نصيحة


بسم الله ابدا القصيد
كل منظومٍ جديد
في مواريد النشيد
عندنا له مستقر

نبتدي باسم الإله
الله اللي لا سواه
جل شانه في علاه
مايخيّب من صبر

باسمه البر الرحيم
ربنا ربٍ كريم
سبحان الله العظيم
من أجل يحلو السمر

يالله إنا في رجاك
دون ذاك ودون ذاك
إنك ترزقنا رضاك
يامن بيديك القدر

زينة عرش الله سبحانه
وبحمده ما اعظم شانه
بالخير ايدينه مليانه
الله يكفي كل شر

يعلم الله سرّ عباده
التقي بالتقوى زاده
والعنيد يطيح عناده
لاتولاه الدهر

بعد ماطال الأمل
يامضاريب المثل
بالأمان وبالجهل
يااهل الدين الأغر

يااهل السلوم والقيم
والشهامه والشيم
حين حزات العدم
ياالرجال أهل الظفر

ياالشغاميم القروم
ياالرجال اهل السلوم
والكرامة والعزوم
كيف الفساد انتشر

لدّو لو نظرة بالعين
من يسار ومن يمين
ترون الخلّه بالدين
عظم كسر ولا جبر

مايجبره الا اهل العفّه
اهل إيمانٍ مابه خفّه
رجّح كلٍ منهم كفّه
كالقوي من الحجر

يااهل العفّه تكفون
ياللي ماكنكم تدرون
تذكّرون وتنسون
وانتم ترون الخطر

توّ مازان المجال
ياكريمين السّبال
في مجالات الرّجال
اللي ماترضى القهر

إعلوم القصيد اخذوها
إن جازت وإلا خلوها
للي يبيها ودّوها
ودّوها الرجل الأمرّ

رجّالٍ يبغى النصيحه
ويدوّر فرقى الفضيحة
ياخذ من هيض القريحه
نصيحة صدق الخبر

هيه ياراع الفلوس
ياللي عادتك الناموس
عظمك لا يدخله السوس
الحذر ثم الحذر

لاترغب عن دينك غيره
عزّه لاترضى تدميره
خلّك في راس الجديره
جنب درب المنحدر

للسائل في المال احقوق
خلك له لاجا شفوق
واليا عطيته برفوق
ترى الدنيا ذي ممر

أكرم باالمال أهل الخير
والضعيف والفقير
لايلحق نفسك تقصير
لو طال الطايل قصر

والايتام انفق واخدمها
في سبيل الله اكرمها
سلمها لله واسلمها
كريمٍ مدّ وعذر

اخدم بالمال الاسلام
وارفع راسك للامام
خلك للأمه مقدام
يوم الله زال العثر

احمد ربك على النعمه
لاياتي لك مالك نقمه
كم غيرك جا ماله سقمه
عبدٍ شبع ولا شكر

ابشرح قصته بالضبط
من أجل استنبطها نبط
للي يربط نفسه ربط
عن هوى نفس القشر

راح يدور للأرزاق
مَعَ مثله من الارفاق
والسوبر فيه السواق
ذاك المربوع الحمر

في وسط ذيك القصور
وصّاه العم الغيور
لا يلف ولا يدور
بيسافرعمّه شهر

واجتمع هو والورعان
والخدامه والنسوان
ينادون اقرب يافلان
على التلفاز السهر

وكلّ القنوات اترج
بالمفسدين الهمج
ومن السايق ما احد يضج
لابغى شيء أمر

رجال وحرمه وابليس
لامحرم ولا انيس
إلا سواق خسيس
من قال إنه ماغدر

والله لو إنه بهيمه
إن يستفحل في حريمه
و كلن منهم له وليمه
بين الشاطي والنهر

بيتن مليانن بنات
كاسياتٍ عاريات
مائلاتٍ ومميلات
وجه احدهم كالقمر

وأية قناةٍ شغّاله
تحتوي كلّ الرذاله
شاريها ابوهم برياله
افتضح ولا استتر

فوق البيت الدش إيشاف
يظهر جميع الأصناف
من أعرى وأخزى الأوصاف
والبنت تمد النظر

بنتٍ دم ابوها بارد
عن عرضه تفكيره شارد
مايفهم صادر من وارد
كالبهيمه بل أشر

رجالٍ هذا صنيعه
يجر أذيال الهزيعه
ودك مع الضان تبيعه
وإلا في حوش البقر

حياته في الدنيا نقص
حاله حسب احوال الطقس
بين الخمر وبين الرقص
راحت حياته هدر

صارت حياته كسافه
كل الشين بعينه شافه
مايقدر يَحمى ميقافه
تجني كفّه مابذر

يوم الله عطاه المال
خلّى طريق العقال
وانتهج نهج الجهال
حتى دمّر ماعَمَر

حتى اولاده أو احفاده
مايبغون إلانفاده
غابنهم فيهم فساده
هكذا منذ الصغر

هذا كله ويش اسبابه
اسبابه مبدا شبابه
اخطانا وأنتم ماصابه
باع اعراضه ثم خسر

لا ياخاتمة الشقا
ويش راح وش بقا
لاشرف ولا نقا
ولا يعذر لاعتذر

اللهم لاشماته
اسمع وش تالي حياته
سوى هي ويا مماته
نفسه للحسره مقر

عقب الشباب اصبح شايب
تنتظره عوج النصايب
ويله فيها من النشايب
إلا ان الله له غفر

قصة هذا هذي هي
هاذي خاتمة أهل الغي
يذهب شيء ويبقى شي
يبقى اليوم المنتظر

يبقى نهار القيامه
نسأل الله السلامه
من خواتيم الندامه
يوم كلا لاوزر

يومن تضعف فيه القوة
لا نسب ولا اخوه
ولا عند الخلق مروه
مامن جهنم مفر

حينما نصب الصراط
بانوا أهل الإنضباط
والزنا والإختلاط
كل مكنون ظهر

كلٍ ينتظر ماقدم
عزّتي للي تندم
من حريق عروقه والدم
للأبد يصلى سقر

أيها الإنسان اسمعني
لا انفعك ولا تنفعني
ولكن نصيحة يعني
إلى الله المستقر

آخر مطاف القصيده
ذات الأهداف العديده
الله يجعلها مفيده
تأتي للأعمى بصر

هذا من بعض اللي عندي
للدّين اعتبروني جندي
يقوى في سبيله زندي
أقوى من صمّ الصخر

يارشيدين العقول
آخر ماحنّا نقول
صلى الله على الرسول
عدّ مازاف البحر

عدّ كل ميت وحي
صلى الله على النبي
الأمي الهاشمي
سيّد جميع البشر