السلام عليكم ورحمة الله وبركاته
اسعد الله اوقاتكم بكل خير اخواني واخواتي الكرام عندي استفسارات يا اخواني عن موضوع يخص مكاتب الخدمات العامة فتحت مكتب لولدي علشان يترزق الله من وراه بوقت فراغه من الجامعة هو يدرس هندسة بالجامعة وعنده اوقات يكون عنده فراغ يداوم بالمكتب اذا ماكان عنده محاضرات بالجامعة وحبيت انه يكون كل شئ نظامي انجزت جميع المتطلبات من الغرفة التجارية ومصلحة الزكاة ومركز الشرطة والدفاع المدني ووزارة العمل والبلدية طبعاً هذا بعد ما استأجرت المكتب وجهزت الاثاث واللوحات وكل شئ الحمدلله بفضل الله ولاكن في السجل التجاري حاطين لي ملاحظة انه النشاط يحتاج ترخيص من وزارة التجارة والاستثمار - ادارة دعم الأعمال ورحت للقسم النسائي لما كلمتهم قالوا لي هذا من الغرفة التجارية تطلعونه قلت لهم بالسجل مكتوب من عندكم نطلعه وريتهم الملاحظة فاتصلوا على القسم الرجال وافادوهم انه يسون لي خطاب للبنك اللي انا فيه يبغون ضمان بنكي وبعض المتطلبات الضمان البنكي طالبينه بـ 10 الاف ريال طبعاً انا جبت المتطلبات معاي كلها لانه شفت شروطهم واحضرت معاي شهادة بنكية من البنك لاكن قالوا لا لابد ان نعطيك خطاب وتروحين للبنك يعطونك ضمان بنكي الضمان غير عن الشهادة اخذت الخطاب ورحت لبنك الراجحي فرع النسائي هم كذلك طلعوا مايدرون وش الضمان البنكي وارسلوا اوراقي للقسم الرجال وانتظرت يمكن ساعة وشوي ارسلوا من قسم الرجال نموذج يتكون من 6 صفحات ثلاث بالصيغة العربية وثلاث الصيغة الانجليزية المديرة احتارت اعطتني قالت والله ما ادري يحتاجون بيانات وانا ماني فاهمة فيها عبيها انتي واخذت النموذج وعبيت الورق الصراحة الضمان فيه ضمانات مسميات كثيرة وامور كثيرة والضمان كاتبين لي خيارين هل هو على مدى طويل ولا محدد بتاريخ انا حددت اسبوع لانه حسب مافهمت انه فيه حجز على المبلغ والشروط كثيرة قرأتها ولاكن ما استوعبتها ولافهمت منها شئ وسلمت النماذج وارسلوها لقسم الرجال للي الحين ابغى افهمة يا اخوان ايش هو الضمان البنكي وليش يحجزون على المبلغ واذا حجزوا هل انا ما اقدر استفيد منه لانه حقيقة انا اودعته بالحساب على اساس اني اخلص وضع الترخيص من البنك واخذ الضمان البنكي وبعدها بفترة عندي التزامات بالمبلغ بخلصها ماعندي امكانية ان المبلغ ينحجز عندهم على طول بدون ما استفيد منه اللي ابغاه احد فاهم يشرح لي الوضع وانه هل المبلغ يرجع بحسابي ولا ياخذونه وزارة التجارة لانه اول مرة ادخل بمثل هالامور ولا لي فيها خبرة ولا دراية وحبيت اسألكم لانه هذا افضل منتدى في امورالمال والاعمال وفيه اعضاء وعضوات كرام كما عهدناهم لايبخلون على سائلهم جزاهم الله ووالديهم جنات النعيم وبارك الله لهم في ما اعطاهم وفي صحتهم وعافيتهم واصلح لهم ذريتهم وجعلهم قرة اعين لهم .
المواضيع المتشابهه 
استفسار عن الضمان البنكي 
العرض الشجري
