عيوني تباكا كنها مارد المياح
تصب العباير عبرة تردف العبره
على امي عسى مجري المباكير والارياح
يعافي بدنها بيده الامر والدبره
على صدرها بشويش يامشرط الجراح
لاصار انه يتعب جسمها غزة الابره
يادكتور بيدك روح ماهي مثل الارواح
محاكيك ماعنده جلاده ولا صبره
ترى وده انه قبل ماتجرح امه راح
على المقبره من ساعته ويحفر قبره
عساني فدى ماطا تعبها وهي ترتاح
واخذ ضيمها.. هداجة الصوت والنبره
غدى بيتها من بعدها كن فيه اشباح
خواطر هله مكسورتن به ومنجبره
عسى الله يردك فيه وتعمه الافراح
ويرجع على خبري وانا ارجع على خبره
وعسى اللي مابر بوالدينه وقام وطاح
على شانهم بين العرب ينقصر شبره
اخواااني
والدتي على السرير الابيض بالعنايه الفائقه
ارجو منكم الدعاء لها بالشفاء العاجل
وان يكتب لها اجر صبر الابتلاء وان تقوم سالمه غانمه
وترجع لبيتها متمتعه بالصحه والعافيه
وجزاكم الله خير الجزاء .
تستطيع المشاركة هنا والرد على الموضوع ومشاركة رأيك عبر حسابك في الفيس بوك