخر طلبوا مني اقلك نروح حتى نتأكد من الجثة
رنيم انهد حيلها بعد ما سمعت اخر كلمه .. اترمت على الكرسي و قاعده تطالع في مازن بصدمه

رنيم وهي مو قادرة تشوف شي من غزارة الدموع المتجمعة في عيونها : مازن انت كذاب .. لانه زياد اتصل فيني قبل 3 ساعات قاللي انه بخير .. قاللي انه مبسوط بهالكورس و ينتظر متى يرجع مانشستر عشان يشوفني .. زياد بخير ومافيه شي لا تكذب علي انا رح اكلمه حتى اثبت لك انك كذاب

لفت و رفعت سماعه التلفون لكن مازن اخذها منها : خلاص رنيم خلااص .. تعالي نروح و نشوف زياد حتى نتأكد اذا كان هالكلام صح والا لا

رنيم صارت تشهق بالبكا .. طلعت حرتها كلها في مازن .. تضربه وتصرخ عليه

مازن صار يسحبها سحب حتى تمشي .. الى ما ركبوا القطار و رنيم كانها ميته ما على خدها الا دموعها

تمسح دموعها حتى تقدر تشوف الخاتمين اللي في يدها

قعدوا على الكرسي اللي دايما يقعدوا عليه .. رنيم بدأت تتثاوب والنعاس محمر لها عيونها .. حطت راسها على كتف زياد وغمضت عينها .. ابتسم زياد على حالها .. طلع من جيبه العلبه وطلع الخاتم منها .. مسك يدها الباردة ودخله في اصباعها .. وحط الوردة في يدها الثانيه .. حست رنيم بيده ومسكتها .. فتحت عينها اللي كانت مغرقة بالدموع وتطالع في زياد ..
زياد يمسح دموعها بيده : ليش هالدموع ؟؟ قوليلها ما تنزل وانا معك ترى اغار
رنيم ابتسمت غصبن عنها وضمته بقوة فضت فيها شحناتها اللي ضاغطة عليها

رنيم فجأه صارب تبكي و تشهق الناس التفتوا عليها : ليش راح عني .. ليش ما اخذني معه .. ليش كذب علي و قال انه رح يقعد معاي طول عمره .. كان يقولي اذا انا مت رح يموت وراي .. انا مامت لسه عشان هو يموت

مازن : استغفري ربك رنيم لا تقولي كذه حرام

كانت رنيم تهدى لكن ذكرياتها ترجع و تهيج لها دموعها اكثر واكثر حتى ما سكتت ..

×××××××××××××××××××××××
وُرٌوْدْ عَلَىْ أَرَآضِيْ اَلْهِـيَـآأمْ
×××××××××××××××××××××××

نهآآية البارت