قالو تتوب وقلت بالطرف مصيوب
والله ماتوب وصافي الخد ماتاب
قالوا تحملت المواثيم وذنـوب
قلت الذنوب لها موازين وحساب
قالوا ترى مايفعل العبد مكتوب
قلت افهم الي تذكرونه يالاصحاب
قالوا جهلت وعقلك اليوم منهوب
وكشفت سرك بين ربعك والاجناب
قلت الهوى لقلوب الاحباب مرغوب
ايات حبٍ صورت وسط الالباب
قالوا بعقلك ضايع الفكر منكوب
قلت الموده ماتداويها الاطباب
عقلي معي ماني من العقل مسلوب
انا الغريق وكل شيٍ له اسباب
كان انكم تدرون بالي شفى ايوب
وجدٍ سطى بالقلب والحب غلاب
انا غريقٍ مع هل الحب منسوب
في زمرة العشاق بالحب منصاب
ماطف لي زادٍ ولا اريد مشروب
الي صفا لي صاحبي عسل الانياب
يغضى بعينه وافهم العلم مقلوب
واسري عليه بليلةٍ نورها غاب
ويرخص لي الغالي الى حل ماجوب
وعن القرايب حط لي ستر وحجاب
وابعدعن الشكه ولا انوش له ثوب
الا الحديث وقرعة الناب بالناب
اخاف يصبح زين الاوصاف معيوب
وهو عليه من الشرف كل جلباب
وعرضه نضيف ابيض ولا فيه عذروب
بولا حكوا فيه البعيدين واقـراب
عليه وجدي فايقٍ وجد يعقوب
وقلبي من اسبابه بوسط الحشا ذاب
يلومني من لاشكى حب نبنوب
طفلٍ قرونه ماتغطيه الاسـلاب
طفلٍ نهب عقلي بضحكات وعجوب
فتان لقلوب العشاشيق نهاب
اصبح هو الغالب وانا منه مغلوب
غدا بعقلي بين شاري وجلاب
ان كان شفته صفق القلب مرعوب
بالصدر كنه بين لاوي وجـذاب
والدمع من موق النظيرين مسكوب
يخضر ديارٍ ممحله عقب الاجداب
تستطيع المشاركة هنا والرد على الموضوع ومشاركة رأيك عبر حسابك في الفيس بوك