أنا أنت
مشاعرك لسة جوايا
لانك مني ومعايا
ف فرحي ..
ف حزني ..
ف غنايا..
ومش ممكن هحس بحاجة من غيرك
ومن غيرك بحس بحيرة
وبكبتة
م انا أنت
***
وتفكيري
بدون ما تحس. . تفكيرك
صدى صوتي
ندى ضميرك
يقولك فيه
متزعلشِ على خيرك
وتبدأ قسوة من تاني
عليّ ..
والألم بالصدفة صدقني ..
هيبقى تملي
فيك أنت
ومتسألشي
دا من أمتى
م انا أنت
***
أديك شايف
خُطا الأيام أنا ارسمها
وأحلامي اللي بحلمها
عينيك من بصة ف عنيّه
بدون مجهود بتفهمها
وعقلك من خلال عقلي
بدون م تنام بيحلمها
وضحكتنا في يوم تحقيقها
نقسمها
أنا وانت
***
ما انا وعدك وموعودك
ولحني عزفته على عودك
حياتي ...
ودنيتي ...
وعمري ...
متحلاش إلا بوجودك
ويوم ما الدنيا تجرحني
دموعي تسيل على خدودك
لأني أكيد
أنا أنت
***
م أنا قلبي زمان قابلك
وقال عنك مفيش قبلك
دا كان عايش أساسًا ليك
وكان بيشوف بنن عنيك
ولو نظراتك الأحلام
عنيا تقول لها شُبيك
حياتي اوهبها لحياتك
واخلي الدنيا ملك أيديك
واخلي الحزن مش قابلك
م انا أنت
***
وعمري هعيشوا بس معاك
م يملا القلب إلا هواك
وقطر العمر لو هيفوت
بدون م تكون أكيد
راح أموت
هعديه وافضل استناك
واضحي بدنيتي إلاك
لاني هعيش أكيد جواك
م أنا صدقني أبقى أنت
تستطيع المشاركة هنا والرد على الموضوع ومشاركة رأيك عبر حسابك في الفيس بوك