يولد الانسان ويمر بمراحل رضيع طفل مراهق شاب رجل ناضج شايب وكل مرحله لها اهتمامات وأهواء وتوجهات ..وصلت لعتبه متقدمه بعض الشي من العمر وللاسف لازالت أفكار وأهواء العشرينات مسيطره بشكل 60-70 % بغير اراده كذا عفويآ مثلآ لما ادخل مول لوحدي لشراء غرض للبيت اجد نفسي لاشعوريآ عيوني تسقط يمنه ويسره على اخواتنا في الله وارجع البيت وبين أولادي وأهلي بصورة الأب المثالي الذخر والقدوه الناصح الواعظ وأطالع في ولدي المراهق وأقول معقول وش فرق بيني وبينه في التصرفات يمكن هو أفضل من بعد واسال نفسي هل انا ابوه او هذا الشاب الثقيل الرزين أبوي ..لما تجي مباراة لعشق الصغر الهلال اجد نفسي وبتلقائيه مع اي هدف انط نطه في الهواء ومع احد الفرص المحققه الضاايعه ارمي الروموت بشاشة التيفي ويروح عشرين كسره لما يكون عندي مشوار ومستعجل انطلق ولتجاوز السيارات وحده ورى الثانيه أشبه باالبلاي ستيشن لما اروح العب كوره مع اخواني وولدي وبحكم السن يفترض علي العب مدافع لاجل ثقل الحركه واللياقه وكاالعاده اجد نفسي ساحب ولدي سالم الشاب اليافع المنطلق من خانة الهجوم الى مكاني قلب الدفاع وآخذ مكانه هجوم وبتضجر يرجع كاحترام لأبوه فقط واي كوره مرفوع احيانا احاول العبها مقصيه في ألهوا مع ان ارتفاعي مايوصل لحدود ركبي واسمع صوت ولدي من ورأي تكفى ياميسي على باله مااسمع في البيلوت مع بعض الاخوان اي حالة غظب ارمي الورق عليهم واخرج زعلان وماارجع الا من بكره حزة النوم غالبا اجد نفسي نايم على كنبة الصاله مثل اي واحد من أولادي ..خلاصة الكلام وبيني وبين نفسي اسأل هل من المعقول بابقى كذا على تصرفات وافكار شبابيه عشرينيه وهل من المعقول ندخل عمر الخمسينات والستينات واحنا على نفس الفكر والمنوال وارجع أرد على نفسي يااخي وين المشكله انت مرتاح بهاالتصرفات والأفكار عيش حياتك وارجع أرد بعد وأقول لكن عمرك هذا يستوجب عليك اعادة ترتيب وإجبار نفسك الى ان تتعود وتعيش عمرك الحقيقي ماهو عمرك وعمر غيرك ..حقيقه يشغلني هاالموضوع خصوصا بان ولدي على وجه زواج وبعدها أصير جد
تستطيع المشاركة هنا والرد على الموضوع ومشاركة رأيك عبر حسابك في الفيس بوك