وكان وضعنا الاجتماعي وسط وكثير من الاحيان تحت الوسط
المهم توظفت وكان راتبي 5400 بضبط وقعدت اجمع الريال على الريال اكثر من سنتين وكانت الحياه اللي انظر لها جميله ومليئه بالاحلام الورديه على الرغم من احساسي بذنب كل ما ادني مع ابوي على سفرة الاكل كنت احس بنظرات والدي الله يجعله في الجنه ولو انه ما يبين لي شي كأنه يقول يوم جات نفعته ويساعدني ما شفت منه شي
وطبعاً تجميعي وهدفي الزواج ماكانو يدرون عنه ولا كانو متوقعين اني مستعجل ويحسبوني زي غيري بطول شوي
المهم جاء مره ورحت سوق الغنم واشتريت للبيت ذبيحه وانبسط ابوي مني ذاك اليوم وانا من سعادة ابوي صار يومي عيد حتى يوم جاء الغداء قلت مع كل راتب لكم من عندي ذبيحه
هذي طبعاً كلها ذكريات وراحت
المهم بعد اكثر من سنتين قدرت اجمع حول ال 150 الف
ما وصلتها لكني حولها
ويوم جلسنا مره بعد المغرب مع والدي ووالدتي الله يجعلهم في جنة النعيم قلت بقول لكم شي ( ابي اتزوج ) امي تبسمت وتطالع ابوي
على طول ابوي قال خذ بنت عمك ذيك المجنونه وعمك ما بياخذ عليك شي قلت ليه يابوي وش اللي خذ بنت عمك انا ما ابي احد من اللي نعرفهم بعدها الوالده قالت طيب من اللي في بالك قلت والله ما اعرف احد لكن انتم اختارو لي
ابوي كان ضابط صف متقاعد من الجيش وشايل هم التكاليف في حال طمرتهم عند ناس بعيد
قلت لا تشيل هم انا مجمع 150 الف ولا ابي الا سلامتك
كنت احسب ان ذا المبلغ بيزوجني ويزود عندي شي اجمعه
ما اقول الا الله لا يعيد ايام اضيم
المهم عرفنا لنا ناس وتواصلو الحريم مع بعض
وجاء وقت روحتي انا وابوي وانا في سعاده عجيبه على الوصف
وعلى الحياه الزينه اللي تنتظرني وعلوووم واجد
ابوي كان متضايق ومتخوف وقلق من ان نروح لناس بعيد عنا شوي
المهم رحنا وقابل ابوي ابوهم واعجبه ابوي استقبال الرجال الله يرحمهم جميع ابوي بعد ماكان متخوف وقابل ذا الرجال المطلق الهب ريح انبسط حتى يوم رجعت انا وياه قال ابشر انه قام حظك
طبعاً ( عشت الجو ) وقمت اقول متى تمر الايام طبعاً كان فيه شوفه شرعيه بعدها موعد للملكه ولكن قبلها لازم يكون فيه اتفاق على امور الزواج
يالله استلم / بدينا بالمهر 70 غير اذهب هذي بس البداية
قلت لبوي وقتها كلمهم يخلونها 40 قال من بغى ادح ماقال اح
ابوي مبسوط من ابو البنت ولكن الحقيقه ان الرجال مابيده شي
والملعنه كلها عند الحريم
المهم وافقنا ويوم جينا نروح قبل الملكه بيوم قالو لا تنسون امها وانتم جايين 25 الف هذي امها اللي تعبت عليها واخوانها اكيد انكم عارفين سلوم اهل العرف
الخلاصه ان الموضوع تجاوز تخطيطي وانا حاط في بالي القصر
وابوي كان مواعدني يعطيني الملحق حق السطح ويبي له ترميم
المهم وصلنا ونثرنا الفلوس حقت 3 سنوات نثرتها في نص ساعه
شوي وجاء عم البنت الا ويطلع هو بعد يبي فلوس قسم بالله
عاد ابوي اعطاني صرافته وقال روح اسحب 5 الاف كسوه له
الله يرحمك يا بوي كان يصبرني ويقول دح وخرابيط
وحنا راجعين قال لي هذي طلعت نهابه مو زواج
وهم يعني انهم مسوين فينا خير قالو القصر مناصفه بينا
المهم املكنا وحددنا ازواج بعد 8 شهور
الخطوه الثانيه لي اجهز الملحق طبعاً كانو رافضين ان نسكن ملحق ولكن وافقو اذا كان مؤقت قلنا مؤقت
وجهزته عاد تصدقون اني يوم جيت اصبغه اختلفت انا والباكستاني على 100 ريال من الفقر وصبغته انا بنفسي
وذاك اليوم كنت ضميان واخرت شرب الماء لين اخلص الغرفه
ونزلت عند اهلي اشرب ولكن بعد فوات الاوان وطحت عليهم وشالومي ودوني المستشفى وفي المستشفى قصه ثانيه
شالوني اخواني وابوي وودوني اقرب مستشفى الحرس الوطني وحنا مو تابعين له المهم جاء موظف سعودي مدري مدير ولا مسئول قال استقبلوه شاف ابوي شايب وحالته حاله واخذ في ابوي اجر عظيم ابوي يحسبني بموت .
المهم حتى في الزواج نفسه كان فيه مشاكل على فلوس الطقاقات هم جابو عبند بسعر مرتفع بدون ما مدري وقالو جيبو فارس الاحلام ولد الراجحي يدفع طبعاً كنت احاول بقدر الامكان ما اطلع قرض ولكن حدوني عليه الحاصل يا جماعة الخير والله اني حاضر زواجي بثوب عادي ما فصلت ولا شماغ جديد والبشت متسلفه
والامور كلها كانت ز ق في ز ق
ودارت الايام وسنتين من العذاب بدون توافق
بعدها كلاً راح في حاله
وقعدت سنه ونص كانت اني تجيب الاكل لي في غرفتي لاني كل ماجلست مع ابوي يلومني ويقول ماني قايل لك ماني قايل لك
ويوم تجيب امي الاكل لي في الغرفه تقول بختار لك وحده مو زي اختيارنا الاول قلت طيب ما معي فلوس زي اول
الحاصل نزوجت وحده ثانيه وكنت احس انها ماهي زي الاولى
وسبحان اللي ساق ارزق لي معها
طبعاً اللي يقول النساء ما يختلفون الا والله يختلفون مثل ما الرجال يختلفون فيهم الهادي وفيهم العصبي
عملت في التجاره والارزاق بيد الله انعم الله علي نعم عظيمه ومن نعم الله انعمة على ابوي واخواني ولكن ازين في الحياه ما يكمل اول ما توسعت تجارتي وابوي بدا يحس بالعز توفى الله يجعله في الجنه والوالده توفت بعده ب5 سنوات والحين انا عيالي في الجامعه
والراس شايب والحياه اخذت منا حقها واخذنا حقنا ونسأل الله حسن الخاتمه .
المواضيع المتشابهه 
قصة زواجي قبل 28 سنه 
العرض العادي
