الموضوع جال في صدري منذ فتره ليست بالقصيرة وصرت الحظها بواقعي العملي واقع عالم الانترنت واقعي الخارجي الشارع الاسواق المطاعم الخ
السالفة يا اخوان بكل اختصار اشوف بعض التصرفات طرأت على بعض الناس فيه من اعرفهم وفيه من لا اعرفهم
وهالتصرفات قد تحث على الممنوع مرغوب او بشكل اصح شغلة عناد وعباطة في بعض التصرفات
لعلي اذكر بعض التصرفات التي رايتها والتي سمعت بها والتي لاحظتها
سواء بالانترنت او الشارع او العمل
على سبيل المثال لا الحصر
للعلم ابلغ من العمر 37 عاما عاشرت الجيل السابق والجيل الحالي تقريبا
1- نظام نفسي نفسي مالي دخل باحد هالسالفه الاحظها كثير جدا في اناس تربوا في عوائل هالعوائل تخدم وتسعى لخدمة الغير لو على حساب انفسها من ناحية لمساعدة وتقديم المعونة الخ وبالعكس الابناء اصبحوا نفسي نفسي ولا لي دخل بغيري وللعلم ماعليهم قاصر او نقص في تقديم تلك المساعدة لو بالكلام .
2- بالعمل قبل تقريبا السنه والنصف مجموعة ادارات الفترة الصباحية طبعا هالادارات لا يوجد مراجعين كي يتعطل العمر او امور اخرى كنا نجتمع ونحرص على الحضور مبكرا قبل الثامنه صباحا عشان نفطر جماعي وضحك وشاهي لين تجي تقريبا ثمانيه وربع وبعدها كلن على مكتبه والنفوس طيبه ومن وين يافلان جبت هالفطر واللي يخلي زوجته تصلح وتجيب الين حضر احد الاشخاص نقل لادارتنا وقال كلمته الشهيره ارى ان الفطور يقتصر على مكتبنا فقط ونقل الكلام للمدير ومن ثم اصبحوا يحضرون فطورهم لوحدهم ويقفلون بابهم وعدده مايقارب الست اشخاص ومن ثم صار كل مكتب يسوي نفس الطريقه او كل موظف يجيب فطوره لحاله ويفطر لحاله تخيلوا فرق هالجمعه هالشخص وش استفاد لا اعلم .
3- ادعاء المثاليه بكل شي وانا انسان ماحب كذا ولا احب كذا وانا طبيعتي كذا ومن يلاحظ عليه ويعرفه شخصيا يلاحظ عكس كلامه وربما تجي امور يشتد فيها الحديث على انه المثالي ويتكلم على غيره وفيه وفيه وفيه وهو ماشاف عيوب نفسه التي ربما اشد مما يفعله غيره الذي عاب عليه .
4- حب الشر للناس من مبدا الانكار على المنكر :-
كما قرا وتعلمت من الاحدايث النبويه الصحيحه قولة صل الله عليه وسلم (( من رأى منكم منكرا فليغيره... الى اخر الحديث
لاحظت اشخاص ليس لهم صداقات وليس لهم اختلاط بالناس الا فقط من يعمل نفس اسلوبهم فقط
فتلاحظه همه الشاغل هو البحث عن المنكر فتلاحظه يدخل الانترنت للبحث عن ذلك يدخل الاسواق للبحث عن ذلك يسترق السمع بالمخيمات بالاستراحات حول البيوت الخ
مع انه لم توليه الحكوميه او اي جهه حكوميه هذا الامر ولم يحثه الشرع والكتاب والسنه على فعل ذلك الا اذا انا لا اعلم ولا افقه فلينبهني احد
وتحصله فرفره لين يطيح باحد ثم يقوم بالبلاغ او بواسطة معارفه في جهه معينه ليلقي القبض على ذلك الشخص ولم ينصحه ولم يفعل اي شي نهائيا الا البحث والبلاغ فقط
والبعض تجده يصنع المنكر من اجل الحصول على منكر وهذي اسمع عنها في عالم الانترنت بشكل كبير سواء او مواقع التواصل الاجتماعي
وعلى قولة احد الاشخاص لي ذات مره اذا حبيت تصيد الناموسه لازم تشغل لمبه عشان هي تجي وتطيح عليها وتمسكها
طيب نحن نعلم ان النفس اماره بالسوء والنفس شهوانيه ومهما كان انت جاي وتتحويك حولها يمين يسار لين طاحت وعقبها السجن وضياع سمعه الخ وربما فصل من وظيفه وطرد اهل واقارب ماهي الفائده ؟
لو نصحت وحاولت مره واخرى باسلوب حسن ومؤدب هل هو افضل ولا ايقاعه بالسن على قولتك خليه يتربى !!
وفي المقابل والله العظيم شخص اعرفه قديما يعمل هالعمل وله اخو شريب سكير نكير ودايم يقول ياخي اخوي هذا منسم مو صاحي مهبول عليه حركات
طيب يامدور عيوب الناس اخوك ورا ماتنصحه وتبلغ عنه ؟
5- سالفة المرجله هاليومين في سماع الشيلات مع ان حكمها حرام لدخول المعازف وغيرها فيها واللي يسمع غيرها مو رجال انا لا اعلم وين المرجله عندنا يجي جنبي واحد فاتح الدريشه وريحة عرقه تشمها من بعد كيلو وداق اللثمه في هالحر ورافع الصوت على شيلات تجيب الضيقه والهم والكابه والعصبيات القبليه وامر اخر لبس البدل عيب وكل شخص يشوف المرجله من منظورة الخاص ويبدا يذم في اشخاص قدام ناس انهم مو رجال لتصرفات ماعجبته ابدا .
6- النميمه انتشرت بشكل مو طبيعي فتحصل فلان ينقل عن فلان والفلان ينقل لمديره فلان ويسبب شحناء بينه وبين الموظف الفلاني لدرجة توصل لكره مديره له وهو لا يعلم هل هالفعل او الكلام صحيح ام لا اشوفها انتشرت بقوه .
7- موضوع التجاره والاسواق الخ واسعارها الجميع يعلم ان لو تحصل مقاطعه لاغب المنتجات ومن ضمنها المطاعم ستصبح الاسعار بيد الجميع وفي متناولهم ودون اي خساره للتاجر نهائيا ولكن لماذا لا احد يعمل بتلك المقاطعه ؟ انما هاشتاقات ب ويجلس يكتب ويلا ياشباب وهو متربع في مطعم وجالس يضرب في النعمه !! شي غريب
هذا بعض مما في خاطري واتمنى المناقشه بعيدا عن السب والشتم او الغلط على الغير واتمنى من الادارة ومنكم عدم المؤاخذه في بعض العبارات في الموضوع والموضوع للنقاش فقط والجدي والصريح والواضح
وفقكم الله وبارك فيكم واسعدكم دنيا واخره ورزقكم من حيث لا تحتسبون
المواضيع المتشابهه 
دعوة للنقاش ( تصرفات اصبحت اشاهدها بالسنوات الخمس الأخيره) ماهي اسبابها دوافعها الخ 
العرض الشجري
