راحت الايام و الخاطر جزوع
والظروف تسوقنا ونسوقها
رحلة الدنيا ذهاب بلا رجوع
تحت الأرض اكثر من اللي فوقها
و الحظيظ اللي من الدنيا قنوع
عاقباً كل الفتن و طروقها
والله إني بالخوي ماني قطوع
والعهود الوافيه مابوقها
المحبة سحر والفرقا تلوع
كم عشيقه فارقت معشوقها
الحياه تطوّع اللي ما يطوع
مثل تطويع الرعاه لـ نوقها
والرحى تطحن محاصيل الزروع
والعيون تخيل نوض بروقها
الحياه تخلّي النايم يثوع
والأماني من قطف زملوقها
الحياة أفراح واحزان ودموع
والأمل نور الحياه وذوقها
تختلف روس الرجال من التبوع
والرجال تبين من منطوقها
بالسلوم وبالمذاهب والطبوع
دبرة الخلّاق في مخلوقها
وعادة الحاسد من الطيّب بشوع
يحسده في لقمته لايذوقها
كثرت عفون العرب من كل نوع
سمِّها ببطونها و شدوقها
مايبونك في سما العزه طلوع
والقوافل ما فيه شي يعوقها
الله أعلم وش ورى عوج الضلوع
السراير في بطن صندوقها
الردى له سوق تنصاه التبوع
و المراجل له أهل في سوقها
النخيل اللي لها تمر و فروع
طيّبه في طلعها وعروقها
والأثل لو له عروق و له جذوع
مابه إلا الدود يرعى عذوقها
الحياه دروس و الفجعه تروع
بكره الأيام تطوي طوقها
السنه مثل الشهر و لّا السبوع
والاوادم مالحّقت ملحوقها
أمس يوم السبت و اليوم الربوع
ماسرع من غيابها إلّا شروقها
أطلب الله في صلاتي وبالخشوع
كان ضاقت بي جميع طروقها
الذنوب كبار و الوالي شفوع
لو وصل ذنب البشر لحلوقها
المواضيع المتشابهه 
هديه لمنورى المنتدى 
العرض الشجري
