انا انسان طبيعي بس الشي الغريب محد يذكرني يعني ان جيت ولا رحت عادي جوالي يجلس اسبوع محد يدق علي صح تعبت نفسيا من التهميش بس تعودت وصرت ماسولف مع احد ولا احب افرض نفسي ع احد
طبعا موظف حارس امن الشهاده لكم عليها
عندي عمي كبير العائله احبه حب جنوني و اقدره لرزانته وحكمته وتعقله واقاربي دايم يستشيرونه
اذا عنده مناسبه اكون اول الحاضرين واصب القهوه والشاهي واهتم عشان مايزعل وكان في المناسبات يعتمد علي وكنت مبسوط لانه مايهمشني مثل البقيه
اخوي الي اصغر مني تخرج ضابط وقررنا نخطب انا وهو من عند عمي
تعرفون لما تحب انسان او تتعلق فيه وتنصدم منه صدمة العمر
قال اخوك يختار من اكبرهن لين اصغرهن وانت مالك نصيب عندنا
قلت ليه ياعم ضحك قال منت بكفو
سكت من الصدمه اخوي انتظره يقول شي سكت يبي بنته الي يحبها
بلعت الكلمه ومن بعدها جلست اسبوع اقوم اخر اليل اصرخ من القهر لهدرجه محد يشوفني شي
طيب انا ماعمري اذيت احد وخدوم وبالاخير ماني كفو لو جت من غيره عادي بس عمي الي مربيني من بعد ماتوفى الوالد
من تاثري بكلمته تركت الوظيفه
واعتزلت الناس وصرت افكر بمستقبلي
جامع مبلغ بسيط وقررت اشتغل في التجاره وبديت اشتري خضار وكنت اشتري احسن شي في السوق وانقص في سعر الربح العالم تدبل السعر وانا ابيع باقل من النص عشان امشي بضاعتي
وصرت اتعامل مع الشريطيه يوم يضحكون علي ويوم اضحك عليهم صرت شاطر في البيع والشرا البضاعه الي اشتريها مايجي العصر الا وهي مخلصه سنتين وبديت افتح محلات خضار ونفس البدايه مكسبي مايتعدا نص سعر البضاعه
تزوج اخوي وانا ماعاد رحت لعمي الا اذا جات مناسبه كبيره احضر واجلس مع الناس ماعاد اناقز مع القهوجيه
بعد سبع سنوات من كلمة عمي صار عندي في كل جهه من الرياض اقل شي محلين خضار رصيدي في البنك يبطي عمي وعياله يجمعونه
شريت بيت لي وللوالده وخواتي في ارقا حي في الرياض
جوالي الي محد يدق عليه كل يوم معزوم وعمي مبسوط مني وصار يستشيرني
دق علي وقال ترا جايك بكره قلت حياك وكنت عارف ليه جا
قلت لازم استرد كلمته الي جرحني فيها وعطتني دافع اتغير
جاني هو وولده يخطبون اختي وجايب معه ثنين من كبار العايله يبي يحرجني
قلتله ابد البنت بنتك وولدك اخوي بس عندي شروط
قال وش شروطك
قلت المهر مية الف
ولها بيت لحالها
وشغاله وسواق
قعد يضحك ويقول تتكلم من جدك
قلتله الي مو بكفو يلبي طلباتنا لايخطب من عندنا
انصدم وقال ماربيتك على كذا
الان اختي مزوجها امام مسجد في حارتنا
وعمي اذا شافني داخل اي اجتماع او مناسبه يوقف ويرحب فيني
سبحااان من بيده ملكوت السماوات والارض
لا تخف عندما لا تنل ماتسعى اليه وثق بعلام الغيوب ،، كن مؤمنا بأن رزقك سيأتيك ولن ينقص منه شيء ،،
لاتحزن اذا ابخسو حقك من في الارض لضعف منصبك او لعدم شهرة اسمك ،، فربما تكون انت اقرب منهم لمالك الكون بأكمله 💞
اللهم لاتجعل في قلبي مثال ذرة من كبر وتوفني وانت راضٍ عني يارب العالمين 💞
المواضيع المتشابهه 
قصة سكيورتي أمن الى تاجر كبير 
العرض المتطور
