حواربين شاعر وعمته
 

وضحى الدخيل العواد تركت الشعر وكان ابن أخيها سعد السعود العواد يحب زيارتها بين وقت وآخر ويلقي على مسامعها البيت والبيتين وهي لا تقول شيئاً ، وذات يوم قال لها عندي قصيدة إن رديتي عليها فعندي لك حق ورأت وضحى أنه لابد من كبح جماحه ، فاستجابت وقالت : هات ما عندك فقال القصيدة الآتية ولما انتهى دعت أحد الأولاد فأملت عليه الرد وسنبدأ بقصيدة سعد أولاً ، قال سعد السعود مسندًا على عمته وضحى الدخيل العواد :


أمس القدم في مَرقَبْ أهل الشقا نط
ووسَّمت لك قــــــافٍ على أط وآطا

من لايعرف الغوص يبعد عن الشط
خللّي نغـــاص بغـــــــبته وانتبــاطا

أصير أنا وإياك في الشيل والحـط
كانــك على خـــبري بفكرك نشاطا

جفني ليا جا الليل بالنـــــوم ماغط
وأنتي جـــفونك كن فــــــيها خياطا

وَجْــدي وجــــــود أسير قوم مربط
قاموا يسوطــــونه بصِلف السياطا

إن صـــاح جــــــــلاده بجلده تسلط
وإن زاد تعـــــذيبه يزيـــــد العياطا

من قـــــام مثلي عن مكانه وفرط
ماعــــــــاد بالرحمة لرجليه ماطا

إليا حكى ما عـــــــاد يمدي تورط
وإليا سكـــت مافـــاد كثر الصباطا

مــــــن عجز لايرقى الطويلة يلقط
من حوضها من تحت يلقى البطاطا

شـــريت شي صــــــاحبه ماتشرط
ولاعن المقســـــوم خذت احتياطا

ولاي في وسط القشر سابقي عط
هذا الصحيح ولانــــــويت الغلاطا


وردت عليه عمته وضحى بالقصيدة الآتية :




يادخيّل قم دنّ حبرٍ مع الخط
واكتب سلامي وأحكمــــه باحتياطا

خبِّر ولـــد عمك وقـــــــــل لاتورط
ماينفع الرجـــــال كثــر المـــطاطا

وإليا وصلته قل عسى الوجه يلهط
لو عسّـــر الطــاروق نرقى اللطاطا

بيــــــوتنا مثل المخابيط تـنـــــــقط
من كوكبٍ مثــــل البحر مايـــــهاطا

كان أنت قوماني فانا أقول لك وط
ألحقـــك لو دونـــك عسام وغطاطا

ماشيل فوق الراس لازم يبي حط
يقعــــد بوسط الــــدار فوق البلاطا

تقـــــول لي لكِّـــن جفنــــك مخيـــَّط
ليتــــــك نشدت المطرحة والبساطا

لكنِّ يضــــــــرب ناظر العين مخيط
وإن جيت أغمض كن فيها حماطا

مـــــــايــنفعك زادٍ ليــا ماتــــخَرَّط
يقطعـــك يازادٍ بـــــــدون انخراطا

كان أنت ترجي لك خماجٍ ليـــا بط
عــــزَّ الله إنك مهمــــلٍ بانفــراطا

الناس تجني من ثمــــرها وتحتَط
تلقـــط مع التفــــاح خوخ وطماطا