السلام عليكم ورحمة الله وبركاته
خلال فترة توقف الأندية الرياضية أيام الحجر، قررت
شراء نادي منزلي.
بدأت رحلة البحث محلياً، وللأسف انصدمت بأسعار فلكية ما تخدم الاستخدام الشخصي نهائياً، بالإضافة لقلة المحلات، على الأقل في مدينتي الرياض.
لقيت اني راح ادفع اقل شي 20 ألف ريال لبناء جيم
منزلي ولا راح يكون فيه كل اللي احتاجه بالجودة المطلوبة.
وقتها قررت الشراء من علي بابا، وبدأت رحلة البحث عن مورد معتمد يوفر جميع متطلباتي.
بحكم انها أول
تجربة شراء لي من علي
بابا وبمبلغ كبير كنت متخوف جداً لكن توكلت على الله وحددت المورد وارسلت له التفاصيل.
وهنا أحب التأكيد على كم شغله مهمة في الطلب من علي بابا:
1- اختيار مورد معتمد في علي بابا 
2- توضيح الطلبات والكميات للمورد بشكل واضح وبالصور إذا امكن لأن حاجز اللغة عائق كبير وفيه اشياء ممكن توصل خطأ، وحصل معي لكن في شيء بسيط ولله الحمد. 3- إذا كان عندك ناقل محلي يشحن من الصين الافضل تتواصل معه بعد مايعطيك المورد تفاصيل الشحنة من وزن وابعاد لأنه في الغالب بيكون ارخص، انا في حالتي ماعندي ناقل محلي وبحثت وكانت الاسعار مرتفعة جداً. 4- التواصل والطلبات والدفع عن طريق علي بابا فقط، هي اللي راح تحمي حقوقك بعد الله.
بعد الاتفاق على الكميات وعرض السعر جيت لمرحلة الشحن، وزي ماذكرت فوق ماحصلت ناقل محلي وبلغت المورد بالشيء هذا وقالي ممكن احنا نتكفل بالشيء هذا ونعرض لك سعر قلت ماعندي مانع.
لكن كنت خايف من شي واحد، اني اتفق معاه على سعر شحن معين ولما توصل هنا ادفع رسوم جمركية وضرائب عالية، أكدت عليه ان عرض السعر يكون DDP (Delivery Duty Paid) ومعناها ان اللي راح ادفعه للبائع شامل جميع المصاريف حتى التوصيل الى البيت، وخليته يكتب الشيء هذا في عرض السعر الرسمي حتى لو اضطريت لاحقاً ادفع اي شي للجمارك راح ارفع مطالبه على علي بابا.
عرض السعر الرسمي والكميات
المبلغ الاجمالي
$3255 = 12206.25 ريال سعودي (استخدمت فيزا بنك الاستثمار) والدفع ابل باي من الموقع
دفعت دفعة أول لتأكيد الطلب
$977 = 3663.75 ريال سعودي، والمتبقي بعد التصنيع وقبل خروج الشحنة من المصنع
تم تأكيد الطلب ودفع الدفعة الأولى بتاريخ 23 مارس 2021
وسبحان الله حصل في هذا اليوم مشكلة اثرت على جميع الشحنات في العالم وهي حادثة قناة السويس، وهي من الاشياء اللي اخرت خروج شحنتي من الصين.
تم دفع الدفعة الثانية والأخيرة بتاريخ 8 ابريل 2021
صور التغليف قبل الشحن
تم الشحن تقريباً في نص ابريل، وطبعاً الشحن البحري مافيه تتبع، ولكن كنت اسأل البائع كل اسبوعين تقريباً عن مكان الشحنة.
وصلت الشحنة إلى ميناء الدمام بتاريخ 6 مايو واللي كان يوافق 24 رمضان، وهذا سبب ثاني اخر وصول الشحنة لي مع اجازات العيد وكثرة الشحنات اللي وصلت خلال فترة العيد.
وصلت الشحنة الى الرياض والى البيت بتاريخ 31 مايو
كيس الملاكمة شريته من ساكو ب 1099 ريال
الارضية شريتها من ساكو ب 1946.25 ريال (15 متر مربع 3x5)
حامل كيس الملاكمة من امازون السعودية ب 229 ريال مع الشحن
الصورة النهائية
حالياً ينقصني حامل للاوزان لكن الاسعار زي ماقلت غالية جداً هنا وشحنها كان صعب مع الطلب الاصلي، اللي يعرف لي حداد شاطر يسوي لي ستاند يسوي خير.
اخيراُ اتمنى اكون وفقت في سرد التجربة، وللعلم اتفقت مع البائع على عمولة في حال جبت له زبائن، اللي له نية يتواصل معي وان شاء الله اخدمه.