والله لو كنت صاحب قرار كان منعت الطريقة الحالية في صرف حساب المواطن وحافز واستثمرت فلوسها في خدمة المواطنين المحتاجين .. ابني فيها معاهد تدريب منتهية بالتوظيف
وأبني مجمعات خدمية داخل الاحياء واشغّل فيها المواطنين العاطلين دوام كامل .. ودوام جزئي للطلاب وبقية الموظفين .. احسبوها معي ..
اطلعوا للشوارع شوفوا عدد البقالات ومحلات الخضار وورش صيانة الاجهزة والمغاسل ووو .. واللي مسيطرة على هذي الانشطة هم الاجانب واحسب كم المبالغ اللي يرسلونها للخارج من وراء دخل هالانشطة ..
ليه في كل شارع عشرة بقالات ,, عشرة محلات خضار .. الخ ..
ليه ما الغي تجديد هالتراخيص وابني في كل حي مجمعات خدمات فيها مراكز سوبرماركت وخضار ومغاسل ومركز صيانة كبير وباقي الانشطة يستوعب ابناء الحي ويشتغل فيه المواطنين العاطلين او الطلاب بدل هالثلاثمائة ريال اللي تجيهم من حساب المواطن بيدخل عليهم اضعاف هالمبلغ ومن تعبهم مو من تسدّحهم لين مايتعودون الطمالة والكسل؟!
وكذلك يستفيد من ريعها اصحاب معاشات الضمان الاجتماعي برفع معاشاتهم لتغطية نقص ما كانوا ياخذونه من حساب المواطن وأكثر ..
يمكن تقولون عدد المستفيدين اكبر من الوظائف بكثير ولن تستوعبها المجمعات .. لكن احسبوا الفائدة اللي بنجنيها من مغادرة الاجانب وإحلال المواطنين مكانهم وتبقى فلوسنا لبلدنا ولاولادنا
والله ياعندنا انشطة تدخّل ملايين ومو مستفيد منها الا الاجانب
أغنى الاجانب شوفوهم يشتغلون بالخردة والسكراب وعندهم ملايين .. عطوني نشاط خسران ماعدى الانشطة اللي اصحابها سعوديين وداخلين بمهنة دون دراسة جدوى .. يبي يبدا كبير .. مايبي يبدا من الصفر ..
شوفوا نجاح التجارة الالكترونية في الانستغرام وباقي وسائل التواصل نجحت لأنها بدأت من الصفر بدون ما اتسلف عشان ابني مشروع وانا مو متأكد من مدى نجاحه ..
شوفوا كم نشاط بدا من الانستغرام والحين صاحبه عنده عدة فروع وما زال يتوسع ..
قبل كم يوم صديق متقاعد حديثا يفكر في مشروع .. مرة يقول مغسلة ثياب .. مرة يقول مطعم بخاري .. مره يقول فوّال ..
يعني تفكيره منصبّ في كيف يحط فلوسه في مشروع ويجيب عمال يلعبون عليه ويسرقونه ..
يبي مشروع يمر عليهم اخر الليل وياخذ كم قرش ويرجع يدربي راسه بالبيت ..
والله ماينجح مشروعك الا اذا وقفت عليه من البداية للنهاية .. وانا كمستهلك .. ومواطن .. بتعامل مع المحل اللي اشوف صاحبه ابن الوطن هو اللي يديره
والله بندعمكم بس ورّونا همتكم
كذلك عندي اقتراح .. لو الرسوم الحكومية مثل رخص المحلات وغيرها يلغونها على الانشطة اللي يشرف عليها سعوديين فقط ولا عندهم عمالة فهالشي بيكون دعم حقيقي لهم
المواضيع المتشابهه 
ياليت الدولة تستثمر حساب المواطن وحافز بدل توزيعه 
العرض الشجري
