مساكم الله بالخير
اليومين هذي بدأ الحر يشتد في الرياض
والمتوقع ازدياد درجات الحرارة خلال الايام الجاية
والله يكتب اجرنا واجركم واجر الصائمين
قبل اسبوع تقريباً لاحظت لمبة نقص ماء الاديتر تولع وتبريد المكيف لك عليه ، واذا وقفت سيارتي بعد مشوار ورجعت لها القى تحتها تسريب ماء اخضر .
وديتها الورشة قالوا الاديتر فيه شق وغيروا قطعة في الاديتر وقالوا لازم تصييخ وتنظيف و300 ريال
اليوم الثاني رحت مشوار الظهر ورجعت الا والموية تهرب
رجعت للورشة قالوا غطاء قربة الماء يحتاج تغيير و 50 ريال
اليوم الثالث نفس الشيء
واروح لورشة ثانية قالوا طرمبة الماء عطلانه و 500 ريال
واليوم الرابع ولعت لمبة نقص الماء
ويشاء الله اوقف عند ورشة صغيرة داخل محطة بنزين والقى ذاك الباكستاني ويلقى المشكلة في قسام خرطوش الماء اللي جاي من الاديتر ويوصل للمكينة
قام فكه وركب بداله واحد جديد وانتهت المشكلة
لكن سوى حركة خلت مكيف السيارة ماشاء الله تبارك الله مثل الجليد واصبحت في عز الظهر احط المكيف على اقل درجة
وهي بسيطة بأمكان كل واحد يسويها وهي عباره عن تفريغ الاديتر وخراطيش الماء من الهواء كالتالي :
1- في اعلى الاديتر يوجد لي صغير لدوران الماء بينه وبين المكينه قم بفكة واترك الماء يتسرب والسياره تشتغل
2- افتح قربة الماء وضع بها محقان كبير واملأه بالماء واترك حركة دوران الماء تستمر لمدة 10 دقائق تقريباً
3- ستشاهد في البداية ان الماء يخرج من اللي بشكل متقطع ومع مرور الوقت سيكون الاندفاع اكثر وهذا معناه ان الهواء خرج من الاديتر والخراطيش والمواصير اللي بين المكينة والمبرد
4- قم باعادة تركيب اللي الصغير مكانه واستكمل الماء الناقص في الاديتر
وبعدها جرب مكيف سيارتك وادع لي ولوالدي .
موفقين ان شاء الله