الحياة عبارة عن تجارب وعِبر على مر السنين
وهنالك الكثير من الناس من منحه الله الحكمة والقدرة على صياغة أجمل المعاني وأجمل ابيات الشعر
ومن اشعار نصائح الحكماء هذه القصيدة الجميلة المليئة بالحكم والعبر
للشاعر عبدالله بن علوش
يقول الشاعر:
على حسب ما مرني ومن تجارب الاولين *** وجهة نظر وجود في حال اتفاق وانقسام
اترك مسافه كافيه بينك وبين الآخرين *** بعض البشر ودك حدود المعرفة معهم سلام
واصمت ولا تحرص على كثر الكلام الصمت زين *** اللي سكوته ساتره يمكن يعريه الكلام
إذا تكلمت احذر تكون أطول المتكلمين *** السالفة لا طولت يضعف معها الاهتمام
أمزح ومزحٍ باللسان أخير من مزح اليدين *** مزح الرجال العاقلة على حدود الاحترام
اضحك ولا تضحك برفع الصوت رفع الصوت شين *** من الأدب والذوق عند الضحك ضحكٍ بابتسام
اكرم وبيبان الكرم واجد ولا يحتاج دين *** ترى الرجال إكرامها ما هوب في كثر الطعام
احلم ولا تعجل ولا تغضب ولا تشري بدين *** وشاور ولو رأيك معك لا شرت عداك الملام
وإذا شريت بدين لا تبطي على المجملين *** كلٍ حلاله غاليٍ عنده لو إنه ما يسام
لاجاك مديونك معه بعض الوفاء وبعضه لحين *** فأستد باللي جاك وش دراك لله الدوام
ترى التغافل فيه لذه وانشد المتغافلين *** وان جات كلمة توجع أطلقها مع سرب الحمام
أرضى ليا جاك الرضى لو العذر ما هو سمين *** وترى التسامح ميزة السادة رفيعين المقام
وصادق واذا صادقت ما جربت ما صادقت لين *** أما يطول بك السهر والا يطيب لك المنام
وأصدق مع نفسك وتلقى نفسك من الصادقين *** والنفس خيل إبليس لا تعطيه نفسك واللجام
أليا نصحت انصح خفى لا تفضحه في الحاضرين *** ترى الرجال يقودها لين الحكي قود الخطام
واخلاقك وتواضعك عامل بها المتواضعين *** نصف الادب مجامله جامل ولا تجامل لئام
وإذا تسولف عن طموحاتك مع المتفرغين *** كنك تسولف للنصارى في الحلال وفي الحرام
والعمر ما هو فرصةٍ وحدة ولا هو بفرصتين *** مع كل مطلع شمس لك فرصة وخطوة للأمام
هذا ولازلنا تعلمنا الليالي والسنين *** والعلم خير من الجهل والنور جلاي الظلام
المواضيع المتشابهه 
قصيدة مليئة بالحكم والعبر - من اشعار نصائح الحكماء ( فيديو) 
العرض الشجري
