أخي المواطن تنبيه لك وتحذير من استغفال
محطات بترومين حسبي الله عليهم ونعم الوكيل ضحك على الدقون على شان هم اذا جيت تغير الزيت يغسلون الزجاج وينظفون السيارة من الداخل ويعايرون هواء الكفرات يسلخونك بالسعر
تخيلوا يا
جماعة الخير قبل امس دخلت سيارتي بي ام عندهم قلت غيروا زيت وسيفون قلوا ابشر بس السيفون مو عندنا قلت ابد بجيب سيفون من عند ابو يمن ورحت وشريت تجاري ب 45 ريال وهو ما يسوى 15 ريال ورجعت للفلبين حقين
بترومين قالوا تمام افتح الكبوت فتحت الكبوت وناظر في غطاء الزيت قال زيت موترك كاسترول مكتوب على الغطاء قلت بس تمام انت اللي فاهم راح وجاب لي زيت كاسترول اللي علبته خضراء مكتوب عليه ماجنتيك قال سيارتك تبي 8 علب قلت تمام بكم يا صديق قال العلبة ب 65 ريال ليش قال هذا سعره وهو افضل زيت للبي ام وتمشي عليه 10 الاف كيلو صدقت وغير الزيت وركب السيفون وطلع الحساب 520 حق 8 علب 65 × 8 =520
دفعتها وانا والله متوجع طبعا المهم يا الربع رحت اليوم للصناعية القديمة بالرياض طبعا الكلام هذا اصلح شغلات بالسيارة ودخلت محل قطع الغيار الاصلية للبي ام الا اشوف زيتي الاخضر اللي شريته في
بترومين عنده قلت خلوني اشوف بكم سعره سألت الموظف كم سعر الزيت قال العلبة ب 20 ريال والله انصدمت وتضايقت قلت عطني علبة اتفحصها ممكن انا غلطان جاب العلبة شيكتها حتى قوة الزيت 10/ 40 نفس الزيت ياولد معقولة قلت عطني ثمان علب طلعت ب 160 ريال وبالمرة عندك سيفون الوكالة قال نعم الوكالة الاصلي بكم سعره قال 35 اخذت 3 سيفونات اصلية ب90 عملي تخفيض عشان اخذت 3 قلت عشان لما اغير اطلع سيفوني من الشنطة يمكن اكون في سفر والمحطات تبيع زيوت وسيفونات مغشوشة
المهم شريت الزيت والسيفونات الثلاثة ب 290 ريال
حسبت علبة الزيت من بترمين ب 65 وبرا ب 20 اذا" 65_20= 45ريال الفرق يا
جماعة 45 ريال في العلبة يعني 45×8= 360 ريال لهطوها حسبي الله ونعم الوكيل مقابل ايش الخدمة ولا الوجاهة ولا عشان فلبنة كارثه والله والعالم على بالهم ان تغيير الزيت في بترمين رجع الموتر وكالة
لا حول ولا قوة الا بالله يا اخي المواطن اشتر كرتون زيت 12 حبة من زيتك اللي تغير به لموترك ما يكلفك شيء وسيفون الوكالة وخله بالبيت كل ما تجي تغير خذ وغير وعط العامل 20 ريال حق شغل ايده
بالعربي حنا ملعوب علينا والايام الجاية صعبة اهتموا يا
جماعة اهتموا اهتموا الهوامير اكلونا وضحكوا علينا وحنا يا غافلين لكم الله
انا كتبت الموضوع من القهر على حالي وحالكم وفقنا الله واياكم
على فكرة عندي صور للعلبة اللي شريت من الصناعية واللي من
بترومين لان فيه علبة بقي فيها النصف يوم غيرت الزيت واستخسرتها فيهم اخذتها معي
بس ما عرفت انزل الصور ياليت اللي يعرف ينزل صورة علبة زيت كاسترول ماجنتيك الاخضر قوة 10/ 40
تستطيع المشاركة هنا والرد على الموضوع ومشاركة رأيك عبر حسابك في الفيس بوك