السلام عليكم ورحمة الله وبركاته
من اسبوع والطماط كل يوم يسجل قاع جديد
حيث تراوح سعر الكرتون سعة 4 كيلو اليوم مابين 3 و 5 ريال !
فيما يتوقع ان يكون لديه دعم قوي تاريخي عند سعر 1,5 ريال ونص !!
الله يكون بعون اخواننا المزارعين
الفايدة كلها رايحة للشريطية والمحرجين والعمالة ورسوم دخول السيارة للبلدية ..
لو وقفت عند باب المزرعة , وقالو لي الكرتون بثلاثة ريال
او ادخل المزرعة وجمعه بلااااش
قلت هاته بثلاثة ! والله يا الربع ماهي في قيمة الكرتون وتجميعه , ولاهي في تحميله وتوصيله للسوق !!
زبدة الموضوع
من واقع اطلاع ومشاهدة ومتابعة حثيثة لسوق الخضار
اطرح لكم هذه الفكرة
لعلها تجد من الشقردية اهل الشغل والصبر والجلد من يهتم بها وينفذها
ففيها خير كثير وفائدة لاتخطر على البال
مبدئياً لاتحتاج لرأس مال كبير , فخمسة الآف ريال كافية وزيادة
الطريقة
اتفاق مجموعة من الاخوان كل بمنطقته
مثلاً واحد من الرياض والثاني من جدة والثالث من الدمام والاحساء والقصيم وابها والطائف والخرج وغيرها
ينزلون السوق كل يوم صباحاً , قبل صلاة الفجر الى الساعة سبعة تقريباً
ثم يقوم كل شخص بمراسلة المجموعة عبر الرسائل او الواتس اب وبالصور
موضحاً سعر الخضار بالسوق لديه
فإذا لاحظ احدهم سعر شيء منخفض بأحد الاسواق , وسعره لديه مرتفع , طلب من الشخص الموجود بهذا السوق شراء كمية محددة , وارسالها له
يعني تخدمني واخدمك وكله بحسابه
الافضل ان يتفق الاشخاص على سعر محدد فيما بينهم من باب المعاملة بالمثل
يعني مثلاً اعجبك شيء , وتشوف انك راح تكسب فيه بإذن الله
يشتري خويك بالسوق الثاني حاجتك ويرسلها لك
على ان تدفع له 500 ريال مقابل اختيار الافضل لك والشراء والتحميل
وسعر الشحن حسب السوق , وحسب السيارة وحجمها بناء على الكمية
ان شاء الله وضحت الصورة
بعدها ممكن تتوسع شوي شوي
فتشتري سياراتك الخاصة ويفضل ان تكون دينات
فتكسب قيمة خدمتك وقيمة توصيلك للمدينة الثانية بسياراتك الخاصة
تخيل اشتريت 1000 كرتون كوسة او خيار او طماط
والفرق بالسعر عندك بالسوق 5 ريال
معناته كسبان 4000 ريال تقريباً , بعد تكلفة المشترى والنقل !
ربما يستغرب البعض الفرق , ويعتقد انه مبالغ فيه
اللي ماتدرون عنه
ان الفرق هذا ممكن يكون بالسوق نفسه ! يعني ممكن تشتري بسعر بحراج الفجر
وتبيع بفرق اكثر من 5 ريال بحراج بعد العصر
ايضاً ممكن تشتري السبت والاحد والاثنين والثلاثاء بسعر
وتبيع بدبل بدون مبالغة بالاربعاء والخميس والجمعة ..
عموماً هي دعوة ونصيحة
وبإمكانك الاطلاع عن قرب , والتأكد من ذلك بزيارتك لسوق الجملة
اسبوع واحد كافي انك تاخذ فكرة
روح الصباح لمدة اسبوع , لاتبيع ولاتشتري
تفرج بس وكون فكرة وشوف بعيونك
المواضيع المتشابهه 
انهيار وتصحيح قاسي جداً لسهم الطماط !! 
العرض العادي
