افكر هالايام اشتري ارض في مخطط الخير ابنيها استراحه خصوصا ان جزء منه واصله الكهرب لقيت قطع اسعارها من 250-300 الف
المخطط بمدخل الرياض على طريق القصيم بالضبط عند نقطة التفتيش واشوف الموقع بالخريطه فيه قبله اراضي شاسعه من شمال سلمان مرورا بكبري القوات الخاصه وصولا الى كبري صلبوخ ونقطة التفتيش
كنت اتابع الاسعار بمواقع النت مافيه اقل من الف ريال للمتر بشمال الرياض واللي طالع عندي بموقع واصف خلا مافيه لاشجر ولاحجر
ويعتبر مخطط الخير الارخص شمال الرياض يطلع المتر ب 300-400 ريال
عاد قبل اشتري قلت خلني امتر هالمنطقه على الطبيعه بنفسي لاني دايم اروح مع طريق القصيم
رحت اليوم الصبح والجو زين ولافيه زحمه قلت بشوف هالمنطقه على الطبيعه من شمال سلمان الى مالا نهايه لين يوقف الخط
مشيت بطريق عثمان بن عفان رضي الله عنه تعديت الكيلو الرابع والخامس والسادس والسابع ووصلت الى مشروع الاسكان اللي مدري من الخبل اللي بيسكن فيه ومدري ليه تركو ملايين الامتار فاضيه بشبك المطار
المهم ماعلينا
15 كيلو مشيتها من شمال سلمان لين وقف الخط اراضي يمين ويسار فاضيه وعدد محدود جدا من الفلل والاستراحات مبنيه
رجعت دربي ومسكت طريق ابو بكر رضي الله عنه شمالا لين وقف الخط نفس هالمسافه لكن ببداية الطريق فيه مخططات قائمه تقريبا بطول 3 كيلو وفيه كثافه سكانيه وبعدها الله لايوريك صحراء قاحله مدري من بيشتري منهم
رجعت ومسكت طريق الملك عبدالعزيز شمالا مشابه للي قبله
هذي بس بشمال الرياض بصراحه جا في نفسي ادعي على اللي باع الشريطيه ارض الله اللي جعلها لعباده وذا يشبك ويبيع بغيت ادعي عليه لو انه بقبره ميت والله حرام اللي يصير قال ايش ازمة سكن والله ان الاراضي اللي شفتها مطوره وصالحه للسكن انها تكفي اهل الرياض عشر سنين قدام
اانسدت نفسي وقررت اتريث بالشراء ولااروح لاخر الرياض دام الوضع كذا باولها والعلم عند الله النزول بيكون كارثي
والله اجبار الملاك بالبيع او دفع الرسوم قرار مؤثر جدا
ونتائجه بتظهر الشهور القادمه بشكل واضح
المواضيع المتشابهه 
بصراحه اللي يشتري ارض سعر المتر فوق الف ريال هالوقت غلطان 
العرض الشجري
