السلام عليكم
كل عام وانتم بخير
اانا كنت موظف في بنك الراجحي وتعرفت على شخص عميل كان عندنا بالبنك وصار بيني وبينه لقاءات ومكالمات وبعدها صرنا اصحاب وسافرت انا والشخص هذا لدبي ومن بعدها الرجال فاتحني بموضوع الشراكه بيني وبينه
هو عليه المال وانا علي العمل بحكم اني موظف بالبنك وعندي واسطات :
قصة الشراكه هي تسديد قروض العملاء اللي عليهم متاخرات او عليهم ديون المتاخره . انا وافقت من الطمع وحب المال . الرجال كان واثق فيني للامانه ولكن انا ماكنت واثق فيه قلت له اكتب لي ورقه ان المبلغ هذا بيني وبينك شراكه . قال تم وكتب ورقه ان المبلغ اللي بيننا هو شراكه
مرت الايام والاشهر وبعدها انا جحدت الرجال , ماصرت ارد عليه لان مالي وجه اكلمه الفلوس لعبة فيها وبنفس الوقت ربي ماوفقني فيها .. لاتسألوني كيف راحت وربي مادري . فص ملح وذاب على قولتهم
الرجال اشتكاني في المحكمه وحضرت الجلسه الثانيه وسألني الشيخ قال الرجال يقول انه مسلفك المبلغ الفلاني . قلت للشيخ غير صحيح . الرجال بيني وبينه شراكه وعطيت الشيخ الورقه موضح ان بيننا شراكه
المدعي رفيقي ارتبك وسأله هل الورقه صحيحه قال ايه صح . الشيخ صار يهاوشه يقول ليش تكذب
انا قلت للشيخ انا ابي ارجع للرجال فلوسه بس ماعندي . ابغى اسدده اقصاد . قال الشيخ بنحول القضيه للمحاسب عشان نشوف الفلوس وين راحت . المشكله موعد الجلسه بعد اسبوعين وانا مادري وش اقول للمحاسب والشيخ ؟
زبدة الموضوع يااخوان ؟ انا ابي ارجع للرجال فلوسه وبنفس الوقت خايف من السجن . هل فيه حلول ؟
انا ماعندي مشكله انسجن حتى الرجال ياخذ حقه بس المشكله انا الان طالب وباقي على تخرجي سنه ونص .. اقل شي ابي اتخرج وبعدها انسجن
هل فيه حل اني اسدد له اقساط؟
انا رجعت الى ربي وخايف ان الله ياخد روحي قبل مااعطي الرجال حقه . ولله ماقول هالكلام علشان اغطي على الخطأ اللي انا سويته ولاني خايف من كلامكم علي . لكن انا بجد ابي افتك حتى لو انسجن وبنفس الوقت ابي اشوف انسب الحلول لي وللرجال
نقاط نسيت اسردها لكم :
المبلغ هو 255 الف
تركت عملي في بنك الراجحي
المبلغ تم تحويله الى حسابي بدون شيكات ولا كمبيالات
انا مستعد لأسئلتكم
تستطيع المشاركة هنا والرد على الموضوع ومشاركة رأيك عبر حسابك في الفيس بوك